Tvö efstu lið 3. deildar í knattspyrnu; Kári á Akranesi og Víðir í Garði, gerðu 1:1 jafntefli þegar liðin mættust í Akraneshöllinni í gær. Úrslitin þýða að Kári heldur enn tveggja stiga forskoti á Víði í efsta sæti deildarinnar.

Víðismenn byrjuðu leikinn betur en án þess að skapa sér góð marktækifæri. En það voru heimamenn í Kára sem fengu fyrsta marktækifæri leiksins þegar Marinó Hilmar Ásgeirsson átti hörkuskalla á markið eftir hornspyrnu en Joaquin Ketlun Sinigaglia í marki Víðis varði vel. Víðismenn komust næst því að skora þegar þeir áttu skot naumlega framhjá fjærstöng um miðjan hálfleikinn. Staðan var því markalaus í hálfleik í fremur tilþrifalitlum leik.

Káramenn komu ákveðnir til leiks í síðari hálfleik og náðu forystunni strax á 49. mínútu. Þá átti Sigurjón Logi Bergþórsson góðan sprett upp hægri kantinn og náði góðri fyrirgjöf fyrir markið þar sem Marinó Hilmar var mættur og afgreiddi boltann í netið. Minnstu munaði að Káramenn næðu að tvöfalda forystu sína skömmu síðar en varnarmönnum Víðis tókst að bjarga á síðustu stundu.

Þegar líða fór á hálfleikinn fóru Víðismenn að ógna meira og náðu þeir að jafna metin á 67. mínútu en þá kom fyrirgjöf fyrir markið sem Haraldur Smári Ingason afgreiddi af öryggi í bláhornið niðri. Óverjandi fyrir Kristján Hjörvar Sigurkarlsson í markinu. Eftir jöfnunarmarkið sóttu liðin á víxl en Káramenn fengu betri marktækifæri til þess að tryggja sér sigurinn. Átti Þór Llorens Þórðarson skot í þverslánna beint úr aukaspyrnu og Börkur Bernharð Sigurðsson fékk úrvalsfæri á lokamínútunum en náði ekki að pota í boltann fyrir opnu marki. Lokaniðustan 1:1 jafntefli, sem verða að teljast nokkuð sanngjörn úrslit miðað við gang leiksins.

Eftir leikinn er Kári enn í efsta sætinu með 27 stig og Víðismenn með 25 stig.

Næsti leikur Kára í 3. deildinni er gegn Elliða á Wurth vellinum í Árbæ sunnudaginn 21. Júlí kl 12:00.

Jafntefli hjá toppliðunum í þriðju deild