Reynir Hellissandi tók á móti liði Léttis í fyrstu umferð A riðils 5. deildar karla í knattspyrnu í gær og var viðureignin á Ólafsvíkurvelli. Það er óhætt að segja að það hafi verið létt yfir leikmönnum Léttis í leiknum en að sama skapi reyndi á lið Reynis því það rigndi yfir þá mörkunum í góða veðrinu sem var skrýtið.

Viktor Dagsson og Kristján heiti ég Ólafsson komu gestunum í 0-2 á 17. og 20. mínútu en Adam var ekki lengi í Paradís því Evu vantaði og Guðjón Sigurðsson minnkaði muninn í 1-2 mínútu síðar. Przemyslaw Lewandowski, bróðir Róberts, reimdi á sig markaskóna og kom Létti í 1-3 áður en Mikael Máni Hermannsson bætti því fjórða við skömmu fyrir hálfleik, staðan 1-4 og ekki enn komið fullt tungl.

Kristján sá heiti var kominn með þrennu eftir fjórar mínútur í þeim seinni og Torfi Már Markússon hitti á réttu torfuna þegar hann skoraði fimmta mark Léttis ekki löngu síðar og fór létt með. Hins vegar var veðrið svo gott að það voru engar síðar nærbuxur notaðar í leiknum heldur léttur efnislítill fatnaður sem var mikill léttir fyrir leikmenn og áhorfendur sem voru frekar léttir. Eins og sjö mörk væru ekki alveg nóg hjá einu liði í knattspyrnuleik þá var það alls ekki léttir að Breiðhyltingar bættu við tveimur mörkum undir lok leiksins. Fyrst skoraði Lewandowski sitt annað mark eins og hann á ættir til og sá sjóðheiti Stjáni skellti svo í fernu og fékk sér kalda mjólkurfernu eftir leik til að kæla sig niður og hrópaði hástöfum: Hættu að væla, komdu að kæla!

Lokatölur 1-9 í fyrsta leik og nú reynir á að Reynismenn reyni meira á sig og herði sig fyrir næsta leik sem verður næstkomandi sunnudag í villta vestrinu. Þar mætir Reynir liði Harðar frá Ísafirði á Kerecisvellinum og hefst bardaginn stundvíslega, ef klukkan verður rétt, á slaginu 14 að ísfirskum tíma.