Þrjú lið af Vesturlandi spiluðu í Lengjubikarnum í knattspyrnu um helgina og var niðurstaðan einn sigur og tvö jafntefli.

Leiknir R. og ÍA áttust við í A deild karla í riðli 4 í gær og var leikurinn í Breiðholti. Steinar Þorsteinsson kom Skagamönnum yfir strax á sjöttu mínútu leiksins en Shkelzen Veseli jafnaði metin fyrir Leikni á 26. mínútu og staðan 1-1 í hálfleik. Það var síðan Árni Salvar Heimisson sem kom inn á í hálfleik í stað Jón Gísla Eyland sem skoraði sigurmark leiksins á 51. mínútu og kom ÍA á topp riðilsins.Skagamenn eru efstir með tíu stig og hafa lokið leik en KA er eina liðið sem getur náð þeim að stigum. Þeir þurfa hins vegar að vinna stórsigur á útivelli á móti Leikni um næstu helgi því ÍA hefur sjö mörk í plús á KA. Það er því ansi líklegt að Skagamenn séu komnir í undanúrslit sem eru áætluð miðvikudaginn 13. mars og mæta liði Vals að öllum líkindum. Úrslitaleikurinn verður síðan sunnudaginn 17. mars.

Víkingur Ólafsvík tók á móti liði Elliða í 3. umferð í riðli 2 í B deild karla á laugardaginn og var leikurinn á gervigrasvellinum í Ólafsvík. Luke Williams skoraði fyrsta mark leiksins fyrir Víking á 15. mínútu og þremur mínútum síðar kom Eyþór Örn Eyþórsson heimamönnum í tveggja marka forystu. Fjórum mínútum eftir það minnkaði Eyjólfur Andri Sverrisson muninn fyrir gestina og staðan 2-1 í hálfleik fyrir Víking. Tíu mínútum fyrir leikslok jafnaði Hlynur Magnússon metin fyrir Elliða og það urðu lokatölur leiksins, 2-2. Þróttur Vogum er efstur í riðlinum með sjö stig, Árbær er með sex stig og Víkingur með fimm stig þegar tvær umferðir eru eftir. Næsti leikur Víkings er gegn liði Árbæjar laugardaginn 16. mars á Ólafsvíkurvelli og hefst klukkan 14.

Kvennalið ÍA og Grindavíkur léku í hádeginu á laugardaginn í B deild og var leikurinn í Akraneshöllinni. Ísabel Jasmín Almarsdóttir kom gestunum yfir á sjöttu mínútu en á tveggja mínútna kafla undir lok fyrri hálfleiks komu þær Bryndís Rún Þórólfsdóttir og Erna Björt Elíasdóttir Skagakonum yfir og staðan 2-1 í hálfleik ÍA í vil. Eftir tíu mínútur í seinni hálfleik var Grindavík aftur komið í forystu með mörkum frá Mist Smáradóttur og Dröfn Einarsdóttur og staðan 2-3. En Erna Björt sá til þess með sínu fimmta marki í Lengjubikarnum þetta árið að niðurstaðan varð jafntefli þegar hún skoraði á 71. mínútu. Lokatölur 3-3 og ÍA er í öðru sæti B deildar með sjö stig en efst er Afturelding með níu stig eftir þrjá leiki. Í fjórðu umferð af sjö mætir ÍA liði Fram næsta laugardag í Akraneshöllinni og hefst leikurinn klukkan 11.

Þrír leikir voru í Lengjubikarnum um helgina