Fjórða umferð Lengjudeildar kvenna í knattspyrnu fór fram í gærkvöldi. Í Akraneshöllinni tók ÍA á móti liði Keflavíkur og fyrir viðureignina voru bæði lið með fjögur stig eftir þrjá leiki í 6.-7. sæti.

Leikurinn fór ágætlega af stað, liðin voru að þreifa fyrir sér en gekk illa að skapa sér færi. Fyrsta færi leiksins kom á 23. mínútu þegar Erla Karitas Jóhannesdóttir fékk sendingu inn fyrir vörn gestanna en fast skot hennar fór rétt yfir markið. Skömmu síðar fékk hin skeinuhætta Ariela Lewis boltann hægra megin við vítateig ÍA en skot hennar fór beint á Klil Keshwar sem var vel staðsett í markinu. Annars var mikið um miðjumoð og stöðubaráttu og liðin nánast jöfn að getu. Það kom því ekki á óvart og var líklegast sanngjarnt að staðan í hálfleik var jöfn, 0-0, eftir bragðdaufan fyrri hálfleik.

Það var ljóst að þjálfarar liðanna höfðu barið leikmönnum í brjóst í hálfleikshléinu því seinni hálfleikurinn bauð upp á miklu meiri tilþrif en sá fyrri. Þær gulklæddu komust yfir strax á þriðju mínútu í þeim seinni þegar Birgitta Lilja Sigurðardóttir fékk boltann hægra megin, hún sendi hann inn fyrir vörnina á Sunnu Rún Sigurðardóttur sem lagði knöttinn í netið. Vel gert hjá Sunnu Rún sem átti mjög góðan leik að þessu sinni og stuttu síðar átti hún gott skot sem fór yfir markið. Ariela fékk síðan ágætis færi á 54. mínútu en Klil varði vel skot hennar úr vítateignum. Baráttan hélt áfram og gestirnir voru oft skeinuhættar en þar var Ariela fremst í flokki sem ógnaði oft með sínum mikla hraða á kantinum. Markið lá í loftinu og það kom korteri fyrir leikslok og var af dýrari gerðinni. Hilda Rún Hafsteinsdóttir fékk þá boltann fyrir utan vítateiginn og skaut knettinum upp í samskeytin, óverjandi fyrir Klil sem sló þó boltann upp í þaknetið. Staðan 1-1 og í kjölfarið færðist enn meira fjör í leikinn og úr varð hin besta skemmtun. Skagakonur hertu tökin eftir því sem leið á og voru hættulegri í öllum sínum aðgerðum. Þær keflvísku fengu þó gott færi sjö mínútum fyrir leikslok en Klil, eins og oft áður í leiknum, náði að bjarga og Skagakonur hreinsuðu boltann frá marki. Mínútu fyrir leikslok fékk ÍA hornspyrnu og virtust hafa skorað sigurmarkið. Selma Dögg Þorsteinsdóttir skallaði þá boltann í markið en einhverra hluta vegna flaggaði aðstoðardómari leiksins vegna peysutogs og var markið dæmt af sem var mjög vafasamur dómur. Selma Dögg fékk síðan nákvæmlega eins færi í uppbótartíma en að þessu sinni fór skalli hennar yfir markið. Lokatölur 1-1 og svekkjandi úrslit fyrir Skagakonur sem hefðu átt skilið öll stigin þrjú.

Lengjudeildin er mjög jöfn og spennandi og til marks um það er að aðeins skilja sex stig liðin að í fyrsta og níunda sæti. Á toppnum eru ÍBV og HK með níu stig, Grindavík/Njarðvík og KR eru með sjö stig í 3.-4. sæti og Fylkir og Haukar eru þar á eftir með sex stig. Í neðri hlutanum eru Keflavík og ÍA með fimm stig í 7.-8. sæti, Grótta er í 9. sæti með þrjú stig og á botninum er Afturelding án stiga. Næsti leikur ÍA er á móti Gróttu næsta miðvikudag á Vivaldi vellinum á Seltjarnarnesi og hefst klukkan 19.15.

Svekkjandi jafntefli hjá Skagakonum