Skallagrímur tók á móti liði KV á föstudaginn í 19. umferð fyrstu deildar karla í körfubolta. Skallagrímur var fyrir leikinn með 8 stig í neðsta sæti deildarinnar en KV var þar rétt fyrir ofan með 12 stig og því var um að ræða gríðarlega mikilvægan leik fyrir bæði lið.

Skallagrímur byrjaði leikinn af krafti og náðu upp níu stiga forystu um miðbik fyrsta leikhluta, 21-12. Leikmenn Skallagríms spiluðu vel saman í sókn og náðu að loka á flest allar sóknaraðgerðir gestanna. Í lok leikhlutans opnaðist fyrir Arnór Hermannsson og Friðrik Anton Jónsson, leikmenn KV, og náðu þeir að rétta örlítið úr kútnum. Staðan eftir fyrsta leikhluta var 30-22 fyrir Skallagrím.

Allt annað lið Skallagríms mætti til leiks í öðrum leikhluta. Á fyrstu fjórum mínútum leikhlutans töpuðu heimamenn sjö boltum, annað hvort í hendur KV eða út af vellinum. Leikmenn KV spiluðu af meiri sjálfstrausti og náðu þeir góðri forystu í hálfleik, staðan 43-51 fyrir KV. Magnús Engill og Sævar Pálmason komu grimmir til leiks í seinni hálfleik fyrir lið Skallagríms en gestirnir náðu ávallt að halda muninum í tíu stigum. Skallagrímur náði loks góðu áhlaupi en heimamenn breyttu stöðunni 55-69 í 63-69 og var komin stemning í Fjósið í Borgarnesi. Orri Jónsson varð fyrir því óláni að fá olboga Jermaine Hamlin í enni sitt og þurfti hann að yfirgefa völlinn. KV náði vopnum sínum að nýju og var með forystu fyrir lokaleikhlutann, 65-75.

Gestirnir voru með öll tök á leiknum en um miðbik loka leikhlutans minnkuðu heimamenn stöðuna í 78-86. Luke Moyer leikmaður Skallagríms náði svo að skora góða körfu og hélt Skallagrími inni í leiknum en hann ákvað svo að fá á sig tæknivillu og þannig hans fimmtu villu í leiknum. Leikmenn Skallagríms gáfust þó ekki upp og minnkuðu muninn í sex stig þegar um tvær mínútur voru eftir af leiknum en gestirnir úr Vesturbæ notuðu reynslu sína á lokamínútum leiksins og fóru með sigur af hólmi, 85-98.

Luke Moyer var stigahæstur í liði Skallagríms með 27 stig, Sævar Pálmason skoraði 14 stig og þeir Jure Boban og Jermaine Hamlin 11 stig hvor.

Friðrik Anton Jónsson var stigahæstu í liði KV með 20 stig, Illugi Steingrímsson skoraði 15 stig og Arnór Hermannsson skoraði 14 stig og átti auk þess 18 stoðsendingar.

Næsti leikur Skallagríms er gegn Breiðabliki og verður hann spilaður í Smáranum í Kópavogi, föstudaginn 7. mars klukkan 19:15.

Fimmtán tapleikir hjá Skallagrími