Rætt við Ágúst Júlíusson formann Sundfélags Akraness

Sundfélag Akraness var stofnað árið 1948. Í handbók félagsins segir að markmið þess sé að að efla öryggi og sundkunnáttu barna, að stuðla að auknum áhuga og bættum árangri iðkenda á sundíþróttinni, að iðkendur hafi áhuga og ánægju af því að æfa sund, að vekja metnað og auka sjálfstraust og félagsþroska iðkenda og að styðja eldra sundfólk til áframhaldandi framfara og að efla það til frekari afreka. Í stjórn félagsins ásamt Ágústi Júlíussyni formanni eru þau Guðrún Guðbjarnadóttir, Maríanna Pálsdóttir, Þórdís Bjarney Guðmundsdóttir, Emilia Orlita, Ruth Jörgensdóttir Rauterberg og Nína Björg Gísladóttir. Aðalþjálfari og framkvæmdastjóri sundfélagsins er Kjell Wormdal og aðrir þjálfarar eru Bjarney Guðbjörnsdóttir, Guðrún Carstensdóttir, Jill Syrstad, Heiður Haraldsdóttir og Hlín Hilmarsdóttir.

Ágúst segir í spjalli við Skessuhorn að í fyrra hafi verið um 450 iðkendur skráðir í félagið með ungbarnasundi og Garpasundi. Hann segir að þetta sé svipaður fjöldi og hafi verið síðustu ár og þau geti ekki mikið bætt við fleiri iðkendum því flestir hópar eru fullskipaðir vegna aðstöðuleysis.

Hvernig skiptið þið eftir aldri og hver eru æfingagjöldin? „Í ungbarnasundi eru 0 til 2 ára börn, Fjörfiskar eru börn á aldrinum 2 til 3 ára, Krossfiskar eru fyrir 4 til 6 ára börn, sundnámskeið eru fyrir 7 til 9 ára börn og sundæfingar fyrir börn og unglinga frá 10 til 18 ára. Garpasund er síðan fyrir 18 ára og eldri. Varðandi æfingagjöldin þá er erfitt að bera okkur saman við önnur aðildarfélög hjá ÍA en við erum ekki með mjög há æfingagjöld miðað við önnur sundfélög á landsvísu.“

Hver eru helstu verkefnin yfir veturinn? Það eru æfingar og sundmót, sundsýningar fyrir þau yngri, sundmót fyrir þau eldri, fjáraflanir og hópefli fyrir krakkana. Þau yngstu frá leikskólaaldri og upp í 3. bekk eru á sundsýningum og þau sem eru á grunnskólaaldri fara á einhver mót á fyrstu stigum. Um tíu ára aldurinn eru þau farin að keppa á fleiri mótum og síðan eykst þetta jafnt og þétt þegar þau verða eldri. Elstu krakkarnir æfa mestallt árið en taka einn mánuð í frí yfir sumarið. Þessi yngri æfa á þeim tíma sem skólinn er í gangi og eru því í fríi frá æfingum á sumrin.

Æfa ellefu sinnum í viku
Ágúst segir varðandi þjálfunina að það fari eftir því á hvaða aldri krakkarnir eru hvernig þjálfunin er sett upp. „Fyrst um sinn er reynt að hafa þetta þannig að þetta sé skemmtilegt og þeim líði vel í lauginni. Þegar þau eru komin á fermingaraldurinn þá er meiri sérhæfing og eykst svo enn frekar þegar þau verða eldri með fjölgun og fjölbreytni æfinga. Þá er meira um afreksþjálfun en svo eru alltaf einhverjir sem geta æft og tekið þátt í félagsstarfinu án þess að vera að hugsa um keppni og það er allt í góðu. Elstu krakkarnir æfa ellefu sinnum í viku en krakkarnir sem eru á afreksbraut í FVA fá að æfa á skólatíma sem er breyting frá því sem áður var. Nú æfa þau frá klukkan 7 til 9 á morgnana en þetta var áður klukkan 5.30 þegar ég var að æfa. Á grunnskólaaldri eru þessir krakkar að æfa fleiri íþróttir en um leið og þau koma á framhaldsskólaaldurinn þurfa þau að velja íþrótt. Þegar þú æfir ellefu sinnum í viku er ekki mikill tími fyrir annað en sundið.“

Reyna að halda krökkunum lengur í sundinu
Ágúst segir að elsti afrekshópurinn fari á hverjum laugardegi til Hafnarfjarðar allt árið um kring í samstarfi við Aftureldingu og Stjörnuna og æfa þar í 50 metra laug. „Það eru um 15 krakkar frá okkur og um 25 í heildina. Sundfélag Akraness er eina félagið á landinu sem er með einstaklinga í landsliðshópi sem æfir í 25 metra útilaug sem er frekar merkilegt. Eftir áramót breyttist æfingatíminn hjá okkur þannig að nú erum við með laugina frá klukkan 15-17 fyrir okkur og þá fáum við fleiri sem æfa á sama tíma sem er gott fyrir félagsskapinn. Okkar trú er að þá náum við að halda krökkunum lengur í sundinu því um leið og þú færð hópinn allan á sama tíma eru meiri líkur að við fáum breiðari og þéttari hóp til að æfa saman. Þetta verður allt miklu skemmtilegra þegar hægt er að sameina alla hópana og eflir félagsandann einnig.“

Ágúst kemur inn á það að á síðasta ári hafi þau verið með fjóra sundmenn í landsliðinu og marga aðra sem voru ansi nálægt. „Það sem er að gerast núna hjá okkur er að það eru fleiri góðir sundmenn á landsvísu, þetta hafa kannski verið tveir til þrír en núna eru miklu fleiri sem eru að banka á dyrnar á aldrinum 15 til 20 ára. Þar á þjálfarinn Kjell Wormdal mjög stóran þátt en hann hefur verið að þjálfa hjá okkur í alls ellefu ár og gert frábæra hluti.“

*Ungir og efnilegir sundmenn úr röðum SA. Ljósm. aðsend*

Hefst með mikilli vinnu
En hvernig gengur reksturinn og hvernig ganga fjáraflanir félagsins? „Hann gengur alveg en við þurfum að hugsa um hverja einustu krónu. Við verðum að vera dugleg að safna, bæði iðkendur, foreldrar og stjórn að leita að styrkjum. Æfingagjöldin eru ekki nema hluti af því og ná varla upp í launakostnað svo þetta er stundum mikið streð en þetta hefst allt saman með mikilli vinnu allra sem standa að félaginu. Við fáum styrki, seljum auglýsingaskilti og fáum styrktaraðila. ÍA og Akraneskaupstaður styrkja okkar rekstur vel og síðan er þetta sala á kleinum og flatkökum, blaðaútburður og þá er útvarp Akraness stór hluti af þessu. Það er endalaust verið að leita að peningum og starf stjórnar fer að miklum hluta í það að reyna að auka tekjur félagsins.“

Ágúst segir að krakkarnir séu mjög dugleg í því að hittast fyrir utan reglubundnar æfingar, samverustundirnar séu æði margar og þau sjái um það að flestu leyti sjálf. Hann segir að það hafi alltaf verið þannig í sundinu að hópurinn sé mjög þéttur og geri mikið saman utan æfinga.

Hvað með foreldrastarfið? „Flestir sem eru í stjórn eru foreldrar barna í sundfélaginu og margir foreldrar eru sunddómarar sem fá þá meiri tilgang á sundmótum, koma að dæma og geta einnig horft á krakkana sína sem er góð lausn fyrir alla. Við reynum að virkja foreldra til að taka meiri þátt í starfinu og erum að reyna að koma okkur aftur af stað á fullum krafti eftir Covid sem var mjög erfiður tími og skrýtinn.“

Garpasundmenn eru fyrrum sundmenn SA og hafa komið af krafti inn í félagið að undanförnu. „Þau eru um 15 sem eru að æfa um þessar mundir tvisvar í viku og er ansi góður kjarni.“ segir Ágúst. „Þú mátt keppa í Garpasundi frá 25 ára aldri og keppir alltaf fimm ár upp fyrir þig. Það er hópur af Garpastelpum sem er að fara í æfingabúðir til Tenerife á næstunni og það er bara frábært. Flestir íþróttamenn eru að toppa á milli 25 ára og þrítugs en það er mjög algengt að flestir krakkar í sundinu hætti að æfa um tvítugt. Ástæðan er líklega sú að það fer mikill tími í æfingar og þú getur ekki stundað fulla vinnu ef þú ætlar að verða afreksmaður í sundi. Þessu viljum við breyta og hafa krakkana sem lengst í sundinu því sund er frábær íþrótt á allan hátt og þó það geti stundum verið einmanalegt í lauginni þá er sund frábær félagsskapur þess utan,“ segir Ágúst að lokum.

„Sund er frábær íþrótt á allan hátt“