medium

large

thumbnail

1536x1536

2048x2048

small

custom-size

„Við eigum klárlega heima í Lengjudeildinni“

Til hamingju með daginn!

Birna Ágústsdóttir sett sýslumaður á Vesturlandi

Drífa með gull og silfur á Íslandsmótinu

Sveitarfélagið Stykkishólmur gert upp með 40 milljóna króna tapi 2023

Ráðningarráð tekur til starfa hjá Akraneskaupstað

core/paragraph

Þriðji leikur Þórs Akureyrar og Skallagríms í úrslitakeppni fyrstu deildar karla í körfuknattleik fór fram í Höllinni á Akureyri á laugardagskvöldið. Þór náði að jafna metin í síðustu viku í 1-1 eftir sigur í Fjósinu í Borgarnesi og því var ansi mikið undir í þessari viðureign en þrjá sigra þarf til að komast áfram í undanúrslitin.

Gestirnir úr Nesinu voru yfir nánast allan fyrsta leikhlutann en það munaði þó aldrei meira en sex stigum á milli liðanna og staðan 20:23 fyrir Skallagrími eftir fyrsta fjórðung. Skallarnir byrjuðu síðan betur í öðrum leikhluta en Þórsarar komust síðan yfir í fyrsta skiptið í leiknum eftir rúmlega þriggja mínútna leik, staðan 32:30. Skallagrímur komst síðan aftur yfir áður en Þór kom til baka og leiddi með þremur stigum í hálfleik, staðan 44:41 og allt í járnum.

Í þriðja leikhluta voru Þórsarar með yfirhöndina allan tímann og svo virtist sem gestirnir væru að missa leikinn frá sér. Þeir hittu alls ekki vel á köflum en neituðu að gefast upp og náðu að laga stöðuna aðeins fyrir fjórða og síðasta fjórðung, staðan 66:60 Þór í vil. Heimamenn náðu síðan ellefu stiga forystu um miðbik fjórða leikhluta, 83:72, en Skallagrímur náði síðan með gífurlegri baráttu að minnka muninn í þrjú stig með körfu frá Björgvini Hafþóri Ríkharðssyni þegar rétt rúm mínúta var eftir, staðan 89:86 og allt á suðupunkti. Nicolas Elame setti síðan niður tvist fyrir gestina þegar hálf mínúta var eftir, staðan 89:88 og í kjölfarið hitti Harrison Butler ekki úr þriggja stiga skoti sínu þegar sjö sekúndur lifðu af leik. Skallagrímsmenn geystust í lokasóknina og reyndu að stela sigri en skot Marinós Þórs Pálmasonar úr þröngu færi var blokkerað á síðustu sekúndunni og Þór fagnaði naumum en mikilvægum sigri, lokatölur 89:88 fyrir Þór.

Darius Banks var atkvæðamestur hjá Skallagrími með 37 stig og 17 fráköst, Nicolas Elame skoraði 24 stig og tók 10 fráköst og Davíð Guðmundsson var með 9 stig. Hjá Þór var Reynir Barðdal með 24 stig, Jason Gigliotti skoraði 20 stig og tók 20 fráköst, Baldur Jóhannesson var með 15 stig og 10 fráköst, Harrison Butler var með 14 stig og Smári Jónsson með 11 stig.

Fjórði leikur liðanna í 8-liða úrslitum fer fram í Borgarnesi næsta miðvikudag og hefst klukkan 19.15. Þar er allt undir fyrir Skallagrími því ef þeir tapa eru þeir úr leik í baráttunni um sæti í Subway deild karla á næsta tímabili. Með sigri jafna þeir metin og fara í úrslitaleik um sæti í undanúrslitum næsta laugardag á Akureyri. Sigurvegarinn úr þeirri viðureign mætir liði ÍR sem sópaði Selfyssingum í sumarfrí og vann viðureignina 3-0.

Fréttaveita Vesturlands

Skallagrímur tapaði naumlega fyrir Þór