medium

large

thumbnail

1536x1536

2048x2048

small

custom-size

Hundrað ára afmæli VLFA fagnað – Myndasyrpa

Framkvæmdir við strandstíg í Borgarnesi

Dúna og Dino nýir þjálfarar hjá ÍA

Allskyns í lífsnámsviku í MB

Segir Viðskiptaráð Íslands veruleikafirrt

Brjóstaskimun gerð nánast gjaldfrjáls

core/paragraph

ÍA og Grótta tókust á í síðustu umferð Lengjudeildar kvenna í knattspyrnu á laugardaginn og var leikurinn í Akraneshöllinni. Mikilvægi leiksins var mismunandi hjá liðunum, ÍA var um miðja deild en Grótta var í hörkubaráttu við Fram um að komast upp í Lengjudeildina ásamt FHL.

Fyrsta færi leiksins átti Arnfríður Auður Arnarsdóttir leikmaður Gróttu strax á þriðju mínútu þegar hún átti gott skot fyrir utan teig en Klil Keshwar markvörður ÍA varði vel. Vala María Sturludóttir fékk síðan góða stungusendingu frá Sunnu Rún Sigurðardóttur á 12. mínútu en markvörður Gróttu, Margrét Rún Stefánsdóttir, varði skot Völu Maríu. Á 25. mínútu gekk mikið á í vítateig Gróttu eftir hornspyrnu Sunnu Rúnar. Selma Dögg Þorsteinsdóttir átti skot að marki sem var bjargað á línu og Birna Rún Þórólfsdóttir fylgdi á eftir en aftur var komist fyrir skotið. Það var ágætis barátta í fyrri hálfleik og hart tekist á en lítið skildi á milli liðanna. Helstu færi ÍA komu eftir hornspyrnur og Bryndís Rún Þórólfsdóttir átti skalla í stöng tíu mínútum fyrir hálfleik og rétt eftir það var Erla Karitas Jóhannesdóttir á ferðinni í vítateignum og átti gott skot sem Margrét Rún sló burt. Skömmu síðar átti Lovísa Davíðsdóttir Scheving þrumuskot í þverslá ÍA og eftir fjörugan fyrri hálfleik var staðan markalaus, 0-0.

Seinni hálfleikur hófst á sömu nótum, Madison Brooke Schwartzenberger átti góðan skalla að marki Gróttu eftir hornspyrnu sem Margrét Rún varði og í kjölfarið fóru Gróttukonur í sókn sem endaði með því að Birna Rún fór aftan í Díönu Ástu Guðmundsdóttur sem féll í teignum. Úr vítaspyrnunni skoraði Arnfríður Auður af miklu öryggi og staðan 0-1 Gróttu í vil. Skagakonur blésu til sóknar eftir að hafa lent undir og náðu jöfnunarmarki átta mínútum síðar. Madison Brooke átti þá stungusendingu inn fyrir sem hrökk af varnarmanni Gróttu og beint fyrir fætur Erlu Karitas sem lagði hann snyrtilega í netið. Kaja fékk síðan gott færi tíu mínútum síðar en skot hennar fór yfir mark gestanna. Sigurmark leiksins kom svo á 71. mínútu og þar var Arnfríður Auður, sem var yngsti leikmaður vallarins ásamt Sunnu Rún og Völu Maríu, aftur að verki en þær eru allar fæddar 2008 eða á sextánda ári. Hún fékk aukaspyrnu af um 20 metra færi og skaut að marki sem hafnaði í markinu en Klil hefði átt að gera betur og verja skotið. Staðan 1-2 fyrir Gróttu og síðustu 20 mínúturnar reyndu heimakonur að jafna metin og hættulegasta færi þeirra kom þegar sex mínútur voru eftir. Erla Karitas fékk þá boltann á hægri kantinum og átti fyrirgjöf eða skot sem endaði í þverslánni og þar slapp Grótta með skrekkinn. Þegar tvær mínútur voru komnar fram í uppbótartíma skallaði Selma Dögg að marki eftir hornspyrnu og fór boltinn í leikmann Gróttu og vildu Skagakonur meina í hönd hennar en dómarinn var alls ekki á sama máli. Skagakonur urðu að lokum að sætta sig við tap í síðasta leik sumarsins en geta borið höfuðið hátt miðað við að vera nýliðar í deildinni.

FHL varð í efsta sæti deildarinnar með 40 stig og Fram og Grótta enduðu í 2.-3. sæti en Fram var með betri markamun og fer upp í Bestu deildina. Í þeirra stað koma í Lengjudeildina &nbsp;Fylkir og Keflavík og lið Hauka og KR koma upp úr 2. deild. HK var í 4. sæti með 30 stig og ÍA í 5. sæti með 26 stig. Í neðri hlutanum var ÍBV í 6. sæti með 25 stig, Afturelding var með 22 stig í sjöunda sæti. Grindavík í 8. sæti með 21 stig og tvö neðstu liðin voru Selfoss með 15 stig og ÍR með átta stig og féllu þau í 2. deild.

Markatala ÍA í sumar var 27:31 og þær unnu átta leiki, gerðu tvö jafntefli og töpuðu átta. Markahæst í sumar var Erla Karitas með níu mörk, Erna Björt Elíasdóttir skoraði átta mörk og Juliana Marie Paoletti skoraði þrjú mörk. Þjálfari ÍA var Skarphéðinn Magnússon og Aldís Ylfa Heimisdóttir var aðstoðarþjálfari.

Fréttaveita Vesturlands

Tap í síðasta leik sumarsins hjá Skagakonum