adsendar-greinar Mannlíf

Kom fimm hvolpum til bjargar og ætlar að flytja þá heim til Íslands

Skagakonan Bjarney Hinriksdóttir hélt til Krítar í lok júní síðastliðins þar sem hún ætlaði að verja sumrinu. Dvölin varð þó lengri þegar Bjarney fékk upp í hendurnar fimm litla móðurlausa hvolpa sem hún þurfti að hugsa um. Par á ferðalagi fann hvolpana við hraðbraut og tók þá upp á hótel. Þegar parið þurfti svo að halda heim á leið tók Bjarney að sér að hugsa um hvolpana og leitar hún nú til almennings um aðstoð við að fjármagna flutnings hvolpanna heim til Íslands.

Tók sér listamannaleyfi og hélt út

Aðspurð segist Bjarney vera mikill dýravinur, kaffiunnandi og ævintýrakona. Hún þrífst á sköpun og hefur mikinn áhuga á andlegum þroska, heilsu og vellíðan. Hún starfar sem grafískur hönnuður og vefhönnuður og er jóga- og núvitundarkennari og rekur Jógastúdíó í miðbæ Reykjavíkur. Hún fór til Krítar með það markmið að einbeita sér að hönnun og bæta við þekkinguna á því sviði. „Það getur verið hollt að skipta um umhverfi til að fá innblástur og ég ákvað að taka mér smá frí frá jógakennslunni og verja sumrinu á Krít. Ég bjó mér því til mitt eigið listamannaleyfi og hélt út. Plönin mín breyttust auðvitað þegar ég fékk hvolpana til mín og þurfti að afla mér allra upplýsinga um hvernig átti að ala upp hunda,“ segir Bjarney í samtali við Skessuhorn. Fljótlega fór allur hennar tími í að hugsa um hvolpana. „Ég hef sannarlega bætt við mig þekkingu, en bara á öðrum sviðum en ég bjóst við,“ segir hún brosandi.

Farnir að taka sitt pláss

Eins og fyrr segir tók Bjarney við hvolpunum af pari sem fann þá á ferðalagi um Krít. „Þegar símtalið kom hugsaði ég mig ekki tvisvar um, enda var ég með auka herbergi og stórar svalir. Hversu erfitt gæti það verið að sjá um fimm litla hvolpa? Það er auðvitað fátt sætara en hvolpar og auðvitað fönguðu þeir hjarta mitt strax á fyrsta degi,“ segir Bjarney. Hvolparnir eru fjórar tíkur og einn rakki og voru þau rétt um sex vikna þegar Bjarney fékk þau. Parið sem fann þau hafði þá gefið þeim nöfnin Kala, Kissi, Funi, Chania og Balos eftir fallegum stöðum á Krít sem þau höfðu heimsótt. Hvolparnir eru núna orðnir sex og hálfs mánaða. „Þau taka sitt pláss, borða mikið og stækka ört. Þau eru Labrador blendingar og því ansi stórir og stæltir hundar,“ segir Bjarney.

Ætlar sjálf að halda Kissi

Þegar hvolparnir fundust voru þeir svo ungir að þeir hefðu þurft að vera lengur hjá móður sinni. Bjarney gekk þeim því í móðurstað. „Ég þurfti að ormahreinsa þá, kaupa gott heilsusamlegt fóður og vítamín og gefa þeim öryggi og hlýju,“ segir Bjarney. Hún segir það hafa gengið vel að ala hvolpana upp. „Ég lá yfir hundamyndböndum á Youtube og las greinar til að læra hratt hvernig best væri að ala upp hunda. Ég vissi ekki mikið þar sem ég hafði afar litla reynslu af hundum,“ segir hún. Aðspurð segist hún ekki ætla að eiga alla hundana sjálf þegar þau koma til Íslands. „Hún Kissi verður hjá mér. Hún er sú minnsta í hópnum en sú ákveðnasta og forvitnasta. Hún valdi mig sjálf og ég ákvað snemma að ég myndi halda henni. Allir hinir eru komnir með góð heimili á Íslandi,“ segir Bjarney. En af hverju að flytja þau öll til Íslands fremur en að finna heimili fyrir þau á Krít? „Það hvarlaði aldrei að mér að skilja þá eftir hér á Krít, aðallega vegna þess sem ég hef orðið vitni að hér hvað varðar meðferð á dýrum. Dýravelferð hér er komin afar stutt,“ segir hún. „Það er erfitt að finna fólk sem vill taka að sér dýr og víða sjást hundar bundnir í stuttri keðju allan liðlangan daginn í sjóðandi hita. Það liggja fyrir vísindalegar sannanir fyrir því að dýr eru viðkvæmar verur og upplifa tilfinningar. Þau hafa getu til að njóta lífsins sem og þjást tilfinninganlega. Virðing fyrir dýrum í heiminum er nú mikilvægari en nokkru sinni fyrr og leiðir til meiri samkenndar í samfélaginu. Við gleymum oft að allt líf á jörðinni er samtvinnað; dýr, menn og náttúra.“

Hóf söfnun á Karolina Fund

Að flytja hunda til Íslands er flókið og erfitt ferli sem kostar auk þess sitt. „Eins og margir vita er ferlið við að ferðast með dýr til Íslands mjög kostnaðarsamt og flókið. Þeir þurfa að vera orðnir sjö mánaða áður en þeir ferðast, og það er aðal ástæðan fyrir því að við erum ennþá hér á Krít,“ segir Bjarney. Þegar hundarnir svo koma til Íslands tekur við fjögurra vikna einangrun sem kostar um 250 þúsund fyrir hvern hund. „Samtals er kostnaðurinn við að flytja einn hund til Íslands um hálf milljón króna,“ segir Bjarney. Hún hefur því leitað eftir aðstoð með söfnun í gegnum Karolina Fund til að koma hundunum til Íslands. Auk þess sem hún hefur gefið út myndskreytta bók með sögum af hundunum sem hún ætlar að selja. „Á Karolina Fund getur fólk lagt til fjárhæð að eigin vali og fengið í staðinn mörg frábær verðlaun. Þar er meðal annars í boði myndskreytta bókin, kort í jóga, grafísk hönnun og vefsíðugerð og svo eru frábærir listamenn að gefa vinnuna sína,“ segir Bjarney. Söfnunin hefur gengið vel og segist Bjarney hafa fundið mikinn stuðning, bæði fjárhagslegan og í formi fallegra og hvetjandi skilaboða. „Þetta er há upphæð sem við þurftum að safna og við eigum ennþá nokkuð í land, en ég hef fulla trú á að þetta takist. Karolina Fund er allt eða ekkert vettvangur og því gerum við allt til að láta þetta takast,“ segir hún og bætir því við að hún sé mjög þakklát öllum þeim sem hafa stutt hana með fjárframlögum og með því að deila söfnuninni á samfélagmiðlum. „Öll hjálp er innilega vel þegin þar sem margt smátt gerir eitt stórt,“ segir hún.

Bók um hundana

Myndskreyttu bókina sem Bjarney er að selja sem hluta af söfnuninni hefur hún unnið ásamt manninum sínum José, en þau vinna bæði við skapandi greinar. Ætlunin er að gefa bókina út í apríl á næsta ári og mun helmingur ágóðans renna til Dýrahjálpar. „Þegar við byrjuðum að kynnast persónuleika hvers hvolps fyrir sig sáum við snemma að hver hundur kom með sinn einstaka karakter. Við sjáum þessi einkenni sem ofurkrafta hvers og eins og það veitti okkur innblástur við að skrifa um ævintýri þeirra og skapa myndskreyttar sögur, sem ætlaðar eru fólki á öllum aldri. Bókin, með hundunum fimm sem söguhetjum, mun verða bók um stóru spurningar lífsins, hindranir og hvernig við yfirstíum þær; vinsemd, vinskap, visku og kærleik. Við notum okkar eigin persónulegu reynslu og gildi, þekkingu á núvitund, heimspeki og kunnáttu okkar sem hönnuðir og myndskreytar til að myndskreyta bókna og setja hana upp til prentunar,“ segir Bjarney.

Þeir sem vilja leggja Bjarneyju og hundunum lið geta fundið „Hin Frábæru Fimm“ á Karolina Fund á slóðinni: https://www.karolinafund.com/project/view/2639. Þá er hægt að fylgjast með þeim á Facebook undir heitinu The Fabulous Five.

Líkar þetta

Fleiri fréttir

Bland í poka pokinn tæmdur

Myndlistarkonan Tinna Rós Þorsteinsdóttir, sem gengur undir listamannsnafninu Tinna Royal var bæjarlistamaður Akraness árið 2020. Hún var að ljúka sýningu... Lesa meira

Hvaðan kemur Regnbogafáninn?

Árið 1978 hannaði og saumaði San Francisco-búinn Gilbert Baker fána með röndum regnbogans. Litirnir áttu að tákna samfélag samkynhneigðra. Á... Lesa meira