medium

large

thumbnail

1536x1536

2048x2048

small

custom-size

Viðunandi útkoma Dalabyggðar á síðasta ári

Óbyggðanefnd framlengir frest vegna eyja og skerja

Fjölbrautaskóli Snæfellinga 20 ára

Styrktartónleikar í Borgarneskirkju

Hoppað á og hoppað út á Snæfellsnesi

Byggðasafnið í Görðum lokað næstu tvær helgar

Hljómsveitin Stuðlabandið er ein vinsælasta ballhljómsveit Íslands en meðlimir hennar hafa nýverið keyrt allt um koll með ábreiðu sinni af laginu Í larí lei. Sigga Beinteins gerði lagið fyrst vinsælt hér á landi en lagið kom út á barnaplötunni Flikk-Flakk árið 1998. Lagið er þó frá Brasilíu og brasilíska tónlistarkonan XUXA er upphaflegur flytjandi lagsins. Lagið nýtur greinilega ennþá mikilla vinsælda í Brasilíu en XUXA deildi útgáfu Stuðlabandsins sjálf á Instagram-reikningi sínum sem hefur opnað glugga upp á gátt fyrir hljómsveitarmeðlimi Stuðlabandsins á Suður-Amerískum markaði. Stuðlabandið virðist nú eiga möguleika á miklum vinsældum í Brasilíu en meðlimir bandsins segjast ekki hafa undan að svara skilaboðum frá brasilískum aðdáendum ásamt því að sjónvarps- og útvarpsstöðvar þar í landi hafa haft samband við hljómsveitina. Borgnesingurinn Birgir Þórisson hefur verið hljómborðsleikari Stuðlabandsins í rúmt ár en hann er einnig aðstoðarskólastjóri Tónlistarskóla Akraness. Skessuhorn sló á þráðinn til Birgis og fékk að forvitnast um tilurð þessara óvæntu vinsælda og næstu skref hljómsveitarinnar.
Rolling Stones birti umfjöllun um Stuðlabandið
Hvernig kom það til að þið byrjuðuð að spila þetta lag? ,,Þetta er Siggu Beinteinsdóttur að þakka og Söngvaborgarteyminu sem upphaflega gaf út lagið. Stjórnin hefur svo stundum verið að taka þetta á böllum við mikinn fögnuð. Við höfum spilað með Stjórninni nokkrum sinnum og fundist þetta lag mjög skemmtilegt svo við gerðum svona okkar útgáfu og höfum verið að spila lagið í smá tíma núna. Bandið hefur verið ágætlega duglegt að gefa út efni en orkan á Kótelettunni þegar við tókum þetta lag var svo gjörsamlega mögnuð að við ákváðum að gefa þá upptöku út og þetta fór bara á flug. Þegar myndbandið er búið að vera inni í sirka tvær vikur deilir XUXA þessu á Instagram-síðu sinni. XUXA er súperstjarna og þjóðargersemi í Brasilíu. Hún var barnastjarna og hefur greinilega verið að gefa út efni fyrir börn í gegnum tíðina en hún er með yfir tólf milljónir fylgjenda á miðlinum sínum. Í framhaldinu byrja miðlar úti að pikka þetta upp og það er greinilega nostalgíufílingur í Brasilíu eins og hérna heima á Íslandi. Þetta er búið að vera alveg stórkostlegt! Við fórum t.d. í viðtal hjá brasilískri Youtube stjörnu rétt áður en við fórum á svið um síðustu helgi á hátíðinni Sumar á Selfossi. Brasilískir miðlar hafa verið að hafa samband og t.d. hefur okkur verið boðið að koma fram í einhverjum þáttum þarna úti. Svo hafa CNN í Chile, Rolling Stones og C1 News í Brasilíu, sem er svona eins og BBC fyrir Bretland, fjallað um málið. Þannig að þetta er mjög súrrealískt og ekkert smá skemmtilegt,“ segir Birgir um þetta mikla ævintýri.
Lagið hefur fengið fimmtán milljónir spilanana
Lagið hefur fengið samanlagt um fimmtán milljónir spilana á streymisveitum en Birgir segir ótrúlegt að verða vitni að kröftum samfélagsmiðla og fallegt að sjá Brasilíu og Ísland speglast í barnæskunostalgíu beggja þjóða. XUXA er kölluð Drottning þeirra stuttu í heimalandi sínu, hún er ein þekktasta barnastjarna landsins en er í dag 59 ára. Stuðlabandið hefur haft mikið að gera í sumar og segir Birgir hljómsveitarmeðlimi hlakka til að spila meira og mögulega gefa út meira efni. ,,Við erum búnir að vera ágætlega duglegir að gefa út efni en mættum eflaust gera ennþá meira af því, það er svo aldrei að vita nema nýtt lag birtist með haustinu,“ segir Birgir. Blaðamanni liggur forvitni á að vita hvar ballhljómsveit fær orku og úthald í að spila í marga klukkutíma í senn. ,,Ég held að lengsta sem við höfum spilað samfleytt hafi verið um fjórar og hálf klukkustund. Þegar fólkið er gott er stemningin góð og þá er auðvelt að viðhalda orkustigi hljómsveitarinnar og mannfjöldans. Þetta er auðvitað líka þjálfun en okkur hefur t.d. fundist betra að taka ekki pásur, frekar spila linnulaust þá dettur orkustigið aldrei niður og allir fara glaðir heim,“ segir Birgir.
Að spila á Rock in Rio eða kaffihúsi
Birgi finnst gaman að sjá hvað vinsældir lagsins úti gera Brasilíumenn stolta. Meðal annars hefur komið til tals að Stuðlabandið spili á hátíðinni Rock in Rio sem er ein af stærstu tónlistarhátíðum heims. ,,Það væri alveg draumurinn að koma fram á Rock in Rio og algjör hápunktur fyrir hljómsveitina, ég hugsa að við myndum alveg gera það ef það myndi bjóðast. Ég yrði reyndar upprifinn að fara til Brasilíu og spila þó það væri ekki nema á kaffihúsi. Mér finnst svo gaman að sjá hvað vinsældir lagsins á Íslandi virðast gera Brasilíumenn stolta og þjóðirnar greinilega báðar miklar nostalgíuþjóðir. Ég vil bara koma á framfæri þakklæti fyrir gríðarlega góðar viðtökur og við hlökkum til að spila meira á Vesturlandi,“ segir Birgir að lokum.
&nbsp;
Sjá má myndbandið sem um ræðir hér að neðan.
&nbsp;
<div class="video-wrapper">
<div class="iframe-wrapper"><iframe title="Stuðlabandið - Í larí lei | Ilariê - XUXA live band cover 🇧🇷" width="900" height="506" src="https://www.youtube.com/embed/MMoNSZLRX6c?feature=oembed" frameborder="0" allow="accelerometer; autoplay; clipboard-write; encrypted-media; gyroscope; picture-in-picture" allowfullscreen></iframe></div>
</div>
&nbsp;
&nbsp;
&nbsp;
&nbsp;

Í larí lei heltekur Ísland og Brasilíu