Körfuknattleiksdeild ÍA hefur samið við bandaríska körfuknattleiksmanninn Allen Flanigan um að leika með liðinu út yfirstandandi keppnistímabil. Flanigan er þegar kominn til landsins og hefur tekið þátt í tveimur æfingum með Skagamönnum. Vonir standa til að hann verði orðinn leikfær fyrir heimaleik ÍA gegn Fjölni á föstudaginn, en enn er beðið eftir atvinnuleyfi hans.

Flanigan er 198 sentímetrar á hæð og getur bæði leikið sem bakvörður og framherji. Hann á að baki öflugan feril í bandaríska háskólakörfuboltanum, þar sem hann lék með Auburn Tigers í hinni sterku SEC-deild á árunum 2019–2023. Á þeim tíma var Auburn meðal fremstu háskólaliða Bandaríkjanna og komst meðal annars í efsta sæti landslistans tímabilið 2021–2022, auk þess að verða SEC-deildarmeistari.

Varnarstyrkur réði miklu um leikmannaskiptin

Flanigan kemur í stað Bandaríkjamannsins Marcus Tsohonis, sem ÍA rifti nýverið samningi við. Birkir, formaður körfuknattleiksfélags ÍA, segir í samtali við Skessuhorn að þrátt fyrir ágæta tölfræði hafi Tsohonis ekki staðið undir þeim væntingum sem til hans voru gerðar. „Við bundum miklar vonir við hann þegar hann kom. Hann var mjög góður drengur og tölfræðin hjá honum var fín, en varnarleikurinn var helsti veikleikinn. Vörnin er helmingurinn af körfuboltanum og við vorum að lenda í vandræðum þar,“ segir Birkir.

Hann segir að þess vegna hafi verið ákveðið að gera breytingar á leikmannahópnum og leita að leikmanni sem gæti styrkt varnarleik liðsins. Þar hafi Flanigan þótt áhugaverður kostur, enda þekktur fyrir mikinn líkamlegan styrk og góðan varnarleik.

Spenntir að sjá hann í ÍA-treyjunni

Birkir segir Flanigan hafa alla burði til að verða öflugur liðsmaður ÍA. Hann hafi náð góðum árangri í bandaríska háskólaboltanum en meiðsli fyrir nokkrum árum hafi sett strik í reikninginn á ferli hans. „Hann hefur mjög góðan bakgrunn og ég held að honum hafi verið ætlað stærra hlutverk í körfuboltanum en hann hefur fengið hingað til. Kannski vantar hann bara gott tækifæri til að koma sér almennilega í gang,“ segir Birkir.

Fyrstu kynni af nýja leikmanninum lofi góðu. „Hann er stór og sterkur og hefur komið mjög vel út úr fyrstu tveimur æfingunum. Við erum mjög spenntir að sjá hann á gólfinu,“ segir Birkir. Skagamenn vonast því til að Flanigan fái atvinnuleyfi í tæka tíð til að þreyta frumraun sína með ÍA gegn Fjölni á föstudaginn. Með komu hans er stefnan sett á að þétta varnarleikinn og styrkja liðið fyrir átökin fram undan.

ÍA sækir bandarískan varnarmann til að styrkja liðið