Stelpurnar í Grundarfirði eru aldeilis að byrja fyrstu deildina af krafti. Fimmtudaginn 18. september fóru þær til Hafnarfjarðar til að etja kappi við Blakfélag Hafnarfjarðar. Grundfirsku stelpurnar unnu allar hrinurnar; með 17-25, 20-25 og 23-25 og þar með leikinn 3-0.

Í gær tóku þær svo á móti Aftureldingar B í íþróttahúsinu í Grundarfirði. Heimakonur byrjuðu af krafti og sigruðu fyrstu hrinuna 25-19 og komust í 1-0. Önnur hrinan féll einnig í skaut Grundarfjarðarliðsins og lyktaði henni með 25-14 sigri heimakvenna og staðan því orðin 2-0. Gestirnir frá Mosfellsbæ mættu grimmar í þriðju hrinu og komust í 5-12 áður en lið Grundarfjarðar tók við sér. Jafnt og þétt minnkuðu heimkonur muninn þangað til þær jöfnuðu 18-18 og sigu svo framúr. Hrinunni lauk með 25-21 sigri Grundarfjarðar og því sigruðu þær leikinn 3-0.

Lið Grundarfjarðar hafa því spilað þrjá leiki og ekki ennþá tapað hrinu. Þær eru efstar í deildinni þegar þetta er skrifað en þess ber þó að geta að þær eru eina liðið sem hefur lokið þremur leikjum. Flest liðin eru einungis búin að spila einn leik og mótið rétt að hefjast. Næst tekur liðið á móti KA-U 12. október næstkomandi í íþróttahúsinu í Grundarfirði.

**Sigrinum fagnað eftir þriðju og síðustu hrinuna.**

Blaklið Grundarfjarðar er á siglingu