ÍA og KA skildu jöfn, 2-2, þegar liðin mættust í Pepsi Max deild karla í knattspyrnu á laugardaginn. Leikið var á Akureyri.

Skagamenn voru heldur sterkari framan af leiknum, en tókst ekki að skapa sér nein opin marktækifæri. Eftir því sem leið á fyrri hálfleikinn sóttu KA-menn í sig veðrið og tóku að lokum stjórnina í leiknum. Á 26. mínútu skoruðu þeir mark sem var dæmt af en tveimur mínútum síðar komust þeir yfir. Hrannar Björn Steingrímsson átti þá góða fyrirgjöf frá hægri beint á kollinn á Guðmundi Steini Hafsteinssyni sem stýrði honum í fjærhornið.

strax í upphafi síðari hálfleiks fengu KA-menn vítaspyrnu. Guðmundur Steinn fór á punktinn og skoraði af miklu öryggi og kom heimamönnum í 2-0.

Skagamenn tóku við sér eftir annað mark KA. Þeir voru mun beittari og náðu að minnka muninn á 56. mínútu leiksins. Brynjar Snær Pálsson sendi þá frábæran bolta fyrir markið frá vinstri þar sem Gísli Laxdal Unnarsson var mættur á fjærstöngina og skallaði hann yfir Kristijan Jajalo, í þverslána og inn.

Skagamenn héldu uppteknum hætti eftir markið, þeir voru miklu sterkari og varla að heimamenn fengju boltann næstu tíu mínúturnar eða svo. Það var hins vegar upp úr engu sem íA jafnaði metin á 67. mínútu. Brynjar tók hornspyrnu frá hægri sem sveif á fjærstöngina beint á Mikkel Qvist, varnarmann KA, sem var aleinn í teignum og ætlaði að hreinsa frá marki. Það gekk hins vegar ekki betur en svo að hann sendi boltann í eigið net og jafnaði þar með fyrir ÍA.

Það sem eftir lifði leiks freistuðust bæði lið til þess að stela sigrinum. Besta færið fengu heimamenn, þegar Andri Fannar Stefánsson slapp einn í gegnum vörn Skagamanna en Árni Snær Ólafsson kom langt út úr markinu og varði vel frá honum.

ÍA fékk nokkur ágæt tækifæri. Stefán Teitur Þórðarson átti hörkuskot að marki og Sindri Snær Magnússon sömuleiðis. Í uppbótartíma skallaði Hlynur Sævar Jónsson boltann í netið fyrir ÍA eftir hornspyrnu, en markið var dæmt af vegna sóknarbrots. Leiknum lauk því með jafntefli, 2-2.

Skagamenn sitja í 7. sæti deildarinnar með 14 stig eftir ellefu leiki, jafn mörg og Víkingur R. í sætinu fyrir neðan en tveimur stigum á eftir Fylki. Næsti leikur ÍA er útileikur gegn erkifjendunum í KR næstkomandi sunnudag, 30. september.

Björguðu jafntefli fyrir norðan