Íþróttaálfurinn sér alltaf um að allir hreyfi sig. Ljósm. vaks

Samevrópsk íþrótta- og hreyfivika í gangi

Íþrótta- og hreyfivika Evrópu (European Week of Sport) er haldin 23. til 30. september ár hvert í yfir 30 Evrópulöndum. Evrópubúar sameinast í vikunni undir slagorðinu #BeActive. Skipulagðir viðburðir eru í a.m.k. fjórum sveitarfélögum á Vesturlandi, tileinkaðir vikunni, þ.e. á Akranesi, Stykkishólmi, Grundarfirði og í Snæfellsbæ.

Heilsueflandi samfélag á Akranesi í samstarfi við ÍA leggur sitt mörkum og styður við þá sem vilja gera íþróttir, hreyfingu og heilbrigðan lífsstíl sýnilega þessa viku. Margt verður í boði og má þar nefna að Brekkubæjarskóli tekur Brekkósprett og dansar í frímínútum, Grundaskóli leggur sérstaka áherslu á dans þessa daga, Heilsueflingarteymi FVA verður með fjölbreytta og skemmtilega dagskrá og Bókasafn Akraness býður upp á sögugöngu og fyrirlestur um heilsu. Opnar æfingar verða fyrir alla hjá Knattspyrnufélagi ÍA og Badmintonfélagi ÍA alla næstu viku og þá verður Borðtennissambandið með kynningu í Þorpinu. Frítt verður að æfa í Ultraformi í hreyfivikunni og þá verður frítt í sund á Jaðarbökkum alla vikuna.

Í Stykkishólmi hefur verið sett saman stútfull dagskrá af íþrótta- og heilsutengdum viðburðum. Dagskráin er hlaðin kynningum á íþróttastarfi í bænum sem hentar öllum aldri og eru fjölmargir viðburðir á dagskrá við allra hæfi. Frítt er á alla fyrirlestra og frítt í sundlaugina út mánuðinn.

Ýmislegt verður í gangi í Grundarfirði í vikunni. Meðal annars verður partý spinning, krakkajóga, frisbígolf, frítt í heilsueflingu 60 ára og eldri, sirkusfjör, skyndihjálparnámskeið og frítt í sund alla vikuna.

Snæfellsbær heldur heilsudaga sína í sjötta skiptið og annað skiptið sem hluta af ÍSÍ íþróttaviku Evrópu. Á heilsudögum er lögð áhersla á að bjóða íbúum upp á heilsutengda viðburði og kynningar sem henta öllum aldri. Fyrst og fremst er þetta kynning á þeim heilsutengdu viðburðum sem eru nú þegar í boði í sveitarfélaginu.

Hægt er að skoða dagskrána nánar á heimasíðum sveitarfélaganna.

 

Líkar þetta

Fleiri fréttir

Mokveiði í dragnót

Dragnótarbáturinn Steinunn SH frá Ólafsvík lenti heldur betur í mokveiði rétt undan Ólafsvík á sunnudaginn. Köstuðu skipverjar dragnótinni aðeins þrisvar... Lesa meira