Brynjar Kristmundsson þjálfari Víkings Ólafsvíkur tekinn tali

Víkingur Ólafsvík spilar þriðja árið í röð í 2. deild karla í knattspyrnu í sumar en í fyrra hafnaði Víkingur í fimmta sæti deildarinnar. Brynjar Kristmundsson stýrir liðinu í sumar eins og á síðasta tímabili. Fyrsti leikur Víkings í deildinni er á móti Völsungi næsta laugardag á Ólafsvíkurvelli og hefst klukkan 16.

Blaðamaður Skessuhorns heyrði í Brynjari í lok síðustu viku og spurði hann fyrst hvernig undirbúningstímabilið hefði gengið í vetur. Brynjar segir að það hafi alveg gengið þokkalega. „Við höfum náð fínni frammistöðu í þessum undirbúningsleikjum og það hefur verið stígandi í þessu. Neikvæði hlutinn er að völlurinn okkar hefur verið undir snjó í mest allan vetur sem hefur leitt til þess að við höfum þurft að vera mikið inni í íþróttahúsi og í ræktinni. Leikirnir hafa því í kjölfarið verið örlítið erfiðir fyrir leikmenn líkamlega og við lent í mörgum litlum meiðslum sem hafa riðlað smá undirbúningnum. En undanfarnar vikur hafa verið mjög góðar og leikmenn að komast í betra form og með betri skilning á því hvernig við viljum spila.“ Eru allir leikmennirnir mættir til æfinga? „Allir erlendu leikmennirnir mættu snemma til landsins og munu strákarnir sem búa á höfuðborgarsvæðinu koma vestur núna á næstu dögum.“
Brynjar segir að töluverðar breytingar hafi orðið á liðinu frá síðasta tímabili. „Við vildum stækka hópinn frá því í fyrra og höfum náð því. Við náðum að halda svona kjarnanum í liðinu, misstum einhverja leikmenn sem við vildum halda en höfum að mínu mati náð að fylla í þau skörð og rúmlega það.“

*Frá æfingu Víkings síðasta föstudag. Ljósm. af*

Margir vellir með skemmtilegan sjarma

Það má með sanni segja að 2. deildin sé mikil landsbyggðadeild. Þrjú lið koma af Norðurlandi, tvö af Austurlandi, tvö af Suðurlandi, tvö af Suðurnesjum, tvö í kringum höfuðborgarsvæðið og þið eruð fulltrúar Vesturlands. Hvernig líst þér á öll þessi ferðalög og verður þetta ekki bara gaman? „Jú, það er alltaf gaman að fara um landið og spila fótbolta. Margir af þessum völlum hafa skemmtilegan sjarma og það sem einkennir þessa aðra deild er hvað aðstæður á milli valla eru ólíkar. Við þurfum að vera klárir í alls konar aðstæður.“

Hver eru markmið liðsins fyrir sumarið? „Við, ásamt örugglega í kringum átta liðum, erum með það markmið að komast upp úr deildinni. Tilfinningin er sú að þetta sé mjög jöfn deild, örlítið sterkari en hún var í fyrra þannig að við þurfum heldur betur að vera „on it” í 22 umferðir.

Eru einhverjir ungir og efnilegir leikmenn sem gætu fengið tækifæri í sumar? „Við höfum spilað mörgum ungum og efnilegum leikmönnum á undirbúningstímabilinu og hafa þeir strákar staðið sig mjög vel. Ef þeir halda áfram á þessari braut munu þeir klárlega fá tækifæri í deildinni í sumar. En það er alveg eins með þá og aðra leikmenn að þeir verða að vera tilbúnir að leggja allt í sölurnar á hverri einustu æfingu, þá koma tækifærin.“

Vel hugsað um okkur

Ertu sáttur við aðstöðuna, umgjörð liðsins og stuðninginn í bænum? „Yfir sumarið erum við með frábæra aðstöðu. Glæsilegan gervigrasvöll, líkamsrækt og sundlaug, allt á sama blettinum. Yfir veturinn getur þetta verið erfitt þar sem völlurinn er ekki upphitaður og þjónustaður yfir allan veturinn þannig að við gátum lítið notað hann frá janúar til um miðjan apríl sem er alls ekki gott. Ekki bara fyrir okkur heldur allt yngri flokka starfið sem er alltaf að stækka. Umgjörðin í kringum liðið er mjög góð og er hugsað vel um okkur. Ég vil sjá stuðninginn á vellinum ennþá meiri en hann var síðasta sumar því strákarnir í hópnum eru að leggja ótrúlega mikið á sig til þess að gera vel fyrir Víking Ólafsvík,“ segir Brynjar að lokum.

„Tilfinningin er sú að þetta sé mjög jöfn deild“

Brynjar Kristmundsson þjálfari Víkings Ólafsvíkur tekinn tali

Brynjar Kristmundsson þjálfari Víkings Ólafsvíkur tekinn tali