Heiður Karlsdóttir. Samsett mynd/karfan.is
2. október 2021
Heiður Karlsdóttir körfuknattleikskona, sem nú spilar með Fjölni í Grafarvogi, hefur samkvæmt heimildum karfan.is fengið tilboð frá 35 skólum í bandaríska háskólaboltanum um námsstyrk og að spila með liðum skólanna. Hún mun þó ekki fara út eftir yfirstandandi tímabil, þar sem að hún á enn eitt ár eftir af framhaldsskóla hérlendis. Samkvæmt heimildum Körfunnar er Heiður þó líkleg til þess að fara vestur um haf eftir næsta tímabil, 2023-24.
Heiður er 17 ára og er uppeldisfélag hennar í greininni Ungmennafélag Reykdæla en síðar spilaði hún með Skallagrími í Borgarnesi, en skipti svo yfir í Fjölni fyrir síðasta tímabil. Í 18 leikjum með Fjölni það sem af er tímabili hefur hún skilað 5 stigum og fjórum fráköstum á um 18 mínútum spiluðum að meðaltali í leik. Þá hefur hún einnig verið hluti af undir 16 ára landsliðinu og nú síðast undir 18 ára landsliði Íslands. Heiður var tilnefnd til verðlauna í kjöri Íþróttmanneskju Borgarfjarðar nú á þrettándanum.
