Rætt við knattspyrnumanninn Breka Þór Hermannsson sem spilar með Grindavík í sumar

Breki Þór Hermannsson er 22 ára Grundfirðingur sem hefur lagt mikið á sig í knattspyrnunni. Hann hóf feril sinn á heimavelli í Grundarfirði en flutti ungur á Akranes til að elta drauma sína. Í dag er hann á láni hjá Grindavík og hefur stór markmið fyrir framtíðina. Breki segir að uppvöxturinn í Grundarfirði hafi haft bæði kosti og galla fyrir knattspyrnuferilinn. „Það voru ekki margir í fótbolta í yngri flokkum, svo við fórum oft á æfingar í Ólafsvík þar sem fleiri voru að æfa,“ segir hann. Hann bendir á að minni samkeppni á Snæfellsnesi hafi tryggt honum meiri athygli frá þjálfurum en jafnframt skert tækifærin til að keppa við sterkari leikmenn. Þrátt fyrir þetta fengu hann og félagar hans tækifæri til að æfa mikið innanhúss á veturna, sem hefur ekki verið algengt annars staðar.

*Breki Þór í leik með Skagamönnum. Ljósm. Hulda Margrét.*

Raun verið að æfa fútsal

„Ég veit ekki hvar annars staðar er verið að æfa futsal á Íslandi,“ segir Breki, en innanhússfótbolti á parketi nefnist fútsal. Hann telur að þessi reynsla hafi veitt honum ákveðna tækni sem hefur hjálpað honum í leik sínum í dag. Fyrstu skrefin í fótboltanum voru tekin undir leiðsögn heimamanna í Grundarfirði. „Ég átti frábæra þjálfara sem höfðu mikinn áhuga á að hjálpa okkur að verða betri leikmenn, þó að aðstæður væru ekki alltaf fullkomnar,“ segir hann.

Breki og félagar þurftu oft að sækja æfingar í Ólafsvík þar sem fleiri voru að æfa. Þetta sýnir vel þá áskorun sem fylgir því að vera íþróttamaður í litlu samfélagi, en einnig þann metnað sem þarf til að ná árangri við slíkar aðstæður. Einn mikilvægasti áfangi í ferli Breka var þegar hann flutti frá Grundarfirði til Akraness til að spila með ÍA. Þetta var ekki aðeins stórt skref í fótboltanum heldur einnig í persónulegum þroska. „Þetta stökk var eitthvað það besta sem hefði getað komið fyrir mig,“ segir hann og bætir við: „Að flytja að heiman ungur og þurfa að hugsa um mig sjálfur, matarinnkaup, hugsa um þvottinn sjálfur, hugsa um svefninn sjálfur og allt svoleiðis.“

Breki tók þessa ákvörðun eftir eina önn í Fjölbrautaskóla Snæfellinga í Grundarfirði. Hann flutti fyrst inn til þjálfara síns í eitt sumar, sem var góður fjölskylduvinur, áður en foreldrar hans fluttu til Akraness í byrjun árs 2022. „Félagar mínir voru í smá sjokki, en mér fannst það ekkert skrítið þar sem hann var góður fjölskylduvinur,“ útskýrir hann. Hann segir að þessi dvöl hafi hjálpað honum að öðlast dýrmæta innsýn í faglega nálgun á íþróttinni.

*Breki Þór í sínum fyrsta leik með Grindavík. Ljósm. Grindavík á Facebook.*

Nýr knattspyrnukúltúr á Skaganum

Breki segir að munurinn á knattspyrnunni í Grundarfirði og Akranesi hafi verið mikill. „Á Skaganum voru miklu fleiri strákar að æfa og meiri gæði í leiknum,“ segir hann. Hann bætir við að það hafi verið tekið mjög vel á móti honum og hann hafi fljótt komist inn í hópinn. „Ég fann strax að það var meiri krafa á leikmenn að skila sínu og vera í góðu formi. Á Skaganum er mikil knattspyrnusaga og það skilar sér í menningunni í kringum liðið,“ bætir hann við. Hann lærði mikið af eldri leikmönnum liðsins, sem gáfu honum góð ráð um hvernig hann gæti bætt leik sinn og verið tilbúinn fyrir næsta skref í ferlinum. Áhugavert er að annar þjálfarinn hafði séð Breka spila með 3. flokki Snæfellsness og hafði þá þegar áhuga á að fá hann yfir á Skagann. Þetta sýnir að hæfileikar Breka voru greinilega að vekja athygli. Nú er Breki á lánssamningi hjá Grindavík og telur komandi sumar verða sitt mikilvægasta hingað til hvað varðar fótboltaferilinn.

„Ég fæ stórt hlutverk og traust frá þjálfaranum. Þetta er tækifæri sem ég ætla að nýta mér,“ segir hann. Eins og flestir íþróttamenn hefur Breki þurft að fórna ýmsu til að geta sinnt fótboltanum af fullum krafti. „Ég nefni þetta oft við vini mína sem eru ekki í fótbolta hvað maður er að fórna miklu á að vera í fótbolta,“ segir Breki. „Þeir kannski eru að spyrja hvort maður sé klár í að taka einhverja helgi saman í sumarbústað en maður kemst ekki út af því maður er á æfingu snemma á laugardegi og svo á sunnudegi eða leikur annað hvort á laugardegi eða sunnudegi. Þrátt fyrir fórnirnar er Breki skýr í afstöðu sinni: „Fótbolti er það skemmtilegasta sem ég geri og ég er tilbúinn að fórna þessu öllu fyrir hann.“

Er ekki atvinnumennska draumur allra?

Þegar Breki er spurður um markmið sín í fótboltanum, kemur í ljós að hann hefur sömu drauma og margir aðrir ungir knattspyrnumenn. „Er ekki draumur allra fótboltamanna að komast út í atvinnumennsku eða eitthvað í þá áttina,“ spyr hann. „Hvort sem það er bjartsýni eða ekki, þá er stefnan alltaf sett út og miðað við allan þennan tíma sem maður gefur í þetta þá væri svolítið tilgangslaust að stefna ekki alltaf hærra og meira.“ Breki telur að gott milliskref væri að komast í bestu deildina á Íslandi, sýna sig þar og sjá svo hvert það leiðir hann. Hann er þó líka raunsær og segist vera týpa sem leyfir lífinu að leiða sig áfram „Goes with the flow“ og reynir að spá sem minnst í framtíðina. Breki er bjartsýnn á tækifæri fyrir unga leikmenn á Íslandi og telur að þau séu næg fyrir þá sem vilja ná langt. „Það er hellingur af tækifærum á Íslandi að mínu mati hvort sem þú ert ungur eða gamall,“ segir hann.

„Fyrir mig þá átta ég mig á því meira og meira að maður er ekki langt frá því að fá þessi tækifæri. Þú þarft ekki nema eitt mjög gott tímabil til að komast á blað á Íslandi hjá toppliðunum.“ Hann nefnir dæmi um Birni Snæ Ingason sem fór út árið 2023 þótt hann væri ekki talinn sem ungur leikmaður, sem sýnir að aldur þarf ekki að vera hindrun.

Nýtt tækifæri í Grindavík

„Ég er virkilega sáttur með að fara á lán til Grindavíkur og tel þetta vera mikilvægasta sumarið mitt hingað til ef ég ætla mér að verða eitthvað meira en bara „average“ Lengjudeildar leikmaður á Íslandi,“ segir Breki af einlægni. Hann lítur á þetta sem tækifæri til að sanna sig, enda fær hann stórt hlutverk í liðinu og traust frá þjálfaranum. „Ég ætla bara að njóta í botn í sumar og reyna að sýna mig og taka næsta skref í rauninni bara,“ segir hann. Frá Grundafjarðarbæ til Akraness hefur Breki þegar tekið stór skref í átt að draumum sínum. Hann lítur björtum augum til framtíðar og veit að árangur næst ekki án fórna og vinnusemi. Með skýr markmið í huga og sterkan vilja til að ná langt, er ljóst að Breki Þór Hermannsson er leikmaður sem á framtíðina fyrir sér. Með jákvæðu hugarfari, vinnusemi og hæfileikum er framtíðin björt fyrir þennan unga og efnilega knattspyrnumann.

Baldvin Þór Hannesson nemandi í fjölmiðlun við HÍ skráði

Ungur Grundfirðingur með stóra drauma

Rætt við knattspyrnumanninn Breka Þór Hermannsson sem spilar með Grindavík í sumar

Rætt við knattspyrnumanninn Breka Þór Hermannsson sem spilar með Grindavík í sumar