Snæfell tók á móti Hamri í Hveragerði í gær í fjórða leik liðanna í úrslitakeppni 1. deildar karla í körfubolta. Fyrir leikinn var Hamar með 2-1 forystu en vinna þarf þrjá leiki til að komast í undanúrslit. Þéttsetið var í áhorfendastúkunni í Fjárhúsinu, íþróttahúsi Stykkishólms og mikil spenna.

Liðin skiptust á körfum í byrjun leiks og voru helstu hestar beggja liðanna áberandi. Í liði Snæfells stóðu þeir Matt Treacy og Khalyl Waters fyrir sínu liði en í liði Hamars voru það þeir Jose Medina og Jaeden King sem sáu um stigaskorunina. Jafnt var þegar um þrjár mínútur voru til loka fyrsta leikhluta, 21-21 en þá hrökk Alejandro Rubiera í gang, hann setti niður snögg sex stig og náði Snæfell forystu fyrir leikhlutaskiptin, 29-26.

Sturla Böðvarsson kom með stemningu og kraft inn í annan leikhlutann en hann ásamt Rubiera og Matt Treacy náðu að setja fyrstu tólf stig leikhlutans og var Snæfell komið með 15 stiga forystu um miðbik leikhlutans, 41-26. Leikmenn Hamars náðu að laga stöðuna fyrir hálfleik en Snæfell leiddi, 52-40.

Snæfell kom út í seinni hálfleik með mikla orku og virtist það slá gestina út af laginu. Hamar náði að setja stig á töfluna frá vítalínunni á meðan Rubiera, Treacy og Khalyl hittu vel úr sínum tilraunum og þegar fimm mínútur höfðu liðið af þriðja leikhluta var Snæfell komið í 20 stiga forystu, 72-52. Aron Ingi og Snjólfur Björnsson komu svo inn með enn meiri orku og kláraði Snæfell leikhlutann með stæl, 83-63.

Gestirnir frá Hveragerði náðu frábæru áhlaupi í byrjun fjórða leikhluta, leiddir áfram af Jaeden King og hinum gríska Fotios, náði Hamar að minnka muninn í 10 stig, 93-83 þegar um þrjár mínútur voru eftir. Heimamenn lokuðu á frekari áhlaup gestanna og Juan Navarro kláraði leikinn með stæl þegar hann setti niður þriggja stiga körfu og áhorfendur í Fjárhúsinu ærðust af gleði. Lokatölur í Stykkishólmi urðu 100-88 sigur fyrir Snæfelli.

Matt Treacy skoraði 25 stig fyrir Snæfell, Khalyl Waters 23 stig og Alejandro Rubiera 23 stig. Í liði Hamars skoraði Jaeden King 32 stig og Jose Medina 20 stig.

Hreinn úrslitaleikur liðanna um að komast í undanúrslit verður spilaður í Frystiklefanum í Hveragerði næstkomandi sunnudag og hefst hann klukkan 19:15.

Snæfell jafnaði metin gegn Hamri