Umbreyta má fjárstofninum með hrútum ættuðum frá Þernunesi
„Aldrei hefur áður verið að finna viðlíka úrval glæsigripa um allt land. Ég veit út frá samtölum við glögga bændur og ráðunauta á þeim svæðum þar sem ég hef ekki sjálfur séð lömb, að ástandið er jafnvel enn stórkostlegra en því sem ég lýsi,“ segir Jón Viðar Jónmundsson sauðfjárræktarráðunautur m.a. í grein sem hann ritaði og birtist í Skessuhorni í dag. Þar fjallar hann ítarlega um lambhrútasýningar haustsins allt frá Kjós og norður á Strandir. Á þessum sýningum, skrifar Jón Viðar; „gat áreiðanlega að líta glæsilegra úrval hrúta en nokkru sinni áður. Báru þeir frábærum árangri ræktunarstarfs bænda á svæðinu lofsamlegt vitni.“
Grein sinni lýkur Jón Viðar með hvatningarorðum til bænda: „Nú bíður fjárbænda að umbreyta íslensku sauðfé gegnum sæðingar með hrútum ættuðum frá Þernunesi. Þannig er auðvelt að stefna að því að aðeins verði sett á arfhrein ARR hrútlömb haustið 2026 hér á landi. Þá verður stutt í að hægt verði að lýsa yfir að riðuveikinni hafi verið eytt á Íslandi. Þetta hljóta allir aðdáendur íslensku sauðkindarinnar að sameinast um að gera.“