Rætt við Brynjar Kristmundsson þjálfara Víkings Ó um komandi tímabil

Víkingur Ólafsvík varð í fjórða sæti í 2. deild karla í knattspyrnu á síðasta tímabili. Víkingur er á sínu fjórða ári í röð í 2. deild og þjálfari liðsins í sumar er Brynjar Kristmundsson eins og síðustu tvö árin þar á undan. Blaðamaður Skessuhorns heyrði hljóðið í Brynjari um tímabilið sem hófst á dögunum.

*Aron Gauti Kristjánsson aðstoðarþjálfari og Brynjar Kristmundsson.*

Margir tekið þvílíkt mörg skref fram á við

Hvernig gekk undirbúningstímabilið og var það með svipuðu móti og í fyrra? „Undirbúningstímabilið var alveg ágætt, við töpuðum illa fyrstu leikjunum í Lengjubikarnum en við erum svo sem ekki að horfa í úrslit leikja á þessum tíma þar sem við erum kannski með 10% af leikmannahópnum okkar á þessum tíma. Ég var vissulega mjög ósáttur með frammistöðuna í leiknum gegn Ými þar sem við erum 6-0 undir í hálfleik en það var eitthvað sem fer bara í reynslubankann hjá öllum, bæði hjá mér og þeim ungu leikmönnum sem tóku þátt í þeim leik. Staðan er því miður oftast svona hjá okkur á þessum tíma, fáir að æfa hér fyrir vestan og svo tínast menn hægt og rólega vestur þegar sumarið fer að nálgast. Í algjörum draumaheimi væri maður með alla leikmennina hér allan ársins hring eins og flest önnur lið hafa það en við reynum að gera eins gott úr þessu og mögulegt er. Við leggjum mikla áherslu á að styrkja okkar ungu stráka sem eru hjá okkur allt árið og hjálpa þeim að vera eins tilbúnir og mögulegt er þegar Íslandsmótið hefst. Margir af þessum strákum hafa tekið þvílíkt mörg skref fram á við sem er ótrúlega dýrmætt fyrir félag eins og Víking.“

Tíminn býr til reynslu

Hafa orðið miklar breytingar á liðinu frá síðasta tímabili? „Við náðum að halda svona nokkurn veginn í kjarnann. Stærstu breytingarnar eru á sóknarlínunni hjá okkur. Við misstum bæði Gary Martin og Björn Axel Guðjónsson, leikmenn sem skoruðu 19 af 50 mörkum okkar í deildinni á síðasta tímabili. Við höfum sett mikið traust á aðra leikmenn og þurfum við mörk úr fleiri áttum ef við ætlum að halda sama dampi og í fyrra og hef ég fulla trú á því.“

Nú ert þú á þínu þriðja ári í röð með liðið. Kemur það til með að hjálpa þér í sumar og þá hvernig? „Já, ég vona það. Tíminn býr til reynslu og reyni ég alltaf að læra eitthvað nýtt á hverjum degi. Ég tel mig vera betri þjálfara en á sama tíma í fyrra en aðrir þjálfarar eru líka að bæta sig. Ég þarf því að setja mikinn tíma og vinnu í liðið alveg eins og leikmennirnir til þess að það verði eins gott og mögulegt er.“

Reynum að vanda valið

Miðað við leikskýrslurnar eftir fyrstu tvo leikina þá eru fimm erlendir leikmenn í herbúðum ykkar að þessu sinni. Þeir Luke Williams, Luis Romero Jorge og Luis Alberto Ocerin hafa leikið undanfarin ár með liðinu, Kwame Quee frá 2017 til 2018 en Ivan Cristobal er nýr liðsmaður. Hvernig styrkja þeir hópinn og hafa þeir ekki góð áhrif á aðra leikmenn? „Þeir eru frábær viðbót inn í hópinn okkar, búa allir yfir miklum fótboltahæfileikum og líkar vel hér í Ólafsvík sem er mjög mikilvægt í svona samfélagi. Við reynum að vanda valið á leikmönnunum sem við tökum til félagsins. Við erum heppnir varðandi það að þeir erlendu leikmenn sem hafa komið hingað hafa styrkt liðið mikið og er frábært að ná að halda þeim áfram. Ivan er að taka sitt fyrsta ár hér en mér líður eins og að hann hafi alltaf verið hérna. Þeir styrkja liðið vel og hafa þeir einnig spilað á mjög háu stigi í sínu heimalandi og eru þeir mjög virkir í því að aðstoða okkar ungu stráka og hjálpa þeim í að bæta sig og liðið í leiðinni.“

Tveir alvöru leikir

Þið enduðuð í 4. sæti í 2. deildinni á síðasta tímabili og voruð einum sigri frá því að komast upp. Hver eru markmið liðsins fyrir sumarið? „Að halda áfram að bæta okkur, frá því ég tók við liðinu höfum við tekið skref áfram á hverju tímabilinu og viljum við halda því áfram. Gera þetta á okkar forsendum og reyna að ná í eins margar góðar frammistöður og mögulegt er, þá kemur annað í ljós.“ Það verða tveir Vesturlandsslagir í sumar, hvernig líst þér á það? „Það er bara algjör veisla. Kári er með virkilega gott lið og er þetta mjög skemmtilegt verkefni hjá þeim. Ég hlakka virkilega til að mæta til þeirra og bjóða þá velkomna til Ólafsvíkur, ég er handviss um að þetta verði tveir alvöru leikir.“

Umgjörðin fyrsta flokks

Hvernig líst þér á deildina í sumar og hefur þú einhverja tilfinningu fyrir því hvaða lið munu skara fram úr? „Það er oft ótrúlega erfitt að lesa í þessa deild, mikið af landsbyggðarliðum þar sem leikmannahóparnir koma seint saman. Tilfinningin mín er sú að KFA séu með svona sterkasta hópinn og svo eru þetta einhver sjö önnur lið sem vilja reyna að fylgja þeim upp.“

En hvað með umgjörðina í kringum liðið? Hvað ertu mest sáttastur við? „Umgjörðin í kringum liðið er fyrsta flokks. Við höfum bæði menn hérna sem hafa verið í kringum liðið í rúm 20 ár og þekkja þeir því þetta umhverfi. Einnig komu inn tveir aðrir í kringum liðið sem hafa komið inn með miklum krafti. Við höfum tekið stór skref áfram í okkar umgjörð á þessu ári. Við bættum við fitness þjálfara sem er að koma virkilega sterkur inn ásamt því að við fjárfestum í GPS búnaði. Þessir hlutir hjálpa okkur mjög mikið í að bæta þá leikmenn sem við höfum,“ segir Brynjar að lokum.

„Oft ótrúlega erfitt að lesa í þessa deild“

Rætt við Brynjar Kristmundsson þjálfara Víkings Ó um komandi tímabil

Rætt við Brynjar Kristmundsson þjálfara Víkings Ó um komandi tímabil