Skallagrímsmenn skildu jafnir í gærkvöldi í leik gegn Hafnarfjarðarlinu KÁ þegar liðin mættust í sínum fyrsta leik í C-riðli fjórðu deildar karla í knattspyrnu eftir hlé á Íslandsmótinu vegna kórónuveirunnar. Þegar var búið að fresta tveimur umferðum og verða dagsetningar fyrir þær viðureignir ákveðnar síðar. Var því farið beint í 11. umferð mótsins þar sem einmitt Skallagrímur og KÁ áttust við. Spilað var á Skallagrímsvelli í Borgarnesi í einmuna veðurblíðu.

Gestirnir komu mun sterkari til leiks og voru alltaf skrefinu á undan heimamönnum. Fyrsta mark kom frá KÁ þegar Marteinn Víðir Sigþórsson skilaði boltanum í netið. Stundarfjórðungi síðar urðu einhverjar stimpingar í teig Skallagríms með þeim afleiðingum að gestirnir uppskáru víti. Gísli Þröstur Kristjánsson fór á punktinn fyrir sína menn og tvöfaldaði forystu gestanna fyrir leikhlé.

Eitthvað hefur hálfleiksræðan kveikt undir leikmönnum Skallagríms því þeir félagar komu mun beittari inn í seinni hlutann. Magnús Helgi Sigurðsson minnkaði muninn í eitt mark á 74. mínútu og þegar rétt rúmar tíu mínútur lifðu af leik, bætti Viktor Már Jónasson við jöfnunarmarkinu og lokastaðan því 2-2.

Þetta er þriðja jafntefli Skallagrímsmanna í röð en liðið er nú í þriðja sæti riðilsins með 15 stig. KÁ er í sætinu fyrir ofan með 18 stig en á toppnum eru Hamarsmenn með 21 stig.

Næstu leikur Borgnesinga verður gegn Berserkjum á Víkingsvelli í Reykjavík. Leikurinn fer fram næsta þriðjudag og hefst kl. 19:00.

: Passa þurfti upp á tveggja metra regluna og voru leikmenn með grímur þegar þurfti

: Skallagrímsmenn knúðu fram jafntefli eftir að hafa lent 2-0 undir í fyrri hálfleik

Jafntefli hjá Skallagrímsmönnum