Það var nóg að gera hjá Vesturlandsliðunum um helgina í Lengjubikarnum í knattspyrnu. Skagamenn léku fyrir norðan eftir að hafa unnið stórsigur í fyrsta leik og lið Víkings Ólafsvíkur og Kára og lið ÍA kvennamegin hófu keppni í sínum deildum.

KA og ÍA mættust í Boganum á Akureyri á föstudagskvöldið í A deild karla og urðu gestirnir að sætta sig við tap. Framherjinn Hinrik Harðarson kom Skagamönnum yfir á 25. mínútu en skömmu síðar fékk fyrirliði ÍA, Arnór Smárason, tvö gul spjöld á þriggja mínútna kafla og leikmenn ÍA því einum færri í næstum klukkustund. KA menn nýttu sér það því á lokamínútu fyrri hálfleiks skoraði Ásgeir Sigurgeirsson mark fyrir heimamenn og staðan jöfn í hálfleik. Ásgeir var síðan aftur á ferðinni á 57. mínútu fyrir KA og það reyndist sigurmarkið í leiknum, lokatölur 2-1 fyrir norðanmenn og þeir tylltu sér á topp riðilsins með þessum sigri. Næsti leikur ÍA er á móti Dalvík/Reyni í Akraneshöllinni næsta laugardag og hefst klukkan 14.

Víkingur vann sigur á Vængjum Júpiters

Vængir Júpiters og Víkingur Ó. áttust við í Egilshöll á laugardaginn í B deild karla og þar byrjuðu gestirnir einkar vel því á fyrstu mínútunni skoraði Kristófer Máni Atlason fyrir Víking. Reynsluboltinn Þorsteinn Már Ragnarsson kom síðan Víkingi í 0-2 eftir næstum klukkutíma leik og gestirnir í góðum málum. Tveimur mínútum fyrir leikslok skoraði Bjarki Fannar Arnþórsson fyrir heimamenn en það dugði skammt og Víkingar fögnuðu sínum fyrsta sigri, lokatölur 1-2. Víkingur á næst heimaleik gegn Þrótti Vogum næsta sunnudag á Ólafsvíkurvelli og hefst hann klukkan 14.

Stórsigur Kára

Kári tók á móti KFK í B deild karla á föstudagskvöldið og var leikurinn í Akraneshöllinni. Ekkert mark var skorað í fyrri hálfleik en í þeim seinni fóru hlutirnir að gerast. Mikael Hrafn Helgason kom Kára yfir eftir tíu mínútna leik og mínútu síðar skoraði Sigurjón Logi Bergþórsson annað mark Kára. Patrekur Hafliði Búason minnkaði síðan muninn fyrir KFK skömmu síðar en leikmenn Kára gerðu út um leikinn á ótrúlegum þriggja mínútna kafla með þremur mörkum. Fyrst skoraði Þór Llorens Þórðarson á 79. mínútu, mínútu síðar komst Hilmar Halldórsson á blað og tveimur mínútum eftir það gulltryggði Hektor Bergmann Garðarsson stórsigur Kára, lokatölur 5-1. Næsti leikur Kára er á móti KFG þriðjudaginn 27. febrúar í Akraneshöllinni og hefst klukkan 20.

Heimasigur Skagakvenna

Viðureign ÍA og ÍR í B deild kvenna fór fram í Akraneshöll um hádegisbilið á laugardaginn. Erna Björt Elíasdóttir kom Skagakonum yfir á sjöttu mínútu og staðan 1-0 fyrir ÍA í hálfleik. Margrét Ósk Borgþórsdóttir varð síðan fyrir því óláni að skora sjálfsmark fyrir ÍR á 60. mínútu og þar við sat, lokatölur 2-0 fyrir ÍA. Skagakonur eiga leik næsta laugardag og langferð því þær mæta liði FHL í Fjarðabyggðarhöllinni á Reyðarfirði klukkan 13.30.

Lengjubikarinn fór á fullt um helgina