Rætt við Tomasz Luba sem kominn er aftur til Ólafsvíkur

Nýlega var Tomasz Luba ráðinn yfirþjálfari knattspyrnunnar hjá Víkingi Ólafsvík. Hann var leikmaður Víkings í átta ár og eftir að hann hætti að spila með liðinu tók hann að sér þjálfun yngri flokka í tvö ár. Fréttaritari Skessuhorns tók Tomasz tali og spurði hann hvað varð til að hann ákvað upphaflega að koma til Íslands? „Ég kom hingað til lands til þess að heimsækja vini mína og leist bara vel á landið og ákvað að leita mér að liði til þess að spila með, en ég hafði spilað fótbolta í Póllandi lengi,“ segir Tomasz á sinni góðu íslensku. „Ég fór svo að spila með Reyni í Sandgerði og átti þar gott tímabil og var valinn besti leikmaður liðsins það ár. Síðan hafði Ejub, sem þá var þjálfari Víkings, samband við mig og árið eftir fór ég að spila ég með Víkingi og tímabilin áttu eftir að verða átta.“

Eftir þessi ár í Ólafsvík flutti Tomasz ásamt fjölskylda sinni til Selfoss. „Þar fór ég að þjálfa yngri flokka auk þess að þjálfa meistaraflokk Árborgar.“ Aðspurður um hvort hann verði með breytingar í sambandi með æfingar og á liði Víkings segir Tomasz að með nýjum þjálfara verði alltaf einhverjar breytingar. „En ég legg mikið upp úr aga og skipulagi, til dæmis verða æfingar lengri, eða í 90 mínútur, og ég vil að allir taki vel á því á æfingum. Hef ég ákveðið að á öllum æfingum verði menn klæddir í bláa boli og vel klæddir og það þýðir ekkert að mæta í stígvélum og gallabuxur til æfinga,“ segir hann og brosir.

„En í meistaraflokki reynum við að halda sem flestum mönnum og bæta við okkur leikmönnum, en að sjálfsögðu mun ég skoða yngri heimaleikmenn en þá vantar meiri æfingu og eru ekki enn tilbúnir að spila með meistaraflokki. Ég mun skoða nokkra þeirra í vetur og fylgjast með framförum hjá þeim. En drengir sem eru fæddir árið 2009 vantar verkefni þar sem þeir eru of fáir til þess að stofna 2. flokk, en minn draumur er að rífa Reyni Hellissandi í gang og setja mikin metnað í það lið og leyfa þessum drengjum að spila í 5. deild til þess að fá reynslu og að sjálfsögðu mun ég fylgjast vel með þeim, því þeir hafa ekki enn spilað með fullorðnum mönnum. En framtíðin er björt ef rétt er haldið á spilunum,“ segir Tomasz og bætir við: „Við eigum marga efnilega leikmenn.“

Með nýjum þjálfara verða alltaf einhverjar breytingar

Rætt við Tomasz Luba sem kominn er aftur til Ólafsvíkur

Rætt við Tomasz Luba sem kominn er aftur til Ólafsvíkur