Káramenn máttu játa sig sigraða gegn Haukum, 1-2, þegar liðin mættust í 2. deild karla í knattspyrnu í gærkvöldi. Leikið var í Akraneshöllinni og öll mörk leiksins litu dagsins ljós í fyrri hálfleik.

Gestirnir úr Hafnarfirði voru öflugri í upphafi, pressuðu á Káraliðið og stjórnuðu ferðinni í leiknum. Þeir komust yfir á 24. mínútu þegar Tómas Leó Ásgeirsson skoraði fyrsta mark leiksins. Káramönnum gekk illa að koma boltanum frá eftir hornspyrnu. Að endingu barst knötturinn á Tómas við vítapunktinn, sem náði af miklu harðfylgi að koma honum framhjá Dino Hodzic í marki Kára og í netið.

Káramenn fengu dauðafæri örfáum mínútum þegar Eggert Kári Karlsson átti skot af markteig en Óskar Sigþórsson í marki Hauka varði glæsilega. Á 28. mínútu geystust Haukar upp hægri kantinn, sendu lágan boltann fyrir markið á Tómas sem skoraði auðveldlega af stuttu færi og kom gestunum tveimur mörkum yfir.

Káramenn sóttu í sig veðrið eftir að hafa lent tveimur mörkum undir og voru beittari það sem eftir lifði fyrri hálfleiks. Páll Sindri Einarsson fékk dauðafæri á 44. mínútu, þegar hann slapp einn í gegn en Óskar varði frá honum. Á lokamínútu fyrri hálfleiks fengu Káramenn hornspyrnu. Jón Vilhelm Ákason tók spyrnuna og sneri boltann nánast alla leið í markhornið fjær, þar sem Eggert Kári þurfti rétt að láta hárið strjúka knöttinn til að koma honum yfir línuna og minnka metin fyrir heimamenn.

Hvorugu liðinu tókst að bæta við marki í síðari hálfleik og fór Hafnarfjarðarliði með sigur af hólmi, 1-2.

Kári situr í 8. sæti deildarinnar með 19 stig eftir 15 leiki, tveimur stigum á eftir Fjarðabyggð en með sex stiga forskot á ÍR í sætinu fyrir neðan. Næsti leikur Kára er útileikur gegn Njarðvík sunnudaginn 13. september næstkomandi.

Sigraðir í höllinni