Rætt við Skarphéðin Magnússon þjálfara kvennaliðs ÍA

ÍA varð í 5. sæti í Lengjudeild kvenna í sumar. Fengu þær 26 stig úr 18 leikjum og markatalan var 27:31. ÍA vann átta leiki, gerði tvö jafntefli og tapaði átta. Skagakonur léku í fyrsta skipti í Lengjudeildinni síðan árið 2021 þegar þær féllu niður ásamt Gróttu. Skarphéðinn Magnússon tók við liði ÍA fyrir tímabilið af Magneu Guðlaugsdóttir og blaðamaður Skessuhorns heyrði í Skarphéðni í síðustu viku til að ræða tímabilið í heild sinni.

*Þjálfarateymi ÍA: Skarphéðinn Magnússon þjálfari, Aldís Ylfa Heimisdóttir aðstoðarþjálfari og Þorsteinn Magnússon, aðstoðar- og markmannsþjálfari.*

Fín byrjun á mótinu

Ef við förum yfir mótið eins og það gekk fyrir sig þá spilið þið fjóra leiki í maí, vinnið tvo og tapið tveimur. Þið hefjið leik í Lengjudeildinni með heimasigri á Grindavík, næst fylgdu tvö töp á móti FHL og Fram áður en þið vinnið útisigur á Selfossi í lok maí. Varstu ekki sæmilega sáttur við byrjun ykkar í deildinni? „Það má segja að miðað við að vera nýliðar í deildinni þá var þetta fín byrjun hjá okkur. Við vorum samt ósátt með að hafa ekki náð í stig gegn FHL þar sem þær skora á síðustu mínútu leiksins. En þrátt fyrir tapið gegn FHL þá var þetta góð byrjun.“

Þið hefjið júnímánuð með góðum sigri á ÍR, tapið síðan gegn HK og Aftureldingu en náið sigri í Akraneshöllinni á móti ÍBV. Déjá vu sagði einhver en þarna voruð þið í fjórða sæti á eftir FHL, HK og Aftureldingu. Hvernig var staðan á liðinu á þessum tímapunkti? „Staðan á liðinu var fín, mér fannst við alltaf vera að taka framförum í hverjum leik. Á þessum tímapunkti voru bæði Hugrún Stefnisdóttir og Ylfa Laxdal meiddar og eftir HK leikinn veiktist Madison Brooke og lenti inn á sjúkrahúsi. Leikurinn á móti Aftureldingu var kannski ekki okkar besti leikur en liðið hélt alltaf áfram.“

Í júlí spilið þið fimm leiki, tveir sigrar, eitt jafntefli og tvö töp. Þið fylgið sigrinum á móti Eyjakonum með góðum útisigri á Grindavík, tapið gegn Gróttu og FHL, gerið síðan jafntefli við Fram á útivelli og í lok júlí vinnið þið nauman sigur á móti Selfossi. Lengjudeildin var mjög jöfn í sumar og oft miklar sviptingar í gangi. Það er óhætt að segja að deildin hafi verið skemmtileg? „Mín upplifun er sú að þetta hafi verið mjög skemmtileg deild að fylgjast með, hún var mjög jöfn og flestir leikir hjá okkur voru mjög jafnir. Það má segja að fólk hafi alltaf fengið nóg fyrir peninginn þegar það mætti á leiki hjá ÍA í sumar.“

Alls ekki pressa á liðinu

Eftir sigur á ÍR aðra vikuna í ágúst eruð þið skyndilega komin í toppbaráttu með jafnmörg stig og Fram og ÍBV í 3.-5. sæti deildarinnar. Hvernig fór það í ykkur, var það of mikil pressa eða voruð þið að njóta augnabliksins? „Mér fannst alls ekki að það væri pressa á liðinu, mér fannst liðið eflast við að sjá fram á hversu góðar við getum verið. Ég held að stelpurnar hafi verið að njóta þess að spila í allt sumar og bæði á þessum tímapunkti eins og öllum öðrum. Það var ótrúlega góð samheldni í liðinu sem skilaði okkur góðum árangri í sumar.“

Í kjölfarið fylgir tap gegn HK og þið gerið síðan jafntefli á móti Aftureldingu en þá er staðan allt önnur. Þið eruð komnar niður í sjötta sætið og eigið ekki möguleika á að komast upp. Voru það vonbrigði eða áttirðu von á þessu? „Að sjálfsögðu eru það smá vonbrigði þegar maður sér að maður geti ekki farið upp um deild. En árangurinn í sumar heilt yfir var mjög góður og það var ekki gerð nein krafa á liðið að það færi upp í sumar.“

Tímabilinu lýkur síðan með tveimur leikjum, fyrst vinnið þið góðan sigur út í Eyjum en tapið á heimavelli gegn Gróttu í hörkuleik. Þið endið í fimmta sæti sem er næstbesti árangur ÍA í næst efstu deild en árið 2018 endaði liðið í 3. sæti. Þú hlýtur að vera sáttur með sumarið? „Já, við erum mjög sátt með sumarið, margir leikmenn hafa tekið miklum framförum og liðið í heild sinni tekið skref fram á við. Við sem nýliðar í deildinni getum verið sátt með það að enda um miðja deild á meðan lið ÍR sem kom upp með okkur fer niður aftur. Við höfum því verið að gera eitthvað rétt og tekið framförum allt tímabilið. Við fáum 12 stig í fyrri umferðinni og 14 stig í þeirri seinni sem sýnir að við höfum verið að taka skref í rétta átt í allt sumar. Það eru síðan leikir í sumar sem við teljum að við hefðum geta fengið meira út úr en stundum er það bara þannig.“

Vorum í hörku standi

Það sýndi sig greinilega í vor að liðið var í hörkuformi eins og sást á móti Selfossi í Mjólkurbikarnum seint í apríl. Þar voruð þið þremur mörkum undir í hálfleik, náið að jafna í 3-3 undir lokin og síðan aftur í 4-4 á æsispennandi lokamínútum. Þið klárið síðan leikinn í framlengingunni og virtust eiga nóg eftir. Eins og þú sagðir í viðtali í Skessuhorni í vor æfðuð þið mjög vel í vetur, það hlýtur að hafa hjálpað í sumar? „Stelpurnar æfðu virkilega vel allt tímabilið og það skilaði sér inn á völlinn í sumar. Mér fannst við alltaf vera sterkari en andstæðingar okkar síðustu 20 mínúturnar í öllum leikjum sem sýnir að við vorum í hörku standi. Það hversu vel við æfðum í vetur skilaði okkur enn betri árangri í sumar, það er enginn vafi á því.“

Fjórir erlendir leikmenn léku með liðinu í sumar. Juliana Marie Paoletti, Klil Keshwar og Madison Brooke Schwartzenberger voru með frá byrjun og Hanne Hellinx kom í lok júlí. Varstu ánægður með þeirra framlag í sumar og smullu þær vel inn í hópinn? „Já, við vorum mjög ánægð með nýju leikmennina sem komu til okkar. Þær eiga það allar sameiginlegt að hafa aðlagast hópnum vel. Þær eru frábærar persónur og gáfu okkur mikið inni á vellinum og stóðu sig vel en Madi og Juliana voru smá óheppnar með meiðsli. Hanne kom inn í lok júlí þegar við vorum í smá vandræðum með meiðsli í oftustu línu. Elvira Agla Gunnarsdóttir sleit krossband, Hugrún bæði ristar-og handarbrotnaði og Vala María Sturludóttir var í vandræðum með vöðvameiðsli.“

Það er áhugavert að skoða markaskorun liðsins í sumar en þið skorið alls 27 mörk í 18 leikjum og 17 af þeim mörkum skora þær Erla Karitas Jóhannesdóttir (9) og Erna Björt Elíasdóttir (8) eða um 63% af öllum mörkum liðsins. Voruð þið of varnarsinnaðar eða hver er skýringin að þínu mati? „Við vorum alla vega ekki of varnarsinnaðar þar sem við endum með mínus fjóra í markatölu. Það voru sjö leikmenn sem skoruðu mörkin fyrir okkur í sumar í deild og bikar. Erna Björt endaði í sumar með 11 mörk í deild og bikar, Juliana skoraði fimm og lagði upp ellefu mörk í sumar. Sunna Rún skoraði þrjú mörk og lagði upp sex svo þetta dreifist ágætlega. Ég held samt að það séu einhverjar sem eiga fleiri mörk inni. Það verður gaman að fylgjast með þeim á næsta ári.“

Akraneshöllin er sprungin

Í fyrsta skipti voru allir heimaleikir ykkar í Akraneshöllinni. Er að þínu mati kominn tími á að setja gervigras á Elkem völlinn? „Já, ég er á því að það er kominn tími á það að laga aðalvöllinn. Hvort það verði gervigras eða venjulegt er mér nokk sama um, mín skoðun er að setja gervigras. Staðan í dag er hins vegar þannig að völlurinn varla ber það að meistaraflokkur karla spili á honum en hann stundar flestar sínar æfingar á æfingasvæðinu. Það er hins vegar mjög mikilvægt fyrir knattspyrnuna á Akranesi að það komi gervigras úti, hvort sem það verður á æfingasvæðinu eða aðalvelli. Akraneshöllin er sprungin og nær varla að anna æfingar KFÍA yfir veturinn og hvað þá þegar allir leikir eru spilaðir þar einnig.“

Hvernig er staðan fyrir næsta tímabil? Verður þú áfram við stjórnvölinn og hver er staðan á leikmannamálum? „Já, planið er að ég haldi áfram með liðið. Staðan á leikmannamálum er mjög góð. Hópurinn sem við erum með í dag er mjög öflugur og svo eru margar ungar og efnilegar stelpur að koma upp úr yngri flokkunum hjá okkur. Við reiknum með því að flestar af þeim sem spiluðu með okkur í sumar munu vera áfram með okkur á næsta tímabili.“

Einhver lokaorð? „Ég vil þakka öllum sem standa að liðinu, hvort sem það eru sjálfboðaliðar, starfsmenn félagsins, aðstoðarþjálfarar, leikmenn og svo fólkið sem mætti á leiki hjá okkur í sumar. Takk fyrir mig!

Við erum mjög sátt með sumarið

Rætt við Skarphéðin Magnússon þjálfara kvennaliðs ÍA

Rætt við Skarphéðin Magnússon þjálfara kvennaliðs ÍA