Spjallað við Aron Ými Pétursson þjálfara Kára

Knattspyrnufélagið Kári leikur í 3. deild karla í ár eins og síðustu tvö árin á undan en í fyrra endaði liðið í 5. sæti deildarinnar. Aron Ýmir Pétursson er á sínu öðru ári með liðið og honum til aðstoðar eru þeir Andri Júlíusson og Alexander Aron Davorsson. Blaðamaður Skessuhorns heyrði hljóðið í Aroni Ými í síðustu viku fyrir fyrsta leik sem verður næsta föstudag í Akraneshöllinni á móti liði Elliða. Aron segir að undirbúningstímabilið hafi gengið heilt yfir mjög vel, menn séu í toppstandi og tilbúnir í slaginn.

*Káramenn stefna hátt í sumar. Ljósm. aðsend*

Yngri leikmenn tekið miklum framförum

Hafa orðið einhverjar breytingar á liðinu frá síðasta tímabili? „Já, breytingarnar hafa verið þó nokkrar. Leikmenn hafa komið til baka eins og Oskar Wasilewski, Þór Llorens Þórðarson, Mikael Hrafn Helgason og síðan hefur Benjamín Mehic ákveðið að taka slaginn af fullum þunga með okkur sem er gríðarlegur styrkur. Einnig hafa yngri leikmenn tekið miklum framförum og eru orðnir mikilvægir póstar í liðinu. Að sama skapi eru Guðfinnur Þór Leósson og Hilmar Elís Hilmarsson orðnir hluti af leikmannahópi ÍA í Bestu deildinni. Marteinn Theodórsson tekur slaginn í Lengjudeildinni með ÍR og Gabríel Þór Þórðarson gekk til liðs við Víking Ólafsvík í 2. deild. Þá hefur Kristófer Áki Hlinason síðan verið að glíma við meiðsli í vetur.“ En hvernig verður samstarfið við ÍA í sumar? „Samstarfið við ÍA er þannig háttað að þjálfarateymi 2. flokks karla og Kára er það sama og stór hluti leikmannahóps Kára eru leikmenn á 2. flokks aldri hjá ÍA í bland við reynslumeiri leikmenn.“

Af tólf liðum í 3. deild eru níu lið á höfuðborgarsvæðinu, eitt lið að norðan, eitt að austan og Kári. Er þetta ekki þægileg deild að vera í upp á ferðalög og kostnað? „Mér finnst reyndar alvöru sjarmi að fara út á land og spila á misgóðum grasvöllum um landið. Það er líka mjög þroskandi fyrir unga leikmenn að fara út á land og spila og er oft mjög krefjandi verkefni. Svenni formaður þarf síðan að svara því hversu gott þetta er fyrir veskið!“

Síðan þið félluð árið 2021 hefur Kári endað í 5. sæti síðustu tvö tímabil í 3. deildinni. Á að stefna hærra í ár? „Að sjálfsögðu. Þó svo að lokamarkmiðið sé alltaf að bæta leikmennina og hjálpa þeim að taka næsta skref á sínum ferli þá viljum við klárlega vinna fleiri leiki, fá fleiri stig og enda hærra en í 5. sæti í deildinni á þessu tímabili.“

Verkaskiptingin er skýr

Nú ert þú þjálfari ásamt Andra Júlíussyni sem var með þér í fyrra og Alexander Aron Davorsson er nýr í þjálfarateymi Kára. Hvernig gengur samstarfið og eru einhverjar breytingar með komu Alla? „Samstarfið gengur mjög vel, verkaskiptingin er skýr og allir á sömu línu með það í hvaða átt við ætlum að stefna og hvernig við ætlum að komast þangað. Alli kemur mjög vel inn í þetta og þrátt fyrir að vera ekkert það gamall þá er hann búinn að þjálfa lengi með mjög góðum árangri. Hann kemur með öðruvísi pælingar inn í teymið sem hafa hitt mjög vel í mark hjá hópnum. Verst er bara þegar hann fer að tala um það að hann gæti ennþá verið að spila, það eru hugmyndir sem við skjótum hratt og örugglega niður!“

Þriðja árið í röð leikur Kári í 3. deild en lék í 2. deild á árunum 2018-2021. Hvernig líst Aroni Ými á þriðju deildina í sumar? „Mér líst mjög vel á hana, þar eru mörg vel þjálfuð lið og hún verður klárlega sterkari en í fyrra.“ Eitthvað að lokum? „Mæta á völlinn!“

„Viljum enda hærra í deildinni í sumar“

Spjallað við Aron Ými Pétursson þjálfara Kára

Spjallað við Aron Ými Pétursson þjálfara Kára