Snæfell í Stykkishólmi gerði góða ferð austur á Höfn í Hornafirði á föstudaginn þegar liðið heimsótti heimamenn í Sindra. Sindri lagði Skallagrímsmenn í Borgarnesi í síðustu umferð á meðan Snæfell sigraði Selfoss í Stykkishólmi og var því töluverð spenna fyrir leikinn.

Einhver hrollur var í gestunum frá Stykkishólmi í fyrsta leikhluta og náðu heimamenn í Sindra stjórn á leiknum um miðbik fyrsta leikhluta og tóku 13-2 áhlaup. Gestirnir gerðu klaufaleg mistök í sóknar- og varnarleik sínum og Sindri var með níu stiga forskot eftir fyrsta leikhluta, 22-13.

Sindri hélt áfram sínum fína varnarleik og var að spila glimrandi sóknarleik á meðan nokkuð hikst var í leik Snæfells. Sindri náði 12 stiga forystu þegar annar leikhluti var hálfnaður, 32-20 og virtust heimamenn vera með alla stjórn á leiknum. En Khalyl Waters og Juan Navarro leikmenn Snæfells drógu lið sitt áfram og náði Snæfell að jafna leikinn þegar lítið var eftir af hálfleiknum. Sindramenn skoruðu reyndar síðustu tvær körfur hálfleiksins og fóru inn í búningsklefa með stöðuna 40-36.

Snæfell kom með mikla stemningu og grimmd í seinni hálfleik, undir forystu Eyþórs Lár Bárðarsonar en hann var frábær á báðum endum vallarins. Hann stal boltum og kom Snæfelli yfir, 42-45 og Sindri þurfti að taka leikhlé. Stemningin var öll Snæfells megin í þriðja leikhluta; leikmenn fóru að hitta vel fyrir utan þriggja stiga línuna og náðu 48-58 forystu þegar lítið var eftir af leikhlutanum. En heimamenn í Sindra fóru að herða sinn varnarleik og náðu þeir hægt og rólega að saxa á forskot Snæfells en þeir minnkuðu muninn í eitt stig rétt fyrir leikhlutaskipti, 62-63 fyrir Snæfelli og gríðarleg spenna fyrir lokaleikhlutann.

Jafnræði var með liðunum í byrjun fjórða leikhluta en liðin voru að gera sig sek um nokkur mistök en þegar um fimm mínútur voru eftir af leiknum var staðan jöfn, 71-71. Snæfell komst yfir með troðslu frá Khalyl Waters og síðar kom Matt Treacy með þriggja stiga körfu og kom gestunum í stöðuna 73-79, þegar um tvær mínútur voru eftir. Donovan Fields leikmaður Sindra minnkaði muninn í þrjú stig, 76-79 og var kominn mikill hiti í leikinn. En Snæfell náði að setja sín vítaskot í körfuna á síðustu mínútum leiksins á meðan heimamenn klikkuðu úr fjórum vítum og náði Snæfell í frábæran sigur gegn Sindra, lokatölur 79-85 fyrir Snæfelli.

Matt Treacy skoraði 20 stig fyrir Snæfell, Khalyl Waters skoraði 14 og var með 12 fráköst en Juan Navarro skoraði 13 stig og var með 14 fráköst í liði Snæfells. Donovan Fields skoraði 36 stig fyrir Sindra og Milorad Sedlarevic 12 stig.

Næsti leikur Snæfells er gegn ÍA í Stykkishólmi, föstudaginn 7. febrúar og hefst hann klukkan 19.15.

Snæfellssigur á Hornafirði