Farið yfir Íslandsmótið með Aroni Ými Péturssyni, þjálfara Kára

Knattspyrnufélagið Kári frá Akranesi varð í efsta sæti 3. deildar karla í knattspyrnu í sumar og komst þar með upp í 2. deild á ný eftir þriggja ára fjarveru. Kári lauk leik með 47 stig, vann 14 leiki, gerði fimm jafntefli og tapaði þremur leikjum. Liðið lék þriðja árið í röð í þriðju deildinni og endaði í fimmta sæti bæði árin tvö á undan en spilaði síðast í 2. deild árin 2018-2021. Aron Ýmir Pétursson var þjálfari liðsins í ár eins og í fyrra og blaðamaður Skessuhorns heyrði í honum hljóðið fyrir helgina þar sem við ræddum tímabilið í heild sinni.

Í viðtali fyrir mót sagðir þú að stefnan væri klárlega að enda ofar en í fimmta sæti. Mótið hófst í byrjun maí með tveimur frekar öruggum sigrum gegn Elliða og Víði og síðan gerið þið jafntefli í ótrúlegum leik við Vængi Júpiters, 5:5. Í kjölfarið kemur tap heima á móti Hvíta riddaranum en þið endið maí á sigri gegn liði KFK í öðrum miklum markaleik, 7:3. Varstu ánægður með þessa byrjun og gáfu öll þessi mörk góð fyrirheit fyrir framhaldið? „Ég get ekki sagt það að við höfum verið neitt sérlega ánægðir með þessa byrjun. Útisigurinn á móti Víði var virkilega öflugur en aðrir leikir voru ekkert sérstakir. Við vorum að fá á okkur allt of mörg mörk og frammistaða liðsins var mjög ójöfn. Tapið heima á móti Hvíta Riddaranum var ákveðinn vendipunktur á tímabilinu. Í þeim leik var okkur kippt harkalega á jörðina eftir frábært undirbúningstímabil og þegar við lítum til baka þá var það tap alvöru lexía og mögulega það spark í afturendann sem þurfti til að stíga aftur upp á það getustig sem við eigum að spila á.“

Viðbrögðin við tapinu virkilega öflug

Í júní spilið þið fjóra leiki, vinnið fyrstu þrjá á móti KV, ÍH og Sindra og gerið síðan jafntefli við Magna. Á þessum tímapunkti eruð þið í efsta sæti deildarinnar með 20 stig og tveimur stigum á undan Víði og Augnabliki. Var ekki þarna fyrir séð að þið ætluðuð að vera í baráttu um að komast upp og engin leið til baka? „Innan okkar liðs kom aldrei neitt annað til greina en að stefna upp og þrátt fyrir smá hikst á móti Vængjunum og Hvíta Riddaranum þá vissum við alltaf að við værum með nógu sterkan hóp til þess að klára það. Einnig að þá lögðu strákarnir bara það mikið á sig yfir veturinn og æfðu bara eins og lið í efstu deild og það er langoftast þannig að maður uppsker eins og maður leggur inn. Viðbrögðin við tapinu gegn Hvíta voru virkilega öflug og við fundum að við vorum að verða betri og betri með hverjum leiknum. Á þessum tímapunkti snerist þetta bara um að halda mönnum á tánum og við efnið og passa það að við myndum ekki vera þægilegir og halda að þetta kæmi af sjálfu sér.“

Frá byrjun júlí og fram í miðjan ágúst kemur síðan ansi góður kafli hjá ykkur þar sem þið vinnið alls sjö leiki og gerið eitt jafntefli með markatölunni 27:3. Þarna eruð þið komnir með sjö stiga forskot á toppnum þegar fimm umferðir eru eftir og komnir með annan fótinn upp í 2. deild. Hvernig var stemningin eiginlega í hópnum á þessum kafla eftir svona gott gengi? „Á þessum tímapunkti á tímabilinu var frammistaða liðsins alveg frábær. Við vorum áfram að skora mörg mörk en á sama tíma var varnarleikurinn stórkostlegur. Allir í liðinu voru að róa í sömu átt og við fengum þá tilfinningu eins og við gætum ekki tapað. Ekki bara það að liðið var að vinna heldur var frammistaðan leik eftir leik virkilega öflug. Eina sem var svekkjandi við þennan kafla var tapið í fótbolti.net bikarnum á móti Tindastóli en Laugardalsvöllur verður að bíða eitt ár í viðbót.“

Síðan kemur smá hökt í næstu tveimur leikjum þegar þið gerið jafntefli við ÍH og tapið á móti Sindra heima. Þið fáið fimm rauð spjöld í þessum leikjum og þú eitt þeirra. Var pressan orðin of mikil fyrir þetta unga lið Kára eða hvað var í gangi? „Það leit kannski út fyrir það horfandi utan frá og inn og alveg skiljanlega en inn í okkar hóp var ekkert stress. Þessi rauðu spjöld voru langflest tilviljanir og hlutir sem gerast í fótboltaleikjum en mögulega óheppilegt fyrir okkur að þetta hafi komið fyrir á þessum tímapunkti á tímabilinu. Auðvitað er það kúnst fyrir lið sem er ekki með hærri meðalaldur en við vorum með að spila leiki þar sem allt er undir og lið að elta okkur en mér fannst strákarnir tækla það verkefni mjög vel. Það þarf ekki annað en að leita uppi Kára-Sindra leiknum á ÍATV til að sjá það að þessi spjöld voru bara slys.“

Virkilega verðskuldað

Þið tryggið ykkur síðan sæti í 2. deild í lok ágúst þegar þið vinnið Magna, 0:4, á Grenivík. Svo gerið þið jafntefli við Augnablik og tapið fyrir Árbæ í lokaleiknum. Þá er ljóst að þið endið í efsta sæti þriðju deildar og lyftið bikarnum í leikslok. Er ekki alltaf jafn gaman að vinna titil? „Jú, það var geggjað. Frábært að vinna deildina og virkilega verðskuldað. Mér fannst við ekki bara besta heldur langbesta liðið í deildinni. Það var einmitt á Grenivík sem við sýndum hvers konar hugarfar býr í þessum gaurum. Grasleikur út á landi, mikill vindur og allt undir. Að fara þangað og vinna svona sannfærandi var alvöru yfirlýsing. Síðan skemmdi það ekki fyrir að Árbær og Augnablik gerðu jafntefli þannig að það var þessi leikur sem tryggði okkur á endanum upp um deild.“

Fótbolti.net fékk alla þjálfara deildarinnar til að velja úrvalslið tímabilsins. Þar voru fimm leikmenn Kára í liðinu auk þess sem einn var á bekknum. Þá var þjálfarateymi Kára valið Þjálfari ársins. Þið eruð væntanlega ánægðir með þetta? „Já heldur betur, þá sérstaklega með alla þá leikmenn sem komust í lið ársins og voru tilnefndir sem leikmenn ársins og efnilegustu leikmenn ársins. Kannski er maður blindur á sitt eigið lið en ég er með nokkra í huga sem ég hefði viljað sjá líka í liði ársins úr okkar röðum sem áttu mjög gott tímabil en að sama skapi erum við stoltir af þessu.“

Snýst um skipulag

Alls komu 24 leikmenn við sögu í leikjum Kára í sumar og átján þeirra léku sjö leiki eða meira. 14 af þeim eru fæddir árið 2005 eða seinna og voru því enn í öðrum flokki. Hvernig gekk að vinna með þessum ungu leikmönnum og var þetta ekki smá púsl að dreifa leikjaálagi? „Það eru náttúrulega algjör forréttindi. Þetta eru strákar með mikinn metnað, tilbúnir að hlusta og læra og mæta á hverja einustu æfingu til að verða betri. Við vorum með yngsta liðið í íslensku deildarkeppnunum í sumar og þetta er yngsta lið í sögunni til að verða deildarmeistari. Varðandi leikjaálagið myndi ég ekki segja að það hafi verið púsl að dreifa því heldur meira bara skipulag. Við erum með ótrúlegt magn af frambærilegum fótboltamönnum þannig að þetta snerist allan tímann um bara hverjir spila hvar. Við höfum sama leikstíl og skipulag á 2. flokks liðunum okkar og Kára þannig að allir voru með sín hlutverk á hreinu, sama hvort þeir voru að spila með 2. flokki eða Kára.“

Eiga risastórt hrós skilið

Aron Ýmir kemur einnig inn á það að samstarfið með ÍA hafi gengið mjög vel í sumar og hann segir það algjöra lykilforsendu að það sé sama þjálfarateymi í 2. flokki karla og Kára. „Við ætlum að halda áfram að vinna vel saman og bæta bara í ef eitthvað er. Við fórum upp um deild þannig að umgjörðin, æfingarnar og skipulagið í kringum liðið þarf líka að fara upp um deild.“ En var þetta ekki lærdómsríkt sumar hjá ykkur í þjálfarateyminu? „Þetta sumar hefur verið algjör rússíbani og þó svo að hlutirnir inn á vellinum hafi nú gengið að stórum hluta nokkuð smurt fyrir sig þá voru hlutir utan vallar sem reyndu heldur betur á liðið og teymið að standa saman. Þeir gerðu það svo sannarlega og gott betur en það og er ég virkilega þakklátur þeim fyrir það. Andri og Alexander Aron eiga líka alveg risastórt hrós skilið fyrir það hvernig þeir tóku utan um hópinn, samstarfið ÍA/Kári og mig sjálfan þegar hlutirnir utan vallar urðu erfiðir. Ég er ekkert eðlilega þakklátur og sýnir bara mikilvægi þess að vinna í góðu og sterku teymi og hafa gott fólk í kringum sig.“ En hvað með þjálfarateymið? Ætlið þið að halda áfram með liðið? „Það verða einhverjar breytingar á þjálfarateyminu. Það eru skipulagsbreytingar hjá Knattspyrnufélaginu og mun ég taka við sem yfirþjálfari. Það fer ekki saman með þjálfun liðs í 2. deild þannig að ég stíg út og það mun koma nýr þjálfari inn í teymið í staðinn fyrir mig. En þetta samstarf ÍA og Kára er á frábærum stað og fullt af tækifærum til að taka næsta skref og stefna enn hærra.“

Einhver lokaorð? „Tímabilið 2024 hefur verið virkilega gott fótboltasumar hjá okkur á Akranesi. Meistaraflokkur kvenna náði sínum besta árangri í mörg ár og Kári fór upp um deild. Meistaraflokkur karla er að ná sínum besta árangri í tólf liða deild frá stofnun þess og er enn í hörku baráttu um Evrópusæti. Yngri flokkarnir blómstra sem aldrei fyrr, 2. fl. karla varð bikarmeistari á dögunum og B-lið 3. flokks karla Íslandsmeistari en við viljum meira og stefnum bara upp á við. Takk fyrir stuðninginn og áfram ÍA!“

„Vorum með langbesta liðið í deildinni“

Farið yfir Íslandsmótið með Aroni Ými Péturssyni, þjálfara Kára

Farið yfir Íslandsmótið með Aroni Ými Péturssyni, þjálfara Kára