Skagamenn léku gegn Vestra í Bestu deild karla í knattspyrnu á Ísafirði í gær og lauk leiknum með markalausu jafntefli. Úrslitin verða að teljast sanngjörn því bæði lið fengu góð marktækifæri í leiknum sem þeim ekki tókst að nýta.

Liðin sóttu á víxl í byrjun leiks án þess að skapa sér afgerandi færi. Það var ekki fyrr en á 37. mínútu leiksins sem fyrsta alvöru marktækifærið kom og var það Skagamanna. Þá átti Haukur Andri Haraldsson góða fyrirgjöf inn í vítateig Vestramanna og Marko Vardic átti góðan skalla á markið, sem William Eskelinen varði mjög vel, en boltinn barst út til Hinriks Harðarsonar sem átti skot í utanverða markstöngina. Í kjölfarið náðu Skagamenn góðum tökum á leiknum og réðu ferðinni og fengu dauðafæri fjórum mínútum síðar. Þá fengu Skagamenn innkast og Árni Salvar Heimisson kastaði boltanum inn í vítateiginn þar sem Steinar Þorsteinsson átti skot á markið sem Eskelinen náði að koma hendi á en dugði ekki til og boltinn virtist vera að rúlla í markið þegar Eiður Aron Sigurbjörnsson náði að bjarga á marklínu og koma í veg fyrir að Skagamenn næðu forystunni.

Sama baráttan var í síðari hálfleik. Bæði lið komu boltanum í netið í fyrri hluta síðari hálfleiks en bæði mörkin voru dæmd af. Dæmd var hendi á Hlyn Sævar þegar hann kom boltanum í netið og rangstaða var dæmt á Vestramenn þegar þeir skoruðu. Enn var mark dæmt af vegna rangstöðu á 69. mínútu þegar Hinrik Harðarson kom boltanum í net Vestramanna.

Heimamenn í Vestra voru mun ákveðnari á lokakaflanum og átti þá Vladimir Tufegdzic skot í stöngina á Skagamarkinu og rétt fyrir leikslok náði Arnleifur Hjörleifsson að bjarga á marklínu skoti frá Benedikt Waren.

Þegar upp var staðið var jafntefli eins og fyrr segir nokkuð sanngjörn úrslit og eru Skagamenn áfram í sjötta sæti deildarinnar, nú með 25 stig. Næsti leikur þeirra er gegn Fram mánudaginn 12. ágúst á Elkem vellinum og hefst hann kl. 18:15.

Vestri og ÍA skildu jöfn á Ísafirði