medium

large

thumbnail

1536x1536

small

custom-size

Skallagrímur úr leik eftir tap gegn Þór

Stefán Bjarki Akranesmeistari í pílu 2024

2048x2048

Vegaskemmdir eftir asahláku á laugardaginn

Fengu gull á vorbikarmótaröð í hnefaleikum

Lúðrasveit lék fyrir Borgnesinga

Skagamenn í öðru sæti eftir stórsigur á Fylki

Skagamærin Lára Magnúsdóttir, eða Lolly Magg eins og hún er stundum kölluð, fer ótroðnar slóðir og reynir fyrir sér sem uppistandari. Lolly fer einu sinni til tvisvar í viku til Reykjavíkur og er með uppistand á ensku fyrir ferðamenn og Íslendinga. „Ég skráði mig í uppistand fyrir algjöra slysni. Vinur minn sem var með mér í leiklistinni var búinn að skrá sig í uppistand og spurði hvort ég vildi ekki skrá mig líka. Við áttum þetta samtal á einu bjórkvöldinu í Kvikmyndaskólanum þar sem við stunduðum nám við leiklist. Ég var þá búin með nokkra bjóra og svaraði auðvitað játandi eins og maður gerir stundum við slíkar aðstæður og skráði mig,“ segir Lolly og hlær. „Daginn eftir áttaði ég mig svo betur á í hvað ég hefði komið mér og fór um leið að skrifa niður efni til að grínast með. Ég nýtti mér skrítna og skemmtilega karaktera úr fjölskyldunni minni ásamt góðum sögum til að nota í uppistandinu, æfði þetta sjúklega vel, lagði allt á minnið og stillti öllu saman upp eins og um einræðu í leikriti væri að ræða. Ég fór því vel undirbúin á mitt fyrsta uppistand, fékk meira að segja hlátur! Það gekk rosalega vel. Það var þá sem ég uppgötvaði að þetta væri eitthvað sem ég gæti gert, en það hafði aldrei hvarflað að mér fyrr en þarna.“
Bakgrunnur í leiklist
Lolly býr á Skaganum ásamt kærasta sínum og eins og hálfs árs syni þeirra. Hún ólst upp í Bolungarvík en flutti þaðan á Akranes um 12 ára aldurinn. Þar kláraði hún grunnskólann ásamt einu ári við Fjölbrautaskóla Vesturlands en flutti þvínæst til Reykjavíkur þar sem hún kláraði stúdentinn af leikarabraut Fjölbrautaskólans í Garðabæ. Því næst flutti Lolly til Danmerkur þar sem hún nam leiklist í eitt ár í Kaupmannahöfn. Eftir árið þar kom Lolly aftur heim til Íslands og kláraði leiklistarnámið við Kvikmyndaskólann í Reykjavík og flutti svo aftur á Akranes í kjölfarið. „Leiklistin er góður bakgrunnur fyrir uppistandara. Það hefur reynst mér vel þegar ég stend fyrir framan fullan sal af fólki og fer með grín í aðstæðum sem vilja oft vera stressandi. Ég hugsa samt sem áður að ég myndi verða ansi stressuð ef ég væri að fara með fyrirlestur um alvarleg málefni. Mér líður mun betur að grínast,“ segir Lolly brosandi.
Lét vaða
„Markmiðið hverju sinni sem uppistandari er að fá hlátur úr salnum og þegar maður fær hláturinn þá langar manni að halda áfram.“ Eftir fyrsta giggið sitt dýfði Lolly rétt svo tánum í þennan heim en tók aldrei stökkið út í djúpu laugina. Á þessum tíma voru önnur verkefni fyrirferðarmeiri og sat því uppistandið á hakanum í einhvern tíma. Það var ekki fyrr en snemma á þessu ári að Lolly ákvað að prófa þetta af meiri alvöru. „Ég setti mér markmið að láta vaða. Ég færði allt efnið mitt yfir á ensku, kem fram á ensku og hef verið að þróa efnið mitt áfram svoleiðis.“
Eins og fyrr kom fram þá grípur Lolly hvert tækifæri sem býðst til að vera með uppistand og reynir að fara tvisvar í viku til Reykjavíkur, annars vegar á Gaukinn á mánudagskvöldum og Secret Cellar við Lækjargötu á miðvikudagskvöldum. Lolly heldur einnig reglulega uppistand á Skaganum fyrir heimamenn. Hún ásamt Ársæli Rafni Erlingssyni og Lovísu Láru Halldórsdóttur sameinuðu krafta sínu og stofnuðu fjöllistahóp undir nafninu Pöbba-Rödd til að búa til vettvang fyrir grínista og listafólk að koma fram fyrir framan áhorfendur.
„Ég var pínu smeyk við Akranes í fyrstu. Þetta er lítið samfélag og maður er alltaf pínu hræddur um að fólk dæmi mann. Hingað til hefur gengið virkilega vel að skemmta Skagamönnum,“ segir Lolly sem að hélt uppistand hjá Skagaleikflokknum fyrir ekki svo löngu þar sem fullt var út úr dyrum.
Mikilvægt að æfa sig
Allt efni sem Lolly hefur tekið saman fyrir uppistandið sitt æfir hún vel. „Það er gott að æfa sig aftur og aftur, þannig verður maður öruggari og öruggari með allt og betur í stakk búinn þegar eitthvað kemur uppá í uppistandinu sjálfu. Það geta verið einhver læti í salnum, einhverjir að koma eða fara. Það getur jafnvel einhver dottið, þá verð ég að geta sýnt viðbrögð og farið örstutt frá efninu, gert athugasemd við það sem gerðist ef það á við, og komið svo til baka þar sem frá var horfið. Þetta get ég bara gert því ég hef þaulæft efnið mitt og þarf síður að ríghalda í það og get komið fram mun afslappaðri þannig að mér og áhorfendum líði vel.“
Lolly nýtir að auki hvert tækifæri til æfinga. Hún starfaði til að mynda sem leiðsögumaður í norðurljósaferðum í vetur og þurfti oft að hafa ofan af fyrir ferðalöngum og tala um eitthvað sniðugt þegar norðurljósin létu ekki sjá sig. Þá greip hún oftar en ekki í efnið sem hún hefur nýtt sér í uppistandið sitt við góðar undirtektir norðurljósagesta.
Hvað er fyndið í dag?
Hægt er að finna efni til að grínast með allstaðar og segist Lolly stöðugt vera að punkta niður hjá sér efni sem hún gæti mögulega notað og gert grín að. „Það fer mikið eftir áhorfendum og tilfinningunni í salnum hvað ég grínast með hverju sinni. Ég kann djókana mína það vel að það er ekkert mál fyrir mig að endurraða þeim. Ég tala til dæmis mikið um ákveðnar týpur á bar og reyni að vera eins ósexý og ég get þegar ég tala um að vera sexý. Flestir geta tengt við það sem ég er að grínast með,“ útskýrir hún.
Þegar Lolly var unglingur þá fannst henni mikilvægara að líta vel út heldur en að hafa sterkan persónuleika. „Ég þroskaðist, fékk meira sjálfstraust. Það var leiklistin sem hjálpaði mér að rífa upp sjálfstraustið. Maður þarf virkilega að kíkja innávið og kynnast sjálfum sér. Það er hægara sagt en gert. Með því að vera fullkomlega sáttur í eigin skinni getur maður haft húmor fyrir sjálfum sér. Fólk sér nefnilega í gegnum tilgerð strax og tilgerð í uppistandi er aldrei að fara að virka til lengri tíma,“ segir hún að endingu.
Hægt er að fylgjast með hvað Lolly Magg er að bralla og hvar hún er að koma fram á næstunni á Facbook undir Lolly Magg.

Uppgötvaði að þetta væri eitthvað sem hún gæti gert