medium

large

thumbnail

1536x1536

2048x2048

small

custom-size

Níutíu ára Einarsbúð er elsta matvöruverslun landsins

Verkfall boðað í Grundaskóla á Akranesi 6. janúar

Upplestur grunnskólanemenda í Brún

Hótel Varmaland hlýtur vottun frá Vakanum

Ýmis mál rædd á fundi bæjarráðs Akraneskaupstaðar

Nemendur í listdansi fengu að stíga á stóra sviðið

core/paragraph

core/heading

<h2>Rætt við séra Ægir Örn Sveinsson og Paula Nerenberg Sveinsson, prestshjón í Ólafsvík</h2>

Ægir Örn Sveinsson er Seyðfirðingur í grunninn og starfaði lengst af við forritun. Fyrir um fimmtán árum síðan fann hann guðfræðina kalla á sig og hóf þá nám. Hann er nú útskrifaður guðfræðingur og nýtekinn við sem prestur í Ólafsvíkur- og Ingjaldshólsprestakalli á Snæfellsnesi. Hann flutti því til Ólafsvíkur í byrjun marsmánaðar frá Kópavogi ásamt eiginkonu sinni til sex ára, Paulu Nerenberg Sveinsson. Paula er frá Argentínu en máttur Internetsins leiddi þau saman. Hún segir smábæjarlífið á Íslandi eiga vel við sig en hún kann vel við kyrrðina og öryggið sem fylgir smærri samfélögum. Blaðamaður Skessuhorns hitti hjónin í Ólafsvíkurkirkju og fékk að heyra þeirra sögu.

Kennari, forritari og prestur Ægir er fæddur í Vestmannaeyjum og var ungur strákur þegar gaus árið 1973, en þá flúði fjölskyldan upp á land og fór aldrei aftur til Eyja. Fjölskyldan settist í kjölfarið að á Seyðisfirði eftir stutta viðkomu í Reykjavík. ,,Ég segist alltaf vera Seyðfirðingur og tala um Seyðisfjörð sem heima,“ segir Ægir. Aðspurður segist hann hafa tekið virkan þátt í kirkjustarfi þar sem barn. ,,Á mínum uppvaxtarárum var virkt barna- og æskulýðsstarf í kirkjunni á Seyðisfirði og ég fór yfirleitt líka í sumarbúðir Þjóðkirkjunnar á Eiðum. Þaðan kemur mín tenging við kirkjuna og kristna trú,“ segir Ægir sem þó sá ekki fyrir sér þá að verða prestur. ,,Það er allskonar fólk sem hefur áhrif á mann í gegnum lífið. Ég var með flottan kennara í grunnskóla og vildi verða kennari eins og hann. Eftir grunnskóla fór ég þess vegna í Menntaskólann í Reykjavík með það í huga að verða kennari. Ég fór svo í Kennaraháskólann og kláraði námið þar en entist ekki lengi í kennslu. Ég er svolítill eilífðarstúdent, algjör Georg, og er með nokkrar háskólagráður. Mig langaði að prófa að skipta um vettvang og fór þá að læra tölvunarfræði en ég hef unnið við upplýsingatækni stærstan hluta af mínum ferli, aðallega við forritun,“ segir Ægir.

Fann köllun Ægir vann sem forritari hjá ýmsum fyrirtækjum, nú síðast hjá Norðuráli á Grundartanga sem hann fer fögrum orðum um. ,,Norðurál er flott fyrirtæki og skemmtilegur vinnustaður. Þannig að það var alls ekki það að ég væri ekki að njóta mín í vinnunni. En fyrir svona 15 árum dró vinur minn mig með sér á biblíulestur í Lindakirkju. Ég hef verið að lesa og hugsa um guðfræði síðan ég var tíu ára og verið virkur í að iðka trú mína. Á biblíulestrinum sköpuðust umræður og mér fannst þetta svo gaman og fannst eins og ég hefði eitthvað að gefa. Upp frá þessu kviknaði hugmyndin að læra guðfræði. Ég heyrði að erfitt væri að fá vinnu sem prestur þar sem yfirleitt eru margir um brauðið og þess vegna erfitt að komast að óreyndur. Ég fann samt þessa köllun og dreif mig í guðfræðinám meðfram forrituninni, ég var einhver tíu ár að klára námið en þetta hafðist á endanum,“ segir Ægir með brosi á vör.

core/image

<figure class="wp-block-image size-large"><img src="https://umsjon.skessuhorn.is/wp-content/uploads/2023/03/Koma-ur-olikum-menningarheimum-en-sameinast-i-forritun-og-kristinni-tru_2-1200x900.jpg" alt="" class="wp-image-62981" /><figcaption>Ægir og Paula við Iguazú fossana í Argentínu. Ljósm. aðsend.</figcaption></figure>

Að kynnast samfélaginu Í desember síðastliðnum sótti Ægir um starf sóknarprests í Ólafsvíkur- og Ingjaldshólssókn. Í byrjun árs hafði hann fengið starfið og flutti til Ólafsvíkur nú í byrjun marsmánaðar. ,,Hér er búið að taka ofsalega vel á móti okkur og við finnum fyrir miklum hlýhug og vinsemd. Þetta samfélag er kannski ekki mjög ólíkt því sem ég bjó í á Seyðisfirði að stærð. Sem prestur í svona samfélagi nær maður að kynnast og tengjast söfnuðinum sínum mun betur en prestar á höfuðborgarsvæðinu. Þar er svolítið útilokað að þekkja öll sín sóknarbörn en hér er það alveg hægt,“ segir Ægir sem hefur verið að kynnast samfélaginu undanfarnar vikur en Ólafsvíkurkirkja og Ingjaldshólskirkja tilheyra hans embætti. ,,Ég byrjaði á því að kynnast sóknarnefndum kirknanna. Svo er ég búinn að halda messur í báðum kirkjunum og fékk að sjá nokkur andlit í messukaffinu. Við hjónin ákváðum svo bæði að fara í kirkjukórinn til að kynnast fólki betur. Kórinn er mjög skemmtilegur en mér finnst rosalega gaman að syngja og hef sungið í nokkrum kórum. Kórinn hérna syngur ekki bara í messum, hér eru líka tónleikar, stundum er farið í söngferðalög og eitthvað fleira skemmtilegt. Það er gaman að kynnast fólki í gegnum sameiginlegt áhugamál en svo er þetta auðvitað líka tenging við kirkjuna þó ég sé í öðru hlutverki í messum. Ég er samt ekki prestur á kóræfingum, þá er ég bara einn af hópnum,“ segir Ægir.

Menningarmunurinn Ægir kynntist eiginkonu sinni á netinu en Paula er frá Buenos Aires í Argentínu. Paula segir Ísland og Argentínu mjög ólík lönd. ,,Þegar við vorum búin að spjalla í einhvern tíma bað hann mig um að koma til Íslands. Fyrir mér var Ísland mjög framandi svo ég byrjaði að gúggla landið,“ segir Paula. ,,En í Argentínu eru formlegri siðir svo ég sagði honum að hann þyrfti fyrst að koma til mín og hitta foreldra mína. Hann kom þá í heimsókn til Argentínu. Það er mikill munur á menningunni í þessum löndum og við hlæjum oft að því þegar hann kom fyrst heim til okkar. Í Argentínu er siður að fara ekki úr útiskónum inni á heimilum, ég veit sjálf ekki af hverju það er. En þegar Ægir kom fyrst í heimsókn fór hann úr skónum og kom sér vel fyrir í sófanum. Við vorum svolítið hissa á þessu og mamma sagði við mig; ,,honum hlýtur að líða svona svakalega vel hjá okkur,“,“ segir Paula og hlær.

Giftu sig eftir mánuð Heimsóknin gekk vel og í framhaldinu ákvað parið að Paula myndi dvelja á Íslandi í þrjá mánuði. ,,Ég vildi sjá til hvernig mér litist á þetta allt saman. Það leið svo ekki nema mánuður þangað til við vorum orðin gift, svo þetta gerðist mjög hratt. Brúðkaupið var smátt en við buðum bara fjórum í athöfnina. Ég vaknaði samt daginn eftir brúðkaupið í áfalli og hugsaði ,,Ó nei, hvað var ég að gera.“ Ægir hafði samt engar áhyggjur og ég var fljót að jafna mig. Við erum búin að vera gift í sex og hálft ár núna en mér líður mjög vel hér og er yfir mig hamingjusöm þó þetta hafi verið mikið að melta í byrjun. Menningarsjokkið var mikið enda var þetta stór ákvörðun. Ég kom líka til landsins í lok september og kom því beint í veturinn, það var svolítið erfitt. Ægir var samt mjög stuðningsríkur og með tíð og tíma lærði ég íslensku, fór í háskóla, tók ökupróf, fékk kennitölu og gat byrjað að vinna,“ segir Paula en hún lærði íslensku við Háskóla Íslands og vefforritun við Tækniskólann.

<figure class="wp-block-image size-large"><img src="https://umsjon.skessuhorn.is/wp-content/uploads/2023/03/Koma-ur-olikum-menningarheimum-en-sameinast-i-forritun-og-kristinni-tru_3-1200x2133.jpg" alt="" class="wp-image-62982" /><figcaption>Ægir ásamt tengdaforeldrum sínum á rólegum sunnudegi í Argentínu. Ljósm. aðsend.</figcaption></figure>

Fór úr gyðingdómi í kristna trú Paula er fædd gyðingur en ákvað að skipta yfir í kristna trú 19 ára sem var fjölskyldu hennar erfitt. ,,Mamma talaði ekki við mig í viku og ég held hún hafi næstum fengið hjartaáfall. Hún sá svo hvað kirkjan var að gera mér gott og kemur í dag stundum með mér í messu,“ segir Paula en fjölskylda hennar eru gyðingar langt aftur í ættir. ,,Forfeðrum mínum tókst einhverjum á sínum tíma að flýja inn í skóg frá stríðinu. Afi minn var frá Rúmeníu og þegar hann kom til Argentínu neitaði hann að tala rúmensku þar sem illa hafði verið farið með hann þar. Mamma veit svo t.d. ekki hvort hún eigi systkini í Rúmeníu en saga fjölskyldunnar er stór og mikil tengd trúnni, þess vegna var þetta henni erfitt þegar ég skipti um trú.

Það æxlaðist út frá því að ég byrjaði að skoða Biblíuna en mér var ekki leyft að lesa hana þegar ég var yngri. Mér fannst trúin áhugaverð og prufaði svo að fara í kirkju. Þegar ég skipti um trú hét ég því að ég myndi giftast presti,“ segir Paula og hlær. ,,Þess vegna var það frekar fyndið þegar ég kynntist Ægi og komst að því að hann vildi verða prestur.“ Ægir bætir við: ,,Það er gaman að sameinast í trúnni en ég æfi allar mínar predikanir fyrir hana og hún segir mér svo hvort þær séu nógu áhugaverðar.“

Stolt af Ægi Paula segist horfa með aðdáun til Ægis en hann sýndi mikla þrautseigju í náminu og missti aldrei sjónar af markmiðinu. ,,Hann er mjög góður forritari og mér fannst ótrúlegt að hann vildi skilja við þessa miklu þekkingu sem hann var búin að byggja upp í forritunargeiranum. Ægir er mjög ákveðinn og hann var alltaf einbeittur á að ná sínu markmiði þó námið hafi tekið langan tíma. Ég er mjög stolt af honum en hann er mikil fyrirmynd og sýnir okkur að við eigum að fylgja okkar draumum eftir. Ég er ekki góð í að setja mér markmið og fylgja þeim eftir en það er hvetjandi að fylgjast með Ægi,“ segir Paula.

Fólkið er fallegt og yndislegt Paula segist ekki hafa þurft að hugsa sig um þegar flutningar til Ólafsvíkur komu til talsins. ,,Ég sagði við Ægi: ,,Ég er nú þegar búin að flytja frá Argentínu til Reykjavíkur, svo ég hlýt að geta flutt til Ólafsvíkur,“ en ég er rosalega ánægð hérna. Að finna alls staðar fyrir öryggi og búa við náið, hljóðlátt samfélag, ég kýs það fram yfir stórar borgir,“ segir Paula. Ægir skýtur inn í: ,,Við bjuggum á Reyðarfirði í tæpt ár sem var ákveðin tilraun en okkur fannst báðum æðislegt að vera þar.“

Paula bætir við: ,,Fossinn, fjöllin og fólkið, þetta er allt yndislegt. Þegar við komum hingað með húsgögnin í flutningabíl var fólk mætt fyrir utan húsið okkar í rigningunni til að hjálpa okkur að bera allt inn. Það hafa allir verið svo hjálpsamir og tekið vel á móti okkur.“

<figure class="wp-block-image size-large"><img src="https://umsjon.skessuhorn.is/wp-content/uploads/2023/03/Koma-ur-olikum-menningarheimum-en-sameinast-i-forritun-og-kristinni-tru_4-1200x1600.jpg" alt="" class="wp-image-62983" /><figcaption>Ægir og Paula giftu sig óvænt einungis mánuði eftir að Paula kom til Íslands. Ljósm. aðsend.</figcaption></figure>

Mun skíra afabörnin Paula og Ægir eru nú að aðlagast nýjum heimahögum en sjá fyrir sér að stofna forritunarfyrirtæki í náinni framtíð sem Paula mun koma til með að sjá um. Hún er nú að bæta við sig þekkingu í vefforritun en Ægir mun aðstoða hana þegar þörf er á, enda starfað í forritunarheiminum í yfir 20 ár. Í bili eru þau þó að koma sér fyrir á heimili sínu sem er verkefni út af fyrir sig. ,,Enn sem komið er hefur Paula verið að setja saman húsgögn og taka upp úr kössum sem er mikið verkefni en við erum ennþá bara að koma okkur fyrir,“ segir Ægir sem sjálfur hefur verið að fóta sig í nýju starfi. ,,Ég er einmitt að fara að skíra í fyrsta sinn næstu helgi. Ég á fjögur börn en elsta stelpan mín er þrítug og var að eignast tvíbura, svo ég er nýorðinn afi. Ég er svo heppinn að fá að skíra þau og hlakka mikið til. En ég á þrjár dætur og einn son en þrjú elstu eru komin yfir tvítugt, yngsta stelpan mín er svo fjórtán ára og mun koma til með að kíkja til okkar í heimsókn og dvelja eitthvað hjá okkur hér í Ólafsvík,“ segir Ægir.

Vill byggja upp barnastarf Framtíðarsýn sóknarinnar segir Ægir m.a. vera að byggja upp barna- og æskulýðsstarf. Hann ætlar þó ekki að fara of geyst af stað. ,,Í bili langar mig að komast betur inn í samfélagið og ná áttum, kynnast starfinu og komast vel af stað þar. Til lengri tíma langar mig að skapa hér öflugt barna- og æskulýðsstarf en við stefnum á að fara af stað með það næsta vetur. Það er grundvöllurinn fyrir því að fólk tengist kirkjunni síðar í lífinu, þannig að barnastarfið er dýrmætt. Ég ætla að passa mig á því að byggja starfið upp hægt og rólega svo ég springi ekki á limminu. Öldrunarstarf finnst mér einnig heillandi og ég sé fyrir mér að kíkja reglulega á hjúkrunarheimilið. Ég vil að fólk viti af mér og að ég er aðgengilegur ef einhver vill ræða málin. Tala nú ekki um ef fólki vantar einhvern stuðning sem ég get veitt. Það er eitt það mikilvægasta í starfi prests að hlusta og veita stuðning,“ segir Ægir.

Stórar stundir í sorg og gleði Að lokum segjast hjónin vera spennt fyrir komandi tímum. ,,Við erum glöð að vera komin hingað og það eru mikil forréttindi að fá að sinna þessu starfi. Ég var í mjög fínni vinnu áður en ég ákvað að framkvæma þessa breytingu en ég er kominn í þetta starf af einlægum áhuga. Fyrir mér eru líka forréttindi að fylgja fólki á stórum stundum lífsins í sorg og gleði, það er ótrúlega merkilegt að fá að vera hluti af því. Það skiptir mig gríðarlega miklu máli að byggja upp samfélag í kristinni trú, miðla kristinni trú og leyfa fólki að finna hvað hún er mikilvæg, sjálfur hef ég þá sannfæringu,“ segir Ægir að lokum.

Fréttaveita Vesturlands

Koma úr ólíkum menningarheimum en sameinast í forritun og kristinni trú