adsendar-greinar Mannlíf

Vita-tónlist Hlyns Ben og ákall til þjóðarinnar

Tónlistarmaðurinn Hlynur Ben hefur sett af stað hópfjármögnun fyrir útgáfu á nýrri sólóplötu. Hún mun kallast II ÚLFAR og verður þetta sú þriðja sem Hlynur sendir frá sér í eigin nafni. Hann hefur marga fjöruna sopið í tónlistinni og meðal annars spilað með hljómsveitum eins og Gleðisveit Ingólfs, Rufuz, Mono og Búálfunum. En þekktastur er hann þó sem skemmtikraftur og trúbador. Síðasta plata Hlyns, Leiðin heim, kom út árið 2014 og gerði lukku. Ekki síst lögin Hrópum, Vaknaðu, Það er allt í lagi og Kaldur bæði og sár sem hljómuðu mikið á öldum ljósvakans.

„Tónlistarlandslagið hefur breyst mikið, ekki síst það sem snýr að útgáfu,“ segir Hlynur sem segir það hafa verið stærstu ástæða þess að hann fór þessa leið til að fjármagna nýju plötuna. „Þetta er mjög skemmtilegt viðskiptamódel. Ég set upp visst takmark sem ég þarf að ná fjárhagslega svo mögulegt sé að standa straum af upptökum og útgáfunni sjálfri. Ef takmarkið næst ekki þá fær fólk endurgreitt um leið og söfnun líkur. En ef það næst þá fær það plötuna senda um leið og hún kemur út.“ Á þar til gerðri heimasíðu er hægt að velja mismunandi pakka sem innihalda allt frá geisladiskum yfir í tónleikamiða og aukaefni. Meira að segja er aukageisladiskur sem Hlynur tók upp í Akranesvita.

Óáreittur í vitanum á Breið

„Það er ótrúlegur hljómburður í vitanum á Akranesi og Hilmar Sigvaldason vitavörður var svo vænn að leyfa mér að eyða heilli kvöldstund þar algjörlega óáreittur. Fyrst ætlaði ég bara að taka upp söngtöku fyrir eitt lagið á nýju plötunni en áður en yfir lauk var ég búinn að taka upp heila plötu,“ segir Hlynur. Vita-platan inniheldur nokkur eldri lög í nýjum útsetningum, nokkur sem verða á II ÚLFAR og nokkur sem verða eingöngu á þessari aukaplötu.

Hlynur segir að II ÚLFAR verði örlítið afturhvarf til unglingsáranna, þegar rokkið átti hug hans allan. „Já, þetta er eiginlega platan sem mig dreymdi um að búa til þegar ég var 17 ára gamall. Nú 20 árum síðar hef ég loksins öðlast næga reynslu til að klára hana og langar því að gefa sjálfum mér plötuna í 37 ára afmælisgjöf.“ En á tímum sem flestir streyma tónlist og listamennirnir sjálfir sjá lítið af hagnaðinum sem rennur til streymisveitna þá verða hópfjármagnanir sífellt algengari. Það er því auðvelt að týnast í flórunni og menn brydda upp á ýmsu til að vekja á sér athygli svo takmarkið náist.

Hlynur hefur brugið á það ráð að senda út yfirlýsingu á Facebook-síðu sinni, þar sem hann ávarpar þjóðina og hvetur til samstöðu. Sjón er sögu ríkari.

www.facebook.com/hlynurben/videos/174149536870443

Líkar þetta

Fleiri fréttir

Ég er kominn til Afríku!

Mér líður eins og spóa, fyrir utan að það var líklegast mun auðveldara fyrir mig að fljúga með flugvél suður... Lesa meira

Sýnum karakter!

Ungmennafélag Íslands gaf nýverið út sinn fyrsta hlaðvarpsþátt, Sýnum karakter. Um er að ræða verkefni á vegum Íþrótta- og Ólympíusamband... Lesa meira