Vesturlandsliðin Kári, Víkingur Ólafsvík og Skallagrímur spiluðu í Lengjubikarnum um helgina þegar þau léku síðustu leiki sína í B og C deild karla í knattspyrnu í ár.

Kári kominn í undanúrslit

Kári og Ægir áttust við í riðli 3 í B deild á laugardaginn og var leikurinn í Akraneshöllinni. Kára nægði jafntefli í leiknum til að komast í undanúrslit og þeir gerðu gott betur en það. Ægir komst þó yfir í leiknum á 18. mínútu með marki frá Atla Rafni Guðbjartssyni og þannig var staðan í hálfleik. Máni Berg Ellertsson jafnaði síðan metin eftir rúman korters leik í seinni hálfleik og staðan 1-1. En sjö mínútum fyrir leikslok skoraði varamaðurinn Börkur Bernharð Sigmundsson sigurmark leiksins fyrir Kára en hann hafði komið inn á mínútu áður. Það urðu lokatölur leiksins og Káramenn eru á leið í undanúrslit ásamt liðum Hauka, Þrótti Vogum og KFA sem leika öll í 2. deild á Íslandsmótinu í sumar, einni deild ofar en Kári sem leikur í 3. deild. Undanúrslitin fara fram 19. og 20. apríl en næsti leikur Kára er á móti 5. deildar liði Uppsveita í 1. umferð Mjólkurbikarsins. Hann verður laugardaginn 6. apríl í Akraneshöllinni og hefst klukkan 14.

Víkingur tapaði á móti KV

KV og Víkingur Ó. mættust í riðli 2 í B deild á laugardaginn og var viðureignin á KR-velli í Frostaskjóli. Ekkert mark var skorað í fyrri hálfleik en Eiður Snorri Bjarnason skoraði fyrsta mark leiksins fyrir KV á 56. mínútu. Vilhelm Bjarki Viðarsson kom KV í 2-0 nokkru síðar áður en Arnór Siggeirsson skoraði fyrir Víking á lokamínútu leiksins, lokatölur 2-1 fyrir KV. Víkingur endaði í 2. sæti í riðlinum með átta stig, fimm stigum á eftir Þrótti Vogum sem varð í efsta sæti. Næsta verkefni Víkings er í Mjólkurbikarnum þegar þeir mæta þriðju deildar liði Elliða en Víkingur leikur í 2. deild í sumar á Íslandsmótinu. Leikurinn verður fimmtudaginn 4. apríl á Wurth vellinum í Árbæ og hefst klukkan 19.15.

Skallagrímur vann KM

KM og Skallagrímur spiluðu í riðli 4 í C deild í gær og var leikurinn í Kórnum í Kópavogi. Ólafur Bjarki Stefánsson kom Sköllunum yfir á 24. mínútu og á lokamínútu fyrri hálfleiks skoraði Elís Dofri Gylfason annað mark gestanna og staðan 0-2 í hálfleik. Rúben Narciso hleypti smá spennu í leikinn í byrjun seinni hálfleiks með marki fyrir KM en Ólafur Bjarki sá til þess að Skallagrímur fór heim með öll stigin þrjú þegar hann skoraði á 60. mínútu sitt annað mark. 1-3 urðu lokatölur og Skallagrímur lauk leik í riðlinum í þriðja sæti með sex stig. Næst mætir Skallagrímur Ægi í Mjólkurbikarnum laugardaginn 6. apríl og verður eflaust verðugt verkefni því Ægir spilar í 2. deild í sumar en Skallarnir í þeirri fjórðu. Leikurinn fer fram í Akraneshöllinni og hefst klukkan 20.

Kári í undanúrslit í Lengjubikarnum