Víkingur Ó. og ÍBV skildu jöfn, 1-1, þegar liðin mættust í 1. deild karla í knattspyrnu á laugardaginn. Leikið var í Ólafsvík.

Ólafsvíkingar voru líflegir í upphafi leiks en það voru gestirnir frá Vestmannaeyjum sem skoruðu á undan. Á 9. mínútu leiksins átti Felix Örn Friðriksson góða fyrirgjöf frá vinstri, beint á kollinn á Gary Martin sem var einn og óvaldaður í teignum og skallaði boltann í netið.

Heimamenn fengu sín færi til að jafna í fyrri hálfleiknum. Á 12. mínútu átti Indriði Áki Þorláksson átti gott skot að marki eftir stungu sendingu frá Gonzalo Zamorano, en Halldór Páll Geirsson varði vel frá honum. Á 19. mínútu átti Gonzalo síðan hörkuskot að marki sem Halldór varði stórglæsilega.

Heimamenn voru sterkari það sem eftir lifði fyrri hálfleiks og náðu að jafna metin á 37. mínútu. Þorleifur Úlfarsson sendi boltann á Gonzalo, sem var við vítateigsjaðarinn, aðeins til vinstri. Gonzalo setti boltann yfir á hægri og smurði honum með fallegu innanfótarskoti í markvinkilinn fjær. Stórglæsilegt mark hjá Gonzalo.

Tíðindi fyrri hálfleiks voru ekki öll ósögð, því aðeins mínútu eftir að heimamenn jöfnuðu fékk Vignir Snær Stefánsson sitt annað gula spjald fyrir tæklingu rétt utan vítateigs. Máttu Ólafsvíkingar því leika manni færri allan síðari hálfleikinn og rúmlega það.

Eyjamenn hugsuðu sér gott til glóðarinnar og sóttu í síðari hálfleik, en það voru engu að síður Ólafsvíkingar sem fengu bestu færin og hefðu getað stolið sigrinum, manni færri. Besta færi seinni hálfleiksins kom á 67. mínútu þegar Þorleifur sendi boltann beint fyrir fætur Gonzalo sem átti skot á nærstöng sem Halldór varði vel. Rétt fyrir leikslok fór um Ólafsvíkinga þegar Jonathan Glenn komst einn í gegnum vörnina, en Ívar Reynir Antonsson átti frábæra tæklingu á hárréttum tíma og kom boltanum í hornspyrnu. Ekkert varð úr henni og leiknum lauk með 1-1 jafntefli.

Víkingur Ó. situr í 9. sæti deildarinnar með ellefu stig eftir tólf leiki, stigi á eftir Aftureldingu en stigi á undan Leikni F. Næsti leikur Ólafsvíkinga er útileikur gegn toppliði Fram á miðvikudaginn, 2. september.

Manni færri en hættulegri