Snæfellskonur máttu sætta sig við tap gegn Haukum, 59-67, þegar liðin mættust í Domino’s deild kvenna í körfuknattleik. Leikið var í Stykkishólmi í gærkvöldi og var þetta fyrsti heimaleikur Snæfellskvenna í vetur. Stykkishólmsliðið er enn nokkuð þunnskipað eftir að Covid-19 smit kom upp í bænum og nokkrum leikmönnum var gert að sæta sóttkví. Snæfellskonur voru þannig aðeins átta á leikskýrslunni, á meðan Haukar tefldu fram fullskipuðu tólf manna liði.

Jafnt var á með liðunum í upphafi leiks og gestirnir leiddu með fjórum stigum eftir fyrsta leikhluta, 13-17. Staðan breyttist lítið framan af öðrum fjórðungi, en þegar nær dró hálfleiknum náðu gestirnir góðri rispu og höfðu tíu stiga forskot í hléinu, 27-37.

Snæfellskonur komu ákveðnar til leiks leiks í þriðja leikhluta. Hægt en örugglega minnkuðu þær forskot gestanna. Aðeins fimm stigum munaði á liðunum fyrir lokafjórðunginn, 47-52, og leikurinn galopinn. Snæfellskonur minnkuðu muninn í fjögur stig seint í leiknum en nær komust þær ekki. Haukar gerðu nóg til að sigla heim átta stiga sigri á lokamínútunum, 59-67.

Tinna Guðrún Alexandersdóttir var atkvæðamest í liði Snæfells með 18 sti, Iva Georgieva skoraði ellefu stig, tók fimm fráköst og gaf fimm stoðsendingar. Emese Vida skoraði tíu stig, tók 15 fráköst og gaf fimm stoðsendingar, Anna Soffía Lárusdóttir skoraði tíu stig og tók níu fráköst og Rebekka Rán Karlsdóttir var með tíu stig.

Alyesha Lovett skoraði 20 stig fyrir Hauka og tók tíu fráköst, Bríet Sif Hinriksdóttir var með 13 stig, Elísabet Ýr Ægisdóttir skoraði tíu stig og tók sex fráköst og Þóra Kirstín Jónsdóttir var með tíu stig, fimm fráköst og fimm stoðsendingar.

Snæfellskonur hafa tapað fyrstu tveimur leikjum vetrarins í Domino’s deildinni og eru stigalausar í næstneðsta sæti deildarinnar enn sem komið er. Næsti leikur liðsins er heimaleikur gegn KR miðvikudaginn 7. október næstkomandi.

Tap í fyrsta heimaleiknum