Snæfell tók á móti ÍA í 16. umferð fyrstu deildar karla í körfubolta á föstudaginn. Snæfell hafði náð tveimur góðum sigrum gegn Sindra og Selfossi en ÍA hafði unnið sjö leiki í röð og því spennandi leikur framundan.

Leikmenn beggja liða spiluðu af miklu sjálfstrausti í byrjun leiks, liðin skiptust á að ná forystu en ÍA náði eins stigs forystu undir lok fyrsta leikhluta, 21-22. Matt Treacy, leikmaður Snæfells, náði að spila heilar þrjár mínútur í leiknum en hann fékk dæmda á sig tæknivillu og óíþróttamannslega og fór því út úr húsi þegar lítið var eftir af fyrsta leikhluta.

Innkoma Alex Rafns í lið Snæfells í öðrum leikhluta breytti leiknum en hann kom heimamönnum í Snæfelli yfir 32-30 með laglegri þriggja stiga körfu þegar leikhlutinn var hálfnaður. En gestirnir frá Akranesi bitu frá sér og með innkomu Styrmis Jónassonar náðu gestirnir aftur undirtökum á leiknum og leiddu í hálfleik, 47-50.

Snæfell komst yfir með körfu frá Khalyl Waters, 56-53 og var komin mikil stemning í Fjárhúsið. Liðin skiptust á körfum það sem eftir lifði leikhlutans og voru heimamenn með forystu, 71-68 áður en loka fjórðungurinn hófst.

Áfram hélst munurinn á liðunum í þremur stigum en ÍA náði að jafna metin í 79-79 þegar um sex mínútur voru eftir. Alex Rafn náði skömmu síðar að koma Snæfelli yfir í 81-80 en svo tóku við þrjár mínútur þar sem bæði lið gerðu ýmis mistök og hittni var lítil. Mikill spenningur var greinilega í báðum liðum og í áhorfendastúkunni en þegar um ein og hálf mínúta var eftir af leiknum skorði Alejandro Rubiera fyrir Snæfell og kom gestgjöfunum yfir, 85-83. Bæði lið áttu svo mislukkaðar sóknir en undir lok leiks náði Srdan Stojanovic að skjóta að körfunni þriggja stiga skoti, boltinn söng í spjaldinu og ofan í körfuna. 85-86 fyrir ÍA og eingöngu fjórar sekúndur eftir. Snæfell reyndi að koma boltanum í leik en Victor Bafutto stal boltanum og ÍA fór heim með mikilvægan sigur úr Stykkishólmi.

Stigahæstur í liði Snæfells var Khalyl Waters með 28 stig og Juan Navarro skoraði 19 stig. Í liði ÍA voru stigahæstir þeir Styrmir Jónasson með 19 stig og Kristófer Már Gíslason, einnig með 19 stig.

Næsti leikur Snæfells er gegn Skallagrími í Stykkishólmi í kvöld klukkan 19.15 en ÍA tekur á móti KV næstkomandi miðvikudag og hefst leikurinn klukkan 19.15.

Srdan hetja ÍA gegn Snæfelli