Víkingur Ó. fékk skell þegar liðið heimsótti Keflvíkinga í 1. deild karla í knattspyrnu í gærkvöldi. Keflvíkingar réðu lögum og lofum á móti Ólafsvíkurliðinu, sem fann aldrei taktinn í leiknum. Að lokum fór svo að heimamenn sigruðu stórt, 6-1.

Keflvíkingar brutu ísinn á 11. mínútu leiksins og var það mark af dýrari gerðinni. Davíð Snær Jóhannsson sendi fallega sendingu inn á vítateiginn þar sem Ari Steinn Guðmundsson sendi boltann viðstöðulaust yfir Brynjar Atla Bragason markvörð og í netið.

Ólafsvíkingar áttu sitt besta færi í fyrri hálfleik á 17. mínútu, en Ólafur Bjarni Hákonarson skaut framhjá eftir laglega sókn. Aðeins fjórum mínútum síðar skoruðu Keflvíkingar öðru sinni. Víkingar náðu ekki að hreinsa boltann frá marki heldur barst hann til Ara Steins vinstra megin, sem renndi honum fyrir á Joey Gibbs sem skoraði. Og áfram héldu Keflvíkingar. Á 25. mínútu komust þeir inn fyrir vörnina vinstra megin. Dagur Ingi Valsson sendi boltann á Kian Williams sem renndi honum auðveldlega framhjá Brynjari í markinu. Heimamenn komnir í 3-0 og þannig var staðan í hléinu.

Keflvíkingar héldu uppteknum hætti í síðari hálfleik. Þeir komust í 4-0 á 57. mínútu þegar Joey skoraði sitt annað mark eftir sendingu frá Ingimundi Aroni Guðnasyni. Kian Williams skoraði síðan sjötta mark Keflvíkinga á 68. mínútu, eftir sendingu frá Degi Inga.

Ólafsvíkingar fengu stöku færi þegar nær dró leikslokum. Gonzalo Zamorano átti ágætt skot að marki á 71. mínútu og Billy Steadman skaut yfir úr góðu færi þegar tíu mínútur voru eftir. En það voru Keflvíkingar sem skoruðu áður en Ólafsvíkingar komust á blað. Þegar tvær mínútur lifðu leiks kom Davíð Snær heimamönnum í 6-0, en Brynjar Vilhjálmsson klóraði í bakkann fyrir Víking á lokamínútu leiksins. Lokatölur 6-1, Keflvíkingum í vil.

Ólafsvíkingar sitja í 10. sæti deildarinnar með níu stig eftir tíu leiki, stigi á eftir Leikni F. en fimm stigum fyrir ofan efra fallsætið sem Þróttur R. vermir. Næsti leikur Víkings er útileikur gegn Vestra á sunnudaginn, 23. ágúst næstkomandi.

Ólafsvíkingar burstaðir