Framleiða sjálf rafmagnið á heimilisbílinn
Hjónin í Belgsholti í Melasveit létu á síðasta ári verða af því, sem þau hafa lengi verið að spá í, að kaupa sér rafmagnsbíl. Keyptu þau bíl af gerðinni Nissan Leaf. Þau Haraldur Magnússon og Sigrún Sólmundardóttir í Belgsholti hafa það fram yfir almenna eigendur rafbíla á Íslandi að þau framleiða sjálf orkuna á bílinn með vindmyllunni sem þar er og var tekin í notkun fyrir nokkrum misserum. „Þetta var spennandi kostur fyrir okkur alveg frá því við tókum vindmylluna í notkun. Bíllinn er hugsaður í styttri ferðir hjá okkur, í snatt fyrir búið og mest mun hann nýtast fyrir mig til og frá vinnu. Við notum svo jeppann í lengri ferðir,“ segir Sigrún, en hún starfar einnig á dvalarheimilinu Brákarhlíð í Borgarnesi.
