Víkingur Ó. gerði jafntefli við Vestra, 3-3, þegar liðin mættust í 1. deild karla í knattspyrnu. Leikið var á Ísafirði í gær.

Heimamenn voru öflugri í blábyrjun leiksins, án þess þó að skapa sér nein dauðafæri. Eftir um tíu mínútna leik áttu Ólafsvíkingar hættulega sókn og skalla rétt framhjá. Upp úr því voru þeir sterkari inni á vellinum, en það voru engu að síður heimamenn sem brutu ísinn á 39. mínútuleiksins. Ivo Öjhage skoraði þá með laglegum skalla og aðeins fimm mínuútum síðar, rétt áður en flautað var til hálfleiks, skoraði Pétur Bjarnason annað mark Vestra. Heimamenn fóru því með tveggja marka forystu inn í hléið.

Síðari hálfleikur fór rólega af stað. Það var ekki fyrr en Ólafsvíkingar gerðu þrefalda breytingu á liði sínu að hlutirnir fóru að gerast. Gonzalo Zamorano minnkaði muninn fyrir Víking Ó. á 67. mínútu, aðeins tveimur mínútum eftir að hann kom inn á sem varamaður. Aðeins mínútu síðar skoraði Harley Willard metin fyrir Víking Ó. og eins og hendi væri veifað var staðan orðin jöfn, 2-2.

Vestramenn urðu fyrir áfalli á 77. mínútu þegar Ivo var rekinn af velli með sitt annað gula spjald. Þurftu þeir því að leika manni færri síðustu 13 mínúturnar. Ólafsvíkingar nýttu sér liðsmuninn og sóttu að marki. Þeir fengu aukaspyrnu rétt fyrir utan teig á 82. mínútu. Harley gerði sér lítið fyrir og skoraði úr spyrnunni og allt útlit fyrir að Ólafsvíkingar ætluðu að stela sigrinum. En svo varð ekki því Daníel Agnar Ásgeirsson jafnaði metin fyrir heimamenn í uppbótartíma og þar við sat. Leiknum lauk með 3-3 jafntefli.

Víkingur Ó. situr í 10. sæti deildarinnar með tíu stig eftir ellefu leiki, jafn mörg stig og Leiknir F. í sætinu fyrir ofan en þriggja stiga forskot á Þrótt R. Næsti leikur Ólafsvíkinga er gegn sterku liði Vestmannaeyinga. Víkingur Ó. og ÍBV mætast í Ólafsvík á laugardaginn, 29. ágúst.

Dramatískt jafntefli á Ísafirði