Fjórða umferðin í 2. deild karla í knattspyrnu fór fram um helgina og Vesturlandsliðin Kári og Víkingur Ólafsvík voru í eldlínunni á laugardaginn. Víkingur spilaði á heimavelli á meðan Káramenn fóru norður.

Á Ólafsvíkurvelli mættust Víkingur og Ægir og úr varð markaleikur þar sem yfir hundrað áhorfendur skemmtu sér yfir fjörugum leik. Framherjinn Kwame Quee kom heimamönnum yfir strax á fyrstu mínútu þegar hann slapp inn fyrir vörn Ægis og afgreiddi boltann framhjá Andra Þór Grétarssyni í marki gestanna. Á 13. mínútu var staðan orðin 2-0 þegar Luis Romero Jorge slapp í gegn og skoraði ekki ósvipað mark og það fyrra nema að hann vippaði boltanum laglega yfir Andra Þór í þetta skiptið. Hvort að heimamenn héldu að þetta væri komið þá hægðist á þeim eftir þetta og þeir hleyptu gestunum inn í leikinn. Þeir nýttu sér það og minnkuðu muninn eftir hálftíma leik með marki frá Daníel Karli Þrastarsyni, staðan 2-1 í hálfleik fyrir þá bláklæddu og fjörið rétt að byrja.

Varamaðurinn Dimitrije Cokic sem kom inn á í hálfleik var snöggur til að jafna metin fyrir Ægi eftir um þriggja mínútna leik. Korteri síðar komust gestirnir yfir í leiknum og þar var að verki Jordan Adeyemo, staðan 2-3 og Víkingur í vondum málum. Ekki skánaði það því níu mínútum fyrir venjulegan leiktíma skoraði Jordan aftur og nánast gulltryggði sigur gestanna. Heimamenn urðu æfir og töldu að um rangstöðu hefði verið að ræða en dómaratríóið var ekki á sama máli og markið stóð. Á sjöundu mínútu í uppbótartíma breytti Ivan Lopez Cristobal stöðunni í 3-4 fyrir Víking með síðustu spyrnu leiksins en tíminn var of naumur og Ægir fagnaði sínum öðrum sigri í röð.

Lítið gengur hjá Kára

Kormákur/Hvöt tók á móti liði Kára á blautum Blönduósvelli og aðeins eitt mark leit dagsins ljós í leiknum. Það kom á 7. mínútu og var ansi klaufalegt hjá Káramönnum að fá það mark á sig. Kristján Hjörvar Sigurkarlsson í marki Kára var með boltann aftast fyrir utan vítateig og sendi hann á varnarmann Kára sem fékk pressu á sig. Hann ætlaði að senda knöttinn aftur á Kristján en hitti hann illa og Goran Potkozarac komst á milli og renndi boltanum í netið. Eftir markið færðu gestirnir sig framar á völlinn en þeir bleikklæddu lögðu alla áherzlu á vörnina það sem eftir lifði af hálfleiknum. Káramenn voru meira með boltann án þess að skapa sér nein mjög hættuleg færi og staðan 1-0 í hálfleik.

Í seinni hálfleik var þetta á svipuðum nótum, heimamenn höfðu góð tök á leiknum því þó leikmenn Kára væru meira með boltann voru þeir bitlausir fram á við og lítil hætta skapaðist við mark Kormáks/Hvatar. Varnarleikur þeirra var til fyrirmyndar og þeir gáfu engin færi á sér. Á þriðju mínútu í uppbótartíma fékk Kristinn Bjarni Andrason í liði heimamanna rautt spjald eftir gróft brot eftir að hafa stöðvað skyndisókn Kára og þar við sat. Þetta þýddi bara eitt, heimamenn fóru með 1-0 sigur af hólmi og komu sér upp í 6. sæti en Kári tapaði sínum þriðja leik í deildinni.

Staðan í deildinni er sú að Þróttur Vogum er í efsta sæti með tólf stig, Haukar eru í öðru sæti með tíu stig og KFA, Ægir og Grótta eru í 3-5. sæti með sjö stig. Í neðri hlutanum er Víkingur með fimm stig í 7. sæti, Dalvík/Reynir og Víðir eru í 8.-9. sæti með fjögur stig, Kári í því tíunda með þrjú stig og tvö neðstu liðin eru Höttur/Huginn og KFG með eitt stig.

Í næstu umferð fer Kári aftur norður og spilar við Dalvík/Reyni á fimmtudaginn klukkan 17.30 á Dalvíkurvelli. Víkingur spilar hins vegar gegn Kormáki/Hvöt á Ólafsvíkurvelli næsta laugardag og hefst leikurinn klukkan 14.

Naum töp hjá Kára og Víkingi