adsendar-greinar Mannlíf

Sumarið í sveitinni er tilvalin bók í fjölskylduferðalagið

Sumarið í sveitinni er ný bók eftir þau Guðjón Ragnar Jónasson og Hörpu Rún Kristjánsdóttur. Í bókinni eru fjölmargar spurningar og svör sem tengjast lífinu í sveitum landsins. Veit fólk til dæmis hvaða starfi kúarektorar gegna? Eða hver er metfjöldi fæddra grísa í einu goti í Húsdýragarðinum? Eða hvað það þýðir eiginlega að marka lömbin? Svörin við þessu og mörgu fleiru er að finna í bókinni, sem er tilvalinn ferðafélagi þegar landsmenn fara í fjölskylduferðir um landið sitt.

Þá eru í bókinni ýmsir fróðleiksmolar um fræg dýr og frækin, Fjalla-Bensa og samfélagsmiðlahrútinn Lilla, svo eitthvað sé nefnt. Einnig má finna teikningar af ýmsum þjóðsagnaskepnum, sem margar eru í ætt við íslensku dýrin, og ráðleggingar um hvernig skuli bregðast við ef fólk rekst á þær!

Það er Jón Ágúst Pálmason sem myndskreytir bókina og gefa myndirnar henni fjölbreyttan og lifandi blæ. Sumar þeirra eru sérstaklega hugsaðar fyrir unga lesendur til að lita og eru þeir hvattir til að kynna sér búfjárlitina og hafa vökult auga með mislitum skepnum sem sjá má í sveitinni. Það er bókaútgáfan Veröld sem gefur bókina út.

Líkar þetta

Fleiri fréttir