Skallagrímskonur lögðu KR, 71-75, þegar liðin mættust í Domino’s deild kvenna í körfuknattleik. Leikið var í Reykjavík á laugardaginn.

KR-konur byrjuðu leikinn af krafti og höfðu undirtökin allan upphafsfjórðunginn. Þær leiddu enda að honum loknum með fjórum stigum, 20-14. En snemma í öðrum leikhluta snerist taflið við. Skallagrímskonur náðu góðum kafla og tóku forystuna. Mest komust þær níu stigum yfir, en heimakonur minnkuðu muninn í þrjú stig áður en flautað var til hálfleiks, 39-42.

KR-liðið var sterkari í upphafi síðari hálfeiks, náði forystunni og leiddi eftir þriðja leikhlutann með átta stigum, 66-58. Lítið var skorað framan af lokafjórðungnum og KR hélt lengi sex stiga forystu. En seint í leiknum náðu Skallagrímskonur góðu áhlaupi, komust yfir og létu forystuna aldrei af hendi. Þær sigruðu að endingu með fjórum stigum, 71-75.

Keira Robinson átti frábæran leik fyrir Skallagrím, skoraði 35 stig og tók 16 fráköst. Nikita Telesford skoraði 14 stig og tók átta fráköst, Embla Kristínardóttir skoraði tíu stig, tók fimm fráköst og gaf fimm stoðsendingar, Maja Michalska var með átta stig og fimm fráköst, Sanja Orozovic skoraði sex stig og tók tólf fráköst og Sigrún Sjöfn Ámundadóttir lauk leik með tvö stig.

Annika Holopainen var atkævðamest í liði KR með 24 stig og tíu fráköst. Kamilé Berenyté skoraði 13 stig og tók fimm fráköst og Taryn Ashley McCutcheon setti upp þrennu með tíu stig, 13 stoðsendingar og ellefu fráköst.

Skallagrímskonur hafa sigrað báða leiki sína í deildinni það sem af er og sitja í 2. sæti með fjögur stig, tveimur stigum á eftir toppliði Fjölnis en eiga leik til góða. Næsti leikur Skallagrímskvenna er útileikur gegn Val. Hann fer fram næstkomandi miðvikudagskvöld, 7. október.

Mörðu sigur í kaflaskiptum leik