adsendar-greinar Mannlíf
Guðmundur Sigvaldason, framkvæmdastjóri Golfklúbbsins Leynis. Ljósm. kgk.

Frábært sumar að baki í golfinu á Akranesi

„Sumarið hefur verið alveg frábært í mínum huga. Völlurinn var frábær og veðrið lék við okkur. Elstu menn muna ekki eftir annarri eins sumarblíðu,“ segir Guðmundur Sigvaldason, framkvæmdastjóri Golfklúbbsins Leynis, í samtali við Skessuhorn. „Umferðin um Garðavöll hefur verið mikil og núna um miðjan ágúst hafa verið spilaðir um 17 þúsund hringir á vellinum í sumar. Það er svipað og gerist í góðu meðalári og samt er allur september eftir,“ segir framkvæmdastjórinn og telur veðrið leika þar stórt hlutverk, ásamt opnun nýrrar frístundamiðstöðvar sem tekin var í notkun í apríl síðastliðnum. Guðmundur segir nýja húsinu hafa verið afar vel tekið. „Það er sama hvert litið er; félagsmenn, gestir og kylfingar eru allir ánægðir með nýja húsið og lofa það í hástert. Jafnvel er haft orð á því að umgjörðin sé orðin eins og hún gerist best erlendis. Okkur sem störfum hér á vegum klúbbsins finnst gaman að heyra það,“ segir hann ánægður. „Bygging hússins, í samstarfi við Akraneskaupstað, var í alla staði vel heppnuð. Verkið gekk bæði hratt og örugglega. Ekki liðu nema 14 mánuðir frá því byrjað var að rífa gamla klúbbhúsið og þar til ný frístundamiðstöð var tekin í notkun. Öll umgjörð og aðstaða til golfiðkunar er orðin til fyrirmyndar, bæði úti og inni og vinnuaðstaða starfsfólks mjög góð,“ segir Guðmundur.

Fleiri sækja Garðavöll heim

„Þá má ekki gleyma samstarfinu við Galito, sem annast veitingarekstur í húsinu. Það hefur gengið afar vel. Mér finnst þeim hafa tekist að búa til fjölskylduvænan veitingastað við Garðavöll þar sem hlýleikinn er í fyrirrúmi. Enda höfum við fengið margar heimsóknir af götunni og mun meiri umferð um svæðið en verið hefur undanfarin ár. Algengt er orðið að fólk líti við til að njóta góðra veitinga, útsýnisins, umhverfisins og nándarinnar við kylfingana. Þetta samstarf gefur því ekki tilefni til annars en bjartsýni,“ segir hann. „Húsið býður upp á marga möguleika til fundahalda, ráðstefna og hvers kyns mannamóta. Í vor og sumar hafa verið haldnar fermingarveislur, afmæli, brúðkaupsveislur, árgangsmót, erfidrykkjur og djasstónleikar í húsinu. Þannig að við erum búin að prófa ýmislegt, en allir hafa þessir viðburðir heppnast vel. Hér er góð hljóðvist og staðurinn hentar því vel til hvers kyns samkvæma og mannamóta,“ segir Guðmundur. „Allt hefur þetta haft góð áhrif á klúbbinn og reksturinn hefur tekið miklum breytingar í ár. Þar hefur ný aðstaða og gott veður auðvitað mikið að segja eftir tvö döpur rekstrarár og tap af rekstri klúbbsins,“ segir hann.

Fjölgun milli ára

Nýliðun hefur verið mikil í Golfklúbbnum Leyni undanfarin ár og á þessu ári hefur félagsmönnum fjölgað lítillega, eða um 1% að sögn Guðmundar. „En síðan við tókum við vellinum í ársbyrjun 2013, eftir fimm ár í höndum Golfklúbbs Reykjavíkur, hefur félagsmönnum fjölgað um 31%,“ segir hann. „Eitt af því sem sem mér þykir samt athyglisverðast er að skoða fjölda félagsmanna sem hlutfall af íbúafjölda í póstnúmerinu 300. Á þessum sjö árum, frá 2013 til dagsins í dag, hefur okkur tekist að halda í við mikla fjölgun íbúa og eru félagsmenn Leynis á milli 6 og 7% af heildaríbúafjölda og hefur það hlutfall heldur verið að hækka síðustu ár. Það þykir mér mjög jákvætt, sérstaklega í ljós þess að íbúum á Akranesi hefur fjölgað mikið á þessu sama tímabili. Það segir okkur að stjórn Leynis hefur unnið mjög gott starf á hverjum tíma,“ segir hann.

Alls voru 499 manns skráðir í klúbbinn 19. ágúst síðastliðinn og Leynir því þriðja stærsta íþróttafélagið innan vébanda ÍA, þar af með á fjórða tug nýliða. „Ekkert íþróttafélag hér í bæ tel ég að geti státað sig af jafn breiðum hópi iðkenda og aldursbili, það þori ég að fullyrða. Yngsti félagsmaðurinn okkar er sex ára gamall en sá elsti er um nírætt,“ segir Guðmundur og brosir.

Öflugt æskulýðsstarf

„Þannig að starf klúbbsins nær yfir mjög breiðan aldurshóp. Nýliðar í klúbbnum voru milli 30 og 40 talsins á liðnu sumri, á öllum aldri. Fjölgun hefur orðið í hópi barna og unglinga frá síðasta ári, enda stefna stjórnar að hafa barna- og unglingastarfið eins öflugt og kostur er hverju sinni. Birgir Leifur Hafþórsson hefur verið íþróttastjóri Leynis undanfarin þrjú ár og hefur hann aukið gæði barna- og unglingastarfsins. Það hefur skilað sér í fjölgun iðkenda í þeim hópi,“ segir Guðmundur. „Þá höfum við sömuleiðis staðið fyrir golfleikjanámskeiðum á sumrin fyrir sex til tíu ára krakka. Námskeiðin hafa notið vinsælda og í raun varð algjör sprenging í aðsókn að þeim núna í sumar þegar vel yfir hundrað krakkar tóku þátt. Elstu krakkarnir í unglingastarfinu eru leiðbeinendur þar og hafa staðið sig ofboðslega vel,“ segir hann. „Þarna er grasrótin og mikilvægt að hlúa að henni. Þetta er hópurinn sem kemur til með að taka við keflinu þegar fram líða stundir,“ bætir hann við.

Gott starf

Alls hafa um 15 starfsmenn staðið vaktina hjá golfklúbbnum frá því Garðavöllur var opnaður í vor. „Þeim ber að þakka fyrir vel unnin störf, öllum sem einum; vallarstarfsmenn, starfsmenn í afgreiðslu og golfverslun, þjálfarar og starfsmenn leikjanámskeiðanna,“ segir Guðmundur. „Á veturna er ég í fullu starfi og svo einn starfsmaður í hlutastarfi við kennslu. Síðan vorum við að bæta við starfsmanni í hlutastarf við bókhald og önnur tilfallandi störf á skrifstofu fyrir komandi vetur,“ segir hann. „Auk þess höfum við verið í góðu samstarfi við verktakann Grastec um umhirðu vallarins og ráðgjöf. Vélaviðhaldið hefur Steðji séð um en mikilvægt er að viðhalda og vera með góðan vélakost. „Þar að auki má geta þess að margir áhugasamir samstarfsaðilar styðja við klúbbinn með ýmsum hætti og vilja leggja öflugu starfi Leynis lið.“

Miklir möguleikar til framtíðar

Starfsemi klúbbsins fer að dragast saman þegar líður að lokum septembermánaðar. Að endingu verður vellinum lokað yfir veturinn og starfið færist undir þak. „Í janúar síðastliðnum opnuðum við nýja inniaðstöðu í kjallara frístundamiðstöðvarinnar. Hún hefur slegið í gegn og bjart framundan í starfinu þar í vetur. Þar er 9 holu púttvöllur og tveir golfhermar og allir velkomnir að nýta sér þá aðstöðu,“ segir hann.

Framundan á komandi árum eru breytingar á vellinum, en til stendur m.a. að endurnýja sex flatir og nokkra teiga. „Það ásamt viðhaldi og áframhaldandi endurnýjun tækjakosts eru stærstu verkefni næstu ára. Við þurfum að vera með góð tæki ef við viljum vera með góðan völl,“ segir Guðmundur og bætir því við að endingu að framtíðin sé björt hjá Golfklúbbnum Leyni. „Við höfum þegar skipað okkur í hóp fremstu golfklúbba landsins þegar gæði vallar og þjónusta við kylfinga er annars vegar. Klúbburinn hefur mikla möguleika til framtíðar með þennan frábæra völl og glæsilega frístundamiðstöð við Garðavöll,“ segir Guðmundur Sigvaldason að endingu.

Líkar þetta

Fleiri fréttir

Ég er kominn til Afríku!

Mér líður eins og spóa, fyrir utan að það var líklegast mun auðveldara fyrir mig að fljúga með flugvél suður... Lesa meira

Sýnum karakter!

Ungmennafélag Íslands gaf nýverið út sinn fyrsta hlaðvarpsþátt, Sýnum karakter. Um er að ræða verkefni á vegum Íþrótta- og Ólympíusamband... Lesa meira

Svefneyingabók kom út í sumar

Svefneyingabók eftir Þórð Sveinbjörnsson var gefin út á liðnu sumri. Í bókinni er að finna frásagnir úr Breiðafirðinum, en höfundur... Lesa meira