Lagt til á ársþingi KSÍ að fjölga leikjum í úrvalsdeild í fótbolta

Á morgun mun ársþing Knattspyrnusambands Íslands taka til umfjöllunar og afgreiðslu fjórar tillögur sem snúa að breytingum á lögum KSÍ. Hver um sig munu þessar tillögur, verði þær samþykktar, leiða af sér breytingar á fyrirkomulagi keppni í efstu deild karla. Ein tillagan gerir einnig ráð fyrir breytingu á keppni í 1. deild karla. Knattspyrnufélag ÍA hefur lagt fram þá tillögu að leikjum verði fjölgað í 12 liða deild þannig að leikin verði þreföld umferð í stað tveggja umferða eins og nú er. Knattspyrnufélagið Fram hefur lagt fram tillögu um 14 liða efstu deild, tillögu sem Knattspyrnufélag ÍA lagði fram á síðasta ári. „Stjórn Knattspyrnufélags ÍA styður þessar tillögur en til að tillaga fái samþykki þarf hún að fá stuðning 2/3 fundarmanna. Knattspyrnufélag ÍA telur að þessar tillögur falli vel að þeirri stefnu félagsins að gefa ungum leikmönnum aukin tækifæri í keppni þeirra bestu og veitir öllum félögum möguleika á auknum tekjum með fleiri leikjum og sölu efnilegra leikmanna til erlendra félaga,“ segir í tilkynningu frá stjórn KFÍA. Þar kemur sömuleiðis fram að í  samtölum forsvarsmanna Knattspyrnufélags ÍA við aðra í hreyfingunni virðist tillaga Fram hafa hvað mestan stuðning.

„Knattspyrnufélag ÍA styður hins vegar ekki hinar tvær tillögurnar sem liggja fyrir. Í fyrsta lagi tillögu starfshóps KSÍ um nýja þriðju umferð sem yrði skipt í tvennt að loknum tveimur umferðum, keppni efri 6 liða innbyrðis annars vegar og neðri 6 liða innbyrðis hins vegar. Stjórn Knattspyrnufélags ÍA telur þessa tillögu geta breikkað þá fjárhagslegu gjá sem þegar er til staðar á milli íslenskra félaga. Með því að skipta keppni í efstu deild í tvo hluta gæti orðið til keppni í neðri hluta sem er lítt áhugaverð fyrir þann breiða hóp áhugafólks sem stendur að baki knattspyrnunni. Í öðru lagi styður Knattspyrnufélaga ÍA ekki tillögu Fylkis um 10 lið í efstu deild með þrefaldri umferð og 14 liða 1. deild með tvöfaldri umferð. Knattspyrnufélag ÍA telur að fækkun liða í efstu deild styðji ekki við þau markmið að auka framgöngu ungra leikmanna enda fækkar möguleikum þeirra með færri liðum í efstu deild,“ segir í tilkynningu frá félaginu.

Líkar þetta

Fleiri fréttir