Tveir Íslandsmeistaratitlar, einn unglingameistaratitill og lágmark á HM var uppskera ÍA á Íslandsmeistaramóti um síðustu helgi. Átta sundmenn frá ÍA tóku þátt á Íslands- og unglingameistaramótinu í sundi sem fór fram í Hafnarfirði um helgina. Á mótinu voru 174 keppendur frá 10 félögum. Samtals unnu Skagamenn þrjú gull, þrjú silfur og 7 brons. Þá voru líka sett sex Akranesmet og tvö lágmörk á HM.

Einar Margeir Ágústsson var í fantaformi og varð Íslandsmeistari í 100 m fjórsundi á 54,36 og í 200 m bringusundi á 2.10.52, þessi sund tryggðu Einari þáttökurétt á Heimsmeistaramóti fullorðna sem fram fer 10.-15. desember í Búdapest. Einar vann svo silfur í 50 m skriðsundi á 22.53 og í 50 m bringusund á 27,17 aðeins 0,17 frá fyrsta sæti. Í hvert skipti sem Einar stakk sér til sunds setti hann Akranesmet, hann bætti lika Akranesmetið í 100m skriðsundi þegar hann synti á 50.23 í fyrsta sprett í boðsundi.

Guðbjarni Sigþórsson stóð sig líka vel og varð unglingameistari í 100 m fjórsundi á 58,44 sek. Hann bætti sig um sekundu frá því í fyrra. Í sama sundi varð hann í þriðja. sæti í fullorðinsflokki. Guðbjarni bætti Akranesmetið í 200 m skriðsundi og hafnaði í fjórða sæti á tímanum 1.53.18 og þá setti hann nýtt Akranesmet í unglingaflokki í 50 m skriðsundi á 23.64.

Sunna Arnfinnsdóttir átti góða helgi og vann silfur og sex brons. Þrjú þeirra voru í fullorðinsflokki, í 200 m flugsundi, 100 m baksundi og 200 m baksundi og í unglingaflokki vann hún silfur í 200 m baksundi, brons í 200 m flugssundi og 100 m og 200 m baksundi.

Ingibjörg Svava Magnúsardóttir stóð sig vel og synti sig inn í úrslit í 50 m baksundi og varð áttunda, alveg við sinn besta tíma. Hún var mjög nálægt því að komast í úrslit í 50 m flugsundi þegar hún bætti sig um 0,5 sek.

Kajus Jatautas komst síðan í úrslit í 100 m baksundi og bætti sig um 0,5 sek. Hann bætti sig líka í 50 m, 100 m og 400 m skriðsundi. Hann átti mörg góð sund um helgina

*Boðsundslið kvenna skipuðu þær Sunna Arnfinnsdótir, Sunna Dís Skarphéðinsdóttir, Karen Anna Orlita og Ingibjörg Svava Magnúsardóttir.*

Sunna Dís Skarphéðinsdóttir átti glæsilegt mót og bætti sig í öllum sundum, sérstaklega í 100m skriðsundi en þar synti hún mjög vel og bætti sig um 3,96 sekundur þegar hún synti á 1.04.07.

Karen Anna Orlita var yngsti keppandi ÍA á mótinu. Hún keppti til úrslita í 1500 m skriðsundi og hafnaði í sjöunda sæti. Hún bætti sig í þrem öðrum sundum, 50 m skriðsundi, 100 m skriðsundi og 200 m skriðsundi.

Kristján Magnússon mætti til leiks til að synda boðsund og stóð sig frábærlega og hjálpaði strákunum til að ná góðum úrslitum í boðsundi, en boðsundslið karla náði fjórða sæti í 4×40 m fjórsundi og 4×100 m skriðstundi. Þá náði boðsundslið kvenna sjötta sæti í 4×100 m skriðsundi og 4×100 fjórsundi og sjöunda sæti í 4×50 m fjórsundi.

MT 1: Boðsundslið karla skipuðu þeir Einar Margeir Ágústsson, Kajus Jatautas, Guðbjarni Sigþórsson og Kristján Magnússon.

MT 2: Boðsundslið kvenna skipuðu þær Sunna Arnfinnsdótir, Sunna Dís Skarphéðinsdóttir, Karen Anna Orlita og Ingibjörg Svava Magnúsardóttir.

Sundfólk frá ÍA stóð sig vel