Hollt og gott hrökkkex
Hér er uppskrift að lágkolvetna hrökkkexi. Kexið er meinhollt og ótrúlega bragðgott. Það er gott að grípa í hrökkkex með góðum ostum, túnfisksalati eða öðru áleggi og þá er ekki slæmt ef kexið er í hollari kantinum. Þetta kex er bæði sykur- og hveitilaust og fullt af hollum og góðum fræjum. Einfalt er að útbúa kexið en það má búast við því að það klárist fljótt, enda frábært sem millimál eða til að nota í staðinn fyrir hefðbundið brauð.
Innihald:
2 egg
2 dl rifinn ostur
1 dl kotasæla
½ tsk. salt
½ tsk. lyftiduft
3 dl sesamfræ
1 dl hörfræ
Úr þessari uppskrift fást um 20 stk.
Aðferð: Byrjið á því að stilla ofninn á 180°C. Blandið því næst öllu innihaldinu saman og fletjið það út á eina bökunarplötu. Stingið plötunni inn í ofninn og bakið í 20 mínútur. Skerið kexið í bita um leið og það er tekið út úr ofninum.
