Rætt við Gunnlaug Smárason þjálfara Snæfells í 1. deild karla í körfuknattleik

Snæfell í Stykkishólmi spilaði í 1. deild karla í vetur í körfuboltanum en liðið endaði tímabilið í áttunda sæti deildarinnar og fór því í átta liða úrslit og spilaði leikina gegn Hamri í Hveragerði. Liðin mættust í hreinum úrslitaleik en þá datt Snæfell út og er því komið í sumarfrí.

Fólk var komið á bak við okkur

Gunnlaugur Smárason þjálfari sagði í viðtali í haust að markmið tímabilsins væri að gera betur en á síðasta tímabili. „Markmiðið var að komast í úrslitakeppnina. Það tókst og við vorum hársbreidd frá því að fara alla leið þótt við værum að spila gegn einu af bestu liðunum. Svo settum við okkur einnig markmið um að hafa góða umgjörð og fjölga fólki á leikjum og það sýndi sig í úrslitakeppninni að fólk var virkilega komið á bak við okkur sem þéttur hópur. Það er líklega það besta sem gerðist á þessu tímabili, að fá Hólmara til að mæta á leiki og styðja okkur,“ nefnir Gunnlaugur.

Menn misstu ekki hausinn

Lið Snæfells vann fyrsta leik tímabilsins gegn Fjölni en svo komu sex tapleikir í röð. Hvernig var stemningin í liðinu á þessum tímapunkti? „Það er alltaf erfitt að tapa leikjum og hvað þá mörgum í röð. Ég var svolítið með tímabilið í fyrra á bak við eyrað og reyndi að búa til liðsheild og fá menn til að vera nokkuð létta á meðan þessu stóð. Inn í þessari taphrinu voru erfið töp á móti Selfossi, Skallagrími og Þór Akureyri, allt lið sem okkur fannst við geta unnið fyrir áramót. Menn misstu ekki hausinn og reyndu að halda gleðinni,“ segir Gunnlaugur.

Treacy dreif aðra með sér

Um áramótin gerði lið Snæfells breytingu þegar fenginn var inn írskur landsliðsmaður, Matt Treacy. Má segja að það hafi verið vendipunktur á tímabilinu að fá þennan leikmann til liðs við ykkur? „Já, ég er sammála því, hann breytti öllu hjá okkur. Við fengum frábæra skyttu sem opnaði völlinn mikið fyrir aðra leikmenn og svo er Matt einnig mjög mikill atvinnumaður og með því dreif hann aðra með sér. Menn sáu fram á að tapa mínútum eða hlutverki innan liðsins og lang flestir horfðu á það sem áskorun sem sýnir að liðið innihélt mikið af góðum karakterum,“ segir Gunnlaugur.

*Lið Snæfells eftir loka heimaleik sinn gegn Hamri á tímabilinu. Ljósm. Bæring Nói.*

Fórum stoltir út úr þessu einvígi

Eins og fyrr segir datt lið Snæfells úr leik þegar liðið tapaði oddaleik gegn Hamri, en var eitthvað sem situr í Gunnlaugi eftir þessa seríu? „Möguleikarnir voru margir og sáum við veikleika eins og Hamar sá hjá okkur. Við förum stoltir út úr þessu einvígi þó svo að það sé oft sárt að verða undir í baráttunni eins og í fráköstum og varnarfærslum. Hamarsmenn gerðu vel og gerðu nægilega mikið til að vinna einvígið,“ segir Gunnlaugur. En telur hann að Hamar eigi eftir að fylgja ÍA upp í Bónus deildina? „Hamar fer upp með ÍA nema þeir missi leikmenn út. Þeir eru með þrjá galdrakarla og svo íslenska leikmenn sem spila vörn og hitta úr skotum þegar það á við.“

Hafa leikmenn sem róa í sömu átt

Gunnlaugur vill meina að lið Snæfells hafi verið heilsteyptara í ár og að 1. deildin hafi verið töluvert jafnari en árið á undan. En voru einhverjir leikmenn sem hann sá stíga upp í vetur? „Ég ætla að nefna tvo unga sem hafa verið að spila frábærlega með sínum flokki. Sturla Böðvarsson sýndi það í vetur að hann er frábær leikmaður með mikinn skilning á körfubolta. Hann mun á næstu árum stíga stór skref í sinni vegferð, ég vona svo innilega að við getum haldið áfram að leyfa honum að bæta sig hérna í Hólminum. Annar leikmaður sem spilaði lítið fyrir meistaraflokk, en var frábær á æfingum og í leikjum 11. flokks, er Hjörtur Jóhann. Hann hefur bætt sig mikið í ár og vonandi notar hann sumarið vel til þess að næla sér í mínútur í meistaraflokki. Við erum svo með nokkra örlítið eldri sem skiptust á að stíga upp í leikjum fyrir okkur og það er virkilega mikilvægt að geta haldið íslenska kjarnanum hjá okkur áfram,“ nefnir Gunnlaugur. En hvað tekur hann út úr þessu tímabili sem þjálfari? „Það helsta sem ég tek út úr þessu tímabili er að það er rosalega mikilvægt að hafa leikmenn sem róa í sömu átt. Liðsheild og hafa gaman að því sem við erum að gera,“ segir hann.

Vonumst til að halda öllum leikmönnum

Að lokum spyr blaðamaður um framhaldið, hvar Gunnlaugur sjái lið Snæfells á næsta tímabili og hvort að það verði miklar mannabreytingar á liði Snæfells? „Vonandi mjög svipað, við erum að fara af stað í að tala við kjarnann okkar og vonumst til að halda öllum. Svo þarf svolítið að sjá hvað gerist í útlendingamálunum hjá KKÍ,“ nefnir Gunnlaugur en bætir því við: „Við ætlum okkur að halda áfram að byggja upp körfuboltann í Stykkishólmi og vonandi sér fólk það. Þegar við vinnum saman að þessum markmiðum þá er allt hægt. Við tökum eitt skref í einu og bætum okkur áfram á næsta tímabili. Að endingu langar mig að þakka stuðningsfólki Snæfells fyrir frábæra mætingu á leiki eftir áramót og þá sérstaklega í úrslitakeppninni. Stjórnin fær einnig mikið hrós fyrir sína vinnu, umgjörðin hefur verið frábær og það er ekki hægt að biðja um betra vinnuumhverfi,“ segir Gunnlaugur þjálfari Snæfells að lokum.

Fengum Hólmara til að mæta á leiki og styðja okkur

Rætt við Gunnlaug Smárason þjálfara Snæfells í 1. deild karla í körfuknattleik

Rætt við Gunnlaug Smárason þjálfara Snæfells í 1. deild karla í körfuknattleik