Kármenn töpuðu naumlega gegn Njarðvíkingum, 2-3, þegar liðin mættust í 2. deild karla í knattspyrnu á laugardaginn. Leikið var í Akraneshöllinni.

Gestirnir af Suðurnesjum fengu óskabyrjun því þeir komust yfir strax á 5. mínútu eftir mistök í vörn Kára. Hilmar Halldórsson skallaði fyrirgjöf upp í loftið og hugðist síðan skalla boltann til baka á Dino Hodzic í markinu. Dino var hins vegar kominn út í teiginn svo Hilmar skallaði boltann yfir hann. Knötturinn stefndi framhjá markinu en Kenneth Hogg kom á ferðinni og potaði honum yfir línuna.

Káramenn jöfnuðu á 32. mínútu leiksins. Jón Vilhelm Ákason lyfti boltanum inn á teiginn úr aukaspyrnu. Eggert Kári Karlsson skallaði boltann fyrir markið á Birgi Stein Ellingsen sem kom honum yfir línuna.

Skömmu fyrir hálfleikinn áttu Njarðvíkingar góða sókn. Ivan Prskalo fékk sendingu frá hægri, tók á móti boltanum í vítateignum og sendi hann framhjá Dino í markinu. Þar með voru gestirnir komnir í 1-2 og þannig var staðan í hléinu.

Njarðvíkingar byrjuðu síðari hálfleikinn með látum, því Kenneth Hogg skoraði annað mark sitt á 48. mínútu. Hann slapp einn í gegnum vörnina, ætlaði að lyfta boltanum yfir Dino sem varði en missti boltann frá sér. Kenneth náði að pota tánni í boltann og hann lak yfir marklínuna.

Guðfinnur Þór Leósson minnkaði muninn fyrir Kára á 62. minútu. Andri Júlíusson sendi góðan bolta yfir til ghæri. Njarðvíkingar skölluðu til baka en beint fyrir fætur Guðfinns sem skaut að marki en Rúnar Gissurarson í markinu varði frá honum. Boltinn féll hins vegar beint fyrir Guðfinn að nýju sem skilaði honum í netið. Fleiri mörk voru ekki skoruð og lyktir leiksins urðu því 2-3 sigur Njarðvíkinga.

Kári situr í 7. sæti deildarinnar með 25 stig, stigi meira en Fjarðabyggð en einu stigi á eftir KF. Kári á þó leik til góða á bæði liðin. Næsti leikur Kára er útileikur gegn Víði annað kvöld, þriðjudaginn 6. október.

Naumt tap gegn Njarðvík