Rætt við Óskar Þór Þorsteinsson, þjálfara ÍA í körfubolta sem á dögunum var heiðraður sem þjálfari ársins í 1. deild karla

Körfuboltalið ÍA fór í gegnum tímabilið taplaust á heimavelli, vann 18 leiki og tapaði eingöngu fjórum leikjum. Óskar Þór var ráðinn til starfa síðasta sumar en áður var hann búinn að starfa hjá Stjörnunni, Álftanesi og Þór á Akureyri. Skessuhorn hitti á Óskar og ræddi við hann stuttlega um liðið tímabil hjá ÍA.

Sóknarleikurinn þróaðist yfir tímabilið

Tímabilið á undan endaði ÍA í 8. sæti deildarinnar en þegar Óskar var ráðinn til starfa náði hann í þrjá mikilvæga hlekki til að styrkja liðið. „Þeir voru allir þrír rosalega mikilvægir fyrir okkur á mismunandi vegu og þeir hafa allir verið með bestu mönnunum í sínum stöðum í deildinni,“ sagði Óskar en þeir þrír leikmenn voru þeir Kristófer Már Gíslason, Kinyon Hodges og Victor Bafutto. En voru einhverjar ákveðnar áherslur sem Óskar kom með sem gengu fullkomlega upp eða voru einhverjar sem duttu af borðinu? „Já auðvitað er ýmislegt sem maður prufar yfir tímabil sem gengur ekki upp en við tókum til dæmis nokkrar vikur þar sem við unnum í svæðisvörn sem við nýttum lítið í leikjum. Sóknarleikurinn okkar þróaðist svo nokkuð mikið yfir tímabilið og fór meira yfir í fimm út leikstíl þar sem við nýttum vagg og veltu með Kinyon og Viktori,“ segir Óskar.

*Óskar Þór, þjálfari ársins í 1. deild karla.*

Sannfæringin um að við ættum heima á toppnum

Óskar segir að fyrri leikurinn gegn Ármanni hafi markað ákveðin kaflaskil. „Það var virkilega sterkur 16 stiga sigur á útivelli og líklegast besti leikurinn okkar í vetur. Þá voru við búnir að tapa gegn Hamri og Sindra úti í leikjum sem réðust á síðustu sekúndunum og við vissum því að við ættum góðan séns í þau heima. Sigurinn á Ármanni gaf okkur sannfæringu um að við værum með lið sem ætti heima á toppnum,“ nefnir Óskar.

Skaginn styður við sitt fólk

Mikið hefur verið rætt og ritað um umgjörðina sem var hjá liðinu á tímabilinu en hvernig upplifði Óskar þessa umgjörð? „Að fá að taka þátt í stemningunni á Vesturgötu í vetur hefur verið algjör forréttindi og fá hús betri á landinu til að spila í með fulla stúku. Við vorum taplausir á heimavelli í vetur og náðum að fá fólkið með okkur í lið. Við töluðum mikið um að spila fyrir fólkið okkar og yngri iðkendur og skila frammistöðu sem væri þeim til sóma. Skaginn styður svo sannarlega við sitt fólk og við stefnum á að gera umgjörðina í kringum leikina okkar á næsta ári ennþá betri í nýju húsi,“ segir Óskar.

Allir gáfu sig alla í verkefnið

Blaðamaður spyr um hvað Óskar taki úr þessu tímabili, sem þjálfari. „Aðallega hvað trúin á verkefnið og samheldnin skiptir miklu máli. Okkur var spáð 7. sæti af hinum félögunum fyrir tímabilið og ég held að það segir mikið um liðið okkar í vetur. Strákarnir lögðu mikið á sig til að verða meistarar og það hefði aldrei gengið nema að allir gáfu sig alla í verkefnið og fórnuðu fyrir liðið, bæinn og hvern annan. Enginn af strákunum okkar fengu einstaklings verðlaun á lokahófi KKÍ en ég fullyrði að ef þeir hefðu verið í stærra hlutverki í slakara liði væri það ekki raunin,“ segir Óskar.

Æfingar strax byrjaðar

Nú gefst tími til að fara vel yfir tímabilið, ræða við leikmenn um framhaldið og sjá hvaða bætingu þarf fyrir næsta tímabili. „Sú umræða er bara í gangi. Við vonumst til þess að halda kjarnanum af þessu liði saman og bæta við sterkum einstaklingum sem passa inn í liðið innan og utan vallar. Svo á eftir að gefa út nánari skýringar á nýjum reglugerðum fyrir næsta tímabil sem mun skipta miklu máli fyrir liðssamsetninguna. Æfingar fyrir næsta tímabil eru strax byrjaðar en stökkið upp í Bónus er auðvitað mikið og því veitir okkur ekki af undirbúningnum,“ segir Óskar.

Ármann og Fjölnir líklegastir

Að lokum förum við yfir hvaða lið Óskar sér fyrir sér, gerandi tilkall í sæti með ÍA upp í Bónus deildina. „Úrslitakeppnin er virkilega spennandi í ár og ég held það séu nokkuð margar seríur sem geta dottið báðum megin. Mér finnst þó Fjölnir og Ármann standa upp úr í dag en Hamar eru auðvitað rosalega hættulegir ef þeir ná að haldast heilir,“ segir Óskar að lokum.

Náðum að fá fólkið með okkur í lið

Rætt við Óskar Þór Þorsteinsson, þjálfara ÍA í körfubolta sem á dögunum var heiðraður sem þjálfari ársins í 1. deild karla

Rætt við Óskar Þór Þorsteinsson, þjálfara ÍA í körfubolta sem á dögunum var heiðraður sem þjálfari ársins í 1. deild karla