Lið ÍA karla í knattspyrnu er dottið úr leik í Mjólkurbikarnum eftir tapleik í 16-liða úrslitum gegn Val í gærkvöldi. Leikurinn átti upphaflega að fara fram í síðasta mánuði en var frestað vegna Covid-19. Leikið var á Hlíðarenda í Reykjavík en síðast þegar þessi tvö lið mættust, á sama velli, fengu Valsmenn skell frá Skagamönnum en þeir gulklæddu unnu þá viðureign 4-1. Mátti því búast við hörku viðureign.

Valsmenn voru hættulegir í upphafi leiks og sóttu stíft á Skagamenn sem þurftu að hafa sig alla við að verjast. Fyrsta mark kom strax á 12. mínútu. Þar var á ferðinni Patrick Pedersen sem skallaði knöttinn í mark ÍA eftir góða fyrirgjöf frá Sigurði Agli Lárussyni. Valsmenn voru þéttir framan af og gerðu ÍA erfitt fyrir í sínum sóknaraðgerðum. Þeir gulklæddu héldu þó haus og komust hægt og rólega inn í leikinn. Besta jöfnunarfærið í fyrri hálfleik kom á 36. mínútu. Þá átti Gísli Laxdal frábæra sendingu inn í teig á Martein Theodórsson sem var einn og óvaldaður en hitti ekki boltann. Algjört dauðafæri hjá Skagamönnum. Staðan því 1-0 fyrir Val í leikhléi.

Í síðari hálfleik voru það Skagamenn sem komu ákveðnari til leiks. Mikið líf var í þeim gulklæddu sem reyndu hvað þeir gátu að skapa sér opin færi og sóttu hart að heimamönnum. Allt kom þó fyrir ekki og á 65. mínútu náði Aron Kristófer Lárusson sér í rautt spjald eftir hörð orðaskipti við aðstoðardómara leiksins. Valsmenn nýttu sér þennan meðbyrð, verandi einum fleiri, og skoruðu fjórum mínútum síðar. Aron Bjarnason átti sendingu á Lasse Petry sem skallaði boltann í netið og tvöfaldaði forystu heimamanna.

Skagamenn voru þó hvergi búnir að gefast upp því fimm mínútum síðar minnkaði ÍA muninn. Tryggvi Hrafn Haraldsson átti fast skot á mark Valsara sem Hannes Þór Halldórsson varði. Steinar Þorsteinsson var þá á réttum stað á réttum tíma, náði frákastinu og minnkaði muninn í eitt mark þegar stundarfjórðungur var eftir af venjulegum leiktíma.

Skagamenn lögðu allt í sölurnar en þurftu að lokum að lúta í lægra haldi gegn Valsmönnum sem skoruðu rétt undir lokin í uppbótartíma. Var það Einar Karl Ingvarsson sem skilaði boltanum í netið og tryggði sínum mönnum farseðilinn í 8-liða úrslit Mjólkurbikarsins. Lokatölur 3-1 fyrir Val.

ÍA er því úr leik í Mjólkurbikarnum en Valur mun mæta HK í 8-liða úrslitum. Sá leikur fer fram fimmtudaginn 10. september á Hlíðarenda.

Skagamenn úr leik í Mjólkurbikarnum